РФ а-Пенсия Фонд
КЧР-ла ахъвшара аунашвачпагIв йзаместитель
ТАМБИ Ирина ахабарргагаква рынхагIвчва ранйара апны «О внесении
изменений в отдельные
законодательные акты
Российской Федерации
по вопросам назначения
и выплаты пенсий» хабза
даквгIашIастI. Ауи йшгIалылкIгIазла, ахъачва рныбыжьла – сквш 65, апхIвысквагьи – сквш 60 йаннадзара пенсия рзыщаквдыргылырныс хабзата
йлырхтI. Ахабза мачI-мачIымцара акIвпI абзазара
йшаларжьуаш, асквш 2019
йджвыквырцIата асквш
2028 агIан йалдыргахуаштI.
Йапхъахауата ахабза
шIыц йаланакIуаштI асквш
1959 агIан ййыз ахъачви
асквш 1964 агIан ййыз
ахIвсси. Ауат асквш 2019
ауацIала сквш 60 йгьи
сквш 55 йнадзуштI. Ахабза шIыц апкъ йтата ауат
закIы-закI сквшбжа рпенсия ныбыжь йгIацылуаштI:
ахъачва – сквш 60-и цымызкIи, ахIвссагьи сквш
55-и цымызкIи йаннадзара агIан акIвпI тшпсщара
йчIвахырныс хвитнагIа
анрымазлуш. Ауи йапшу
апсахраква апенсияква
рхъыхчара хъвы йалархIара йацхърагIуштI.
Апенсияква рщаквыргылрала ахабза шIыц
тшпсщара йчIваххьаз рыхъазла псахракIгьи гьыннаршум. Ауат апхъала йырзыщаквдыргылыз асоциальна льготква йшаъу
йгIанхуштI. Асквш 2019,
январь а 1 йгIашIарышвта
йнымхауа апенсионерква
рахча процент 7,05-ла
йаладырхIуштI. Ауи дасу
йгIайгуа апенсия йгIаквхта акIвпI йшгIарпхьадзуш.
Ауи акIвымкIвагьи, асквш
2019, январь а 1 йгIашIарышвта акыт йбзазауата
акыт млыкврхIара йалата
йынхаз рпенсия ахъыхчара хъвы процент 25 рзаладырхIуштI. УахьчIвала ауат
йрапшу акъральгIвчва
хIреспубликала 2000-гIв
йнадзитI йгьи асквш 2019,
сентябрь а 1 йгIашIарышвта рпенсия хъыхчара
хъвы йалахIуштI.
Зынхара ашварагIварадара йапщылу, саби
щардагIв зму апхIвысква,
зылаква бзита йрымбауа
аныкъвадыкъваква, ауат
йырхъпшуа ран-рабачва,
зхъпшылра йацIу опекунква, ажвлара транспорт йаквчIву ашоферква,
алетчик-рхъвыхыгIвчва,
арадиация йгьи атехногенна пхаста йалашваз
акъральгIвчва пенсия йанырщтиуаш рныбыжь апхъала йшаъаз йгIанхуштI,
аныкъвадыкъваквагьи –
йара ауаса. Ауат йрыуата зынхара сквшква 37
йнадзаз йгьи сквш 42
йынхаз ахъачва гIвысквшала рыцIа паса тшпсщара йчIвахырныс хвитнагIа рымапI. ХгIвысабичва,
пщгIвысабичва зму апхIвысква хпа йгьи пщба
сквшыла рыцIа пасата
пенсия рзыщаквдыргылуаштI.
Тамби Ирина йшылхIвазла, РФ а-Пенсия
Фонд КЧР-ла ахъвшара
аъачIвагIагIвчва уахьчIвала нхара сквшщарда
змата рыцIа паса пенсия
рзыщаквыргылра атахъу
ареспублика абзазагIвчва гIадрыбергьыльитI,
ашвъаква дырхъвыхитI,
йдрытаразхитI.
Зныбыжьла пенсия
йцуш акъральгIв йзыщаквдыргылуаш ахча зъара
йнадзуш а-Пенсия Фонд
асайт «Личный кабинет»
апны дапшырныс йылшуштI. Асквш 2018, декабрь а 31 йгIашIарышвта йщаквгылу афедеральна йгьи ашIыпIа
льготквагьи тшгьырпсахуашым. Асквш 2019, январь а 1 йгIашIарышвта
«Предпенсионеры» программа анхара джвыквнацIатI. РФ а-Пенсия Фонд
асайт йазалху ахъвшара
апны акъральгIвчва зымгIвагьи ауи апрограмма
йгIацIанакIуа алкIгIараква йгьи дасу йгвы злабжу азцIгIараква рджьауапква рауаштI, ауи акIвымкIвагьи йыртахъу ашвъаквагьи электронна амальла йырзагвныргIвуаштI.
Получайте свежие новости на электронную почту
Комментарии