Актуально Как защитить свои данные на Госуслугах от мошенников СКФО Школа креативных индустрий появится на Ставрополье СКФО Началось строительство школы программистов у озера Ак-гель СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность

АХЪМАШТЫЛРА, АПАТРИОТРА, АУЫСАРА РЫХЪВЛАПЫН

22.03.2019 299
АХЪМАШТЫЛРА, АПАТРИОТРА, АУЫСАРА РЫХЪВЛАПЫН
Москва город йбзазауа, йынхауа хIхаквлагIвчва щардала йанйалитI, уыс пшдзата йакIвдыршауагьи гьмачIым. Ауаъа йынхауа «Абаза» культура жвлара ргIаджвыквцIарала, абхаз-абаза Дуней Конгресс йалу рацкIрала Москва ауагIахъаква р-Тдзы апны «Абазашта – сара сгвы» ахьызта литература хъвлапны акIвшатI. Ауаъа РФ-ла гIатгара зму ауацIа уысква рынхагIвы ДЗЫБА Валерий, Къарча-Черкес Республика ауагIа руысагIв ЩЫБЗЫХВА Лариса, аюрист, ауысагIв ОГВЫЗ МухIамад, аэкономика наукаква рдоктор, агIвгIвы ЭТЛЫХВ Олег йцIыхъвахауа азаман ауацIала йгIацIырщтыз ркнига шIыцква йгIарыквчважватI. Ахъвлапын йалан абхаз-абаза Дуней Конгресс чIахIра зму апрезидент, аюридическа наукаква рдоктор ШАМБА Тарас йгьи Москва адыгьа йгьи абазаабхаз ахIбачва рдиаспора а-Совет апредседатель АГЫРБА Юрий, Москва йбзазауа абаза йгьи абхаз жвлараква ргIащтийыгIвчва. Москва «Абаза» культура жвлара аунашвачпагIв УЫРЧЫКЪВА Мурадин, ауи йалу ДАХIВ Роман, ШАРМАТ Ренат, КЪВАЧ Руслан, ахъвлапын акIвыршара ахчала йацхърагIаз МАЛХIВАЗ Мусса рпахь мурадта йдыргылыз – абаза бызшвала йгIацIцIыз акнига шIыцква Москва йбзазауа хIхаквлагIвчва йдырбара йгьи ауат зкъальам йгIахъыцIыз агIвгIвчва йрабардырра – абгата йгIардахIвтI. Америка уысагIв, атакIыгIв Лонгфелло Генри араса йгIаликIгIалун: «АршIыйагIв йхIаль ангIашвгвынгIвра, йгIвыраква рмагIны швазынадзарныс гьбаргвызлушым». Алитература анйара адызгалыз йшырхIвазла, уадзхъачIвата уанайчважвауа агIвычIвгIвыс йгIайхъыцIуа апхара уылаухIварныс уыжвгIанчIви технологиякIгьи йыгьуылнаршум. ЙгIачважваз зымгIвагьи анйаракви алитература хъвлапынкви рмагIны хвы шаквцIауачву гIалыркIгIатI. Апхьахьа Агырба Юрий анйара йалаз зымгIвагьи пхата драйхIвахIвтI йгьи Шамба Тарас Мирон йпа «Абаза район ЧIахIра зму абзазагIв» хьзы шгIайквнадыргаз ахабар асасчва йгIарылайхIватI. Алитература хъвлапны пщхъвыкIта йшан. Йапхъахауа ахъвы Дзыба Валерий Али йпа йыршIыйара йазынархан. МВД аполковник йъачIвагIа хъвдаквцIараква аршIыйарагьи рыцйырцитI. Асквш 2016 агIан ауи йкнига «Абазины в войнах России XIX – начала XX века» йызнапIыцIашваз зымгIвагьи йрымаджьащахъвата йапхьатI. АгIвыра зкъальам йгIахъыцIыз йшихIвазла, йырхъвыхра нхараква ужвыгьи йгьашIайымрыстI. ХIапхъахьыла ауи Апсны йаланакIуа ПсхIвы кыт абзазагIвчва йрылахьхаз, абаза-щхъарауаква дгIарыквчважвара ймурадпI. Валерий Али йпа йшихIвазла, акнига уыжвласыла йгIацIцIуаштI. Анйара апны Россия агIвгIвчва р-Союз йалу, Къарча-Черкес Республика ауагIа рыгIвгIвы, алитература кьангьашагIв, адраматург Щыбзыхва Лариса луысаква швабыж йгватшныта йрыздзыргIвытI. АуысагIв «Йлашару аладзква», «Песнь абазов», «Храм души моей», «АчIныш», «Золотой кувшин абазов» азкIкIраква дрыквгIашIастI. РФ агIвгIвчва р-Союз йалу, Къарча-Черкес, Ингвыщ, Адыгея республикаква руагIа уысагIв Огвыз МухIамад Назир йпа йыршIыйарагьи дара йрымаджьащахъвата тшахадыргIвазатI. Асквш 2017 агIан ауи урышв бызшвала йгIву «Мой путь» йгьи «Истина» йазкIкIраква азакIы ацIыхъва азакIы тагылата йгIацIцIтI. Ауи йуыса «Лицо кавказской национальности» а-Интернет жвыгъата йгIамнадатI, ауысагIв дызлагIардырхуа хцIарата йалтI. АршIыйагIв зымгIвагьи бзи йырбаз ауыса йахъазымкIва датшагьи щарда дгIарыпхьатI, аздзыргIвчвагьи напIасра дула днардастI. Алитература бзибагIвчва ауи атшын Россия агIвгIвчва р-Союз йалу агIвгIвы Этлыхв Олеггьи аргваныта йабадырырныс рылшатI. Ауи йапхъахауа йкнига «Зов крови» асквш 2003 агIан йгIацIцIтI. Ашвъаквала йалу агIвыра асквшква 1992–1993 рагIан Апсны йакIвшаз айсра йгIаквчважвитI. Олег Адыльгьари йпа ауыла дгIашIамсуата, ршIыйара шйылу гIайырбауата «Следы на песке» (ас.2016), «Звезды над Каиром» (ас 2017), «Притяжение» (ас. 2018) романква йгIвытI. «Притяжение» книга «Александр Невский» зхьзу алитература согIа зквнадыргара ртахъу агIвыраква рсатыр йалапI. ЙцIыхъвахауата Этлыхв Олег йгIацIищтыз агIвкнигакI «День литературы» йгьи «Литературная газета» рнапаква рпны Россия агIвгIвчва р-Союз аунашвачпарта асекретарь, ауысагIв ПЕРЕЯСЛОВ Николай йауацIыхта дгIарыквчважватI. Ауи йшгIаликIгIазла, Этлыхв Олег йкнига «Притяжение» абазакви абхазкви йырхъазымкIва СССР йаднакIылуаз хIкъраль абзазагIвчва зымгIвагьи йырзынархапI. Зпхьадзарала ймачIу ауагIахъаква рцри бызшваква рхчара шатахъу, дасу дъагIадзынгылыз ашIыпIала йыхъуа ахацква шбагъьу бзита йгIайырбатI. Алитератури атурыхи йырзынархаз анйара апны сквш 90 зхъыцIуашыз Искандер Фазиль йыршIыйарагьи гIаргвалашвахтI. Москва город абзазагIвчва шIаква ХВЫТI Самия, НАХВЫШВ Дамир, КВИЦИНИЯ Эдуард ауи йуысаква йгIарыпхьатI. Апсны йауу, ршIыйарала йапхъахауа ачIвырхъаква атызпуа Харчилава Ахрагьи йуысаква дгIарыпхьатI. Ахъвлапын рыцIагьи гвлахIарата йылчпатI Россияла «Гильдия пианистов» йалу, адунейла йапшым анкъвакъвраква рлауреат КЪВАНЧА Диана. Анйара йалаз аршIыйагIвчва ргIвыраква йырхъазымкIва абаза йгьи апсыуа уагIахъаква уахьчIвала йырхъйамкIва амаль змам рхачIвквагьи йрыквчважватI, апатриотра, ахъмаштылра, ауысара йырзалырхыз азаман рымамачIчвата, ужвыгьи йадзхъачIвата йчважварныс ртахъыркIвата йамцIыцIхтI
299 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный