АХIБАЧВА РШВАПХАЛА ЙГIАДЗЫНГЫЛИТI

ХIкъральла зпIатIу хIагIу Абашта ахчагIвы йы-Мш агвыргъьахъв ангIаргванхауа амамыр ахчара йгьи хIтынчра йрызгылу хIычкIвынчва аразыра ажваква рзынахIырхитI. АлбыргIан кыт йтыцIта уахьчIвала ар апны къвырльыкъв зхауа йрыуапI НакIвахв Али Аслан йпа, Меремкъвыль Расул Мурат йпа, Меремкъвыль Ахвын Альберт йпа, Хъиблахь Ислам Рауф йпа, Абаза Иналь МухIарби йпа, КIам Мурат Рамазан йпа. Арат ачкIвынчва райсыгIв борч йамайжьауата, йгIадзынгылуа ачкIвынчва швапхата йырзалуа, ан-абачва рхъа рыладухауа къвырльыкъв ъархауа арыпхьагIвчвагьи, акытлагIвчвагьи швабыжта йхIгвапапI. ЙабгайызгIвадата хайырла рунагIваква йгIарыдгылхыргIатI. Афганистан апны зинтернационал борч зырхъйаз МЕРЕМКЪВЫЛЬРГIА Альберти йхъапщыла Аминати рпа Ахвын асквш 1998, июль а17 АлбыргIан кыт дйытI. Ауи дхвыцищтарагьи амашинаква дхъырхуан, рквпшыраквала бзита йалидыргIун. АчкIвын апхьарта йжвбахауа акласс дангIалга ЭркеншахIар йтагылу Аграрна-технология колледж дыцIалтI. Ауаъа дшапхьуз «В», «С» категорияквала машина нкъвицарныс дзырхвитуа ашвъагьи гIацIигатI. Ахвын аколледж дъадзапхьуз Альберти Аминати ан-абачва райззара йцарыквын, рпа йхIаль пшдза йгьи апхьара азгIашыкърата йазйыму рыхъазла дъадыртшхъвауа рхъа йыладухауа, ргвы тынчта йгIайхуан. Асквш 2018 агIан Ахвын «технологическое обслуживание и ремонт автомобильного транспорта» ъачIвагIа шйымула диплом гIайырттI. ЦIыпх декабрь а 10 Ахвын сквшы гIважва дыртата йчIахIру йкъральгIв борч йырхъйарныс ар къвырльыкъвхара дызшIырттI. ХIкытлагIв Белгород къала йаныргIалу й-20925-хауа архъв апны атшыбжьараква дырхъыситI. СынчIва январь а 19 айсыгIв йквра гIайгын, анцIрала й-Псадгьыл дшазцIабыргызлушла ныха йхIватI. Ауи аткъвым йауата Абашта айсра Ду агIан агъа йпшIагылыз, афган айсра йалаз йаба рыщта йырцауата акъвырльыкъвхагIв йхъвдаквцIараква йырхъйитI. Ахвын дызлу агвып автомат амцIырхуайамцIарцIауа, датша абджьар рызгIарысабапуа, йапшым атехника нкъвырцауа тшырбжьитI. МеремкъвыльргIа Альберти Аминати рпа йыхъазла ргвы гьбжам. Йаргьи уахьчIвала хIкъраль мамырпI, ар апны ахабзаква багъьапI, ачкIвынчва рырчара ткIьийта йахъпшылитI, анчва къвырльыкъвхара йаъу ргIариква рыхъазла рыгвква тынчпI. Абазаква хъацIарала зыхьыз зыргаз уагIахъапI, Абашта ахчара йазцIабыргу хIщардагIвпI. УахьчIвала хIмамыр зхчауа зымгIва рдунейпшыща йгьи ртшдырра хIагIата, йызгIвадата ръахIыльчва йгIарыдгылхыргIатI. Абанпараква апызщылуа афырра атурых зынгьи йшIымчIварагIатI.