СКФО В Кабардино-Балкарии арестован мужчина, забивший до смерти пенсионера СКФО В Моздокском районе прошел межрегиональный фестиваль казачьей песни СКФО В более чем 1,5 тыс организациях Ставрополья планируют внедрить систему QR-мониторинга пандемии СКФО В Чеченской Республике 117 детей-сирот получат до конца года собственное жилье СКФО В Ингушетии открыли два новых детских садика на 440 мест

АХIАФИЗКВА АБАРГВЫРАКВА ЙГIАРЫЛСТI

20.05.2019 131
АХIАФИЗКВА АБАРГВЫРАКВА ЙГIАРЫЛСТI
КIавкIаз ауагIахъаква исльам дин тшадыркIылуа йалагищтара сквшщарда гьцIуам, хпа-пщба абанпара рапхъала гIарып гIвыра мачIдзан йыздыруаз. АщхъагIвчва йрыуата а-Къвыръан ззырдырра зтахъыз йызтлакIьуаз агIарып къральква йцун, сквшквакIла йгIанхунта абызшвагьи, агIвырагьи, адин цIасквагьи ддырдыруан. АуагIа адин йазызбжьуз заман ауырала тынчта руыс рбарныс йгьа дымрыхвит уазтI, йапхъахуз амсылман диннкъвгагIвчва гIапсара щарда йгIарылстI – ауат тыргун, атутанакътара йтадырчIвун. Ауат атлаханква рагIан швабыжта йбаргвын, дасу йпсы йазаргвану адин тшадикIылырныс дгьахвитмызтI. Совет заман агIангьи адин йазарархаз агIаншараква гьмачIым. ХIкъральла апсахраква ангIаджвыквыл агIвычIвгIвыс динла йхвитнагIа абгата йгIайрысабапуа далагатI. УахьчIвала запш динызлакIгьи тшадызкIылуа баргвыра гьрымахым, йырзаргвану адин хабзакви ацIаскви дырхъйитI. Амсылманква рдин гIвнархаракI амапI, амакIыраквагьи аъапI. ШIыцраквакI гIаджвыквызцIара зтахъугьи гIаншитI. ХIабадучвагьи, ауат рапхъала исльам дин гIащтIызхызгьи сунна–хIва йызпхьауа МухIамад пигIамбар йунашваква, йажваква, йуысква гIахъызтIуа асуннит нархара акIвпI тамамта йырпхьадзауа. ХIреспублика апны уагIахъа щарда бзазитI. Хъгалра зму амсылман йгьи аправослав динква ракIвпI. Къарча-Черкес абзазагIвчва райхIара мсылманпI, акытквагьи акъалаквагьи амаджьгытква тагылапI, ансимчыбжьы ахвашаквала ауагIа амаджьгытква йцитIта йацыта джьума намаз ацырчпитI. Дин гвымхакIгьи гьаъам. Аисльам дин чкIвыныргIа рыгIзарабжьара ахъазла магIын ду зму амальпI, а-Къвыръан йану зымгIва агIвычIвгIвыс абзира дазырбжьитI, ауагIахъаква йгьи атгIачва разаъащаква дрыбагъьитI. ЙцIыхъвахауа асквшква хIреспублика апны асабиква а-Къвыръан, адин йъазырбжьауа амадырсаква гIахъыртIуа йалагатI. Ауи апш апхьарта Учкекен кыт апынгьи йгылапI, ауи гIахъызтIыз, йаунашвахъцIагIву Эркенов МухIамад-хIаджь йакIвпI. Асквш 2015 агIан амадырса йапхъахауата йгIацIырщтыз ахIафизква диннкъвгагIвчвахатI, ажвлара абзира йазырбжьитI. СынчIва амадырса пщгIвы гIалгатI – Байрамуков Шамиль, Кубанов Шагабан, Бакаев АхIмад, Тошев Абдулла. Арат ачкIвынчва адин хабзаква ракIвымкIвагьи а-Къвыръан шабгу збарла йырдыруата рапхьара алдыргатI. Апрель а 27 Черкесск город акультура Тдзы апны ахIафиз шIаква рчIахIра акIвшатI. КЧР а-Хъада йыхьызла ачкIвынчва драйхIвахIвтI КЧР а-Правительства а-Председатель йзаместитель Чеккуев Хзыр Умар йпа. Учкекен апны мадырса гIахъыртIищтара чкIвынчвата 1044-гIвы гIалгатI, ауат райхIарагIв амчыбыжь ауацIа рпны йымцахуа, уахъгьи тшынгьи рарыпхьагIвчва йрыцта йапхьатI. Амадырса апны ауат дырчитI, ауаъа йбзазауа щымта йгIашIарышвта щыбжьандза акъральыгIва апхьарта йаъапI, щыбжьанщтахь амадырса йцахитIта йхъвландзыкIьара рынбжьагIвчва йрыцта а-Къвыръан ддырдыритI. Ауи ардырра гьуыс ласым, йану шабгу гвнукIылра ахъазла 250–300-н раъара уаквахъысра атахъыпI. Амадырса аунашвачпагIв Эркенов МухIамадхIаджь йшихIвазла, сынчIва йгIацIырщтуа агвып чкIвынчва 22-джь йнадзауата йалаган, рпхьадзара рыцIа-рыцIа ймачIхумцара, апхьара ацIыхъвадза йазынадзаз пщгIвы ракIвпI. АхIафизква гIапсазтынгьи, йрылшаз швабыжта хвду амапI. Ари атшын ауат йрайхIвахIвырныс йгIайыз йапшым асогIа тлапIаква рзырчпатI. ДзачIв мсылманызлакIгьи рахIа йтлапIата йгвтараква йрылу ахIаджьчпара акIвпI. Ауи апш согIа тлапIадза рзырчпатI сынчIва амадырса йгIалгаз ачкIвынчва. Дагъстан йгIатыцIыз асасчва амадырса аунашвачпагIвгьи хIаджьчпара дызлацуш путевкIа йзалырхтI. ХIреспублика а-Хъада йаща Темрезов Теймуразгьи ахIафизква йгьи Пакистан йгIатыцIта ачкIвынчва йрыдынхалуаз рарыпхьагIв асотова телефонква согIата йриттI. АчкIвынчва ауатыкв заджвы-заджв йгIатардумца а-Къвыръан шырдыруа дырхъвыхтI, апщыгIвгьи закIгьи быжьдымрышвтуа, закIгьи рхъмаштылуа йгIапхьатI. Архъвыхра амщтахь ауат хIафиз фаша ршвырцIатI, амадырса йшгIалгазла адипломква рырттI. Арат асабиква йапшым акытква, акъалаква йгIартыцIын, амадырса апхьара йгIайтI. АчкIвынчва – абаза, къабард, нагIвай, асатин, трыкв, къарча рылапI, ауаса зынгьи уагIахъалых гьырчпум, айщчвата йабабитI, йацацхърагIитI. РахIа йайцIбу ахIафиз Тошев Абдулла 11 сквша рахIа дгьыртам, ауаса Къарча-Черкес Республикала ауи а-Къвыръан апхьарала йгIвбахауа гыларта гIатигатI. Ари ачкIвын Магнитогорск дгIатыцIын, хIышта апхьара дгIайтI. Бакаев АхIмад дкъабардпI, ауи Къарча-Черкес йапхьаз йапхъахауа акъабардква дрыуата а-Къвыръан ййырдыртI. Кубанов Шагабан хIреспублика амуфты Бердиев ИсмаилхIаджь йшвапхала дгIадзынгылтI, йдада йапшта адин гвыцкьала тшадикIылтI. Байрамуков Шамильгьи хIреспублика дауапI. Анйара ацIыхъва йнадзауата амадырса аунашвачпагIв Эркенов МухIамад-хIаджь КЧР а-Хъада Темрезов Рашид пшдзата дйызхIвахIвтI, асабиква цIхърагIара ду шдирадзауа, йанакIвызлакIгьи дшрызцIгIауа гIаликIгIатI. УахьчIвала амадырса ъанхауа хIреспублика аунашвачпагIв йшибзиру йхIватI. Ауи амадырса апны згвы аквкIта йапхьаз асабиква йазалху диплом ъарыртуа йхъа шаладухауа йхIватI, ачкIвынчва ртгIачваква амадырса йшгIацхърагIауа, арыпхьагIвчва рынхаша дара йшыршвауа гIаликIгIатI. Ари йапшу ауысква агIвычIвгIвыс йгвбайара йазынхитI, агвчIагIвра дазырбжьитI. АхIафизра йазынадзаз арат асабиква рани раби ргIапсара гьдымрыдзтI, рыхв щтIырхтI. ЙшIата ауи апш зтлакIьуа мачIыгIвпI. Исльам дин атурых, амагIны абгата йгIазгвнымгIвуа, йапшым агвымхараква динла йхъызгIвара зтахъу зджьакIы йгIарылцIла адин тшадызкIылуа лахъвахъвала йырпшитI. Ауаса ари анйара йалаз дзачIвызлакIгьи йхъа ахъазла бзирамкIва закIгьи алйымбгIауа дгIаджвылцIхтI, щардагIвы рсабиква амадырса апхьара йырщтира рмурадхатI. 
131 просмотров


Комментарии

Написать
Комментарии >
Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный