АХІАРАКЬАТЧПАГІВЧВА ЦХЪРАГІАРА ГІАРАДЗУШТІ

Февраль а 14–15 Сочи апны йцIасхаз Россия экономика форум акIвшатI. Ауи далан Россия Федерация а-Правительства а-Председатель МЕДВЕДЕВ Дмитрий. – Ари айззара апны хIкъраль асоциальна-экономика аъаща йгьахъазым гватра ззалхIхуа, араъа авласть йгьи абизнес рацынхара агъьызчIвуа ангIалра щарда рчпитI, аъачIвагIагIвчва йырхъйачIву ауысквала ражванахъаква рхIварныс лшара рауитI, – йгIаликIгIатI Медведев Дмитрий. Ауи йзаместитель, афорум адгалра комитет унашва ахъызцIауа КОЗАК Дмитрий аэкономика айззара Россия аштаква зымгIва шгIалалуа, аинвесторкви авласть органкви ъабадыруа анйарата йшалуа, олимпиада ъакIвшаз акъала аныргIалща атшпсщара йахъазымкIва йпхатшу анхартаква ргIащтийыгIвчва йгьи авласть йалу рынхара йшаквыргIапсу гIайхIватI. Ари афорум апны уыс хъадата йгIащтIырхтI ашIыпIаква рпны ауагIахъа проектква абзазара йшаларжьуа. Медведев Дмитрий йшихIвазла, асквш 2024-дза акъральла уагIахъа проектта 12, федеральна проектта 76 дырхъйара атахъыпI. Ауат ауыхвара, амгIваква рырчIаджьра, азгIвадарахчара, арыпхьара, ахIаракьатчпара тшауацIнарыхра, адемография йырзынархапI. – ХIреспублика апны асквш 2019 йгьи асквшква 2020–2021 ахачIвква анлыхIхуаз афедеральна власть органква аргваныта хIрыцынхатI, хIышта злу а 10 проекткI рпны йгIарбу ауысква ацхIырхъйарныс хIхIазырпI, – йхIватI ТЕМРЕЗОВ Рашид.  СынчIва аинвестиция форум апны акъраль аквта йачвыхъару ашIыпIаква атшауацIыхра тамщахIахара ахъазла йчпачIву йаквчважватI «Новые возможности российской глубинки» нархарала тшазызкIкIыз аъачIвагIагIвчва. Ауи йалан ацифра тшауацIыхрала, связьла йгьи ажвлара коммуникацияквала РФ аминистр НОСКОВ Константин, «Почта России» федеральна къвырльыкъвхарта знапIыцIу ПОДГУЗОВ Николай, «Почта Банк» аунашвачпагIв РУДЕНКО Дмитрий, ауыжвгIанчIви технологияква абзазара йалазжьуа анхартаква. Сочи апны йакІвшауа Россия инвестиция форум Къарча-Черкес ащтийыгІвчвагьи алапІ. Агвып друнашвачпагІвпІ хІреспублика а-Хъада Темрезов Рашид. Ауи айззара апкъ йтата ТЕМРЕЗОВ Рашид «Сбербанк России» аунашвачпагІв ГРЕФ Герман дйынйатІ. Ауат Къарча-Черкес Республика асоциальна-экономика атшауацІыхрала ахачІвква шацдырхъйушла, аквтанай йгьи йхвыцу абизнес йапщылу ахІаракьатчпагІвчва цхърагІара шгІаддрадзушла йангІалтІ, акъральыгІва йгьи амуниципальна тахъыраква рыхъазла ахвгІараква анакІвдыршауа абанк аквгвыгъараква рзалырхлуштІ. Анйара апны «Умный город» проект дырхъйауата ашІыпІа экономика апсахраква гІалалра шатахъу йаквчважватІ. ХІышта йгьи Россияла йпхатшу афинанс адкІылараква шацынхушла айчважвараква акІвшатІ, Къарча-Черкес йгьи «Деловая среда» акционер жвлара рацацхърагІарала ангІалра мачвы ацІарцІатІ. ХІреспублика аунашвачпагІв «Банк МСП» знапІыцІу ГОЛОВАНОВ Дмитрийгьи дйынйатІ. Ауат ашІыпІа экономика апхъала йназрыскIьуш амальква ъагІарбу ангІалра мачвы ацІарцІатІ. Ауи ацхърагІара ахІаракьатчпара тшадызкІылуа рахІа йрылархІвушта йгвыгъитІ.