АХАБЗА МЫГIВХЪЫЗГАУА ДЖЬАУАП ЙДЫРКIИТI

Асквш 2019 апны Къарча-Черкес Республика апрокуратура нхарата йакIвнаршаз ажурналистква ахайыргIвазатI КЧР апрокурор ЖАРИКОВ Олег. Ауи акъральгIвчва рконституция хвитнагIаква хчара, йапшым анархараквала ачвгьахаракви амыгIвхъгаракви рабакIра йшазынхаз йауацIыхта даквчважватI. Ауи йшихIвазла, хIреспублика апны анхара хабза шдырхъйауа, агIвнабзазарта-коммунал млыквырхIара (ЖКХ) йазынарху амыгIвхъгараквала атшазынархараква алыргара, акоррупция, аэкстремизми атерроризми рабакIра гватра ду ззалырхуа анархараква йрыуапI. – Апрокурорква акоррупция абакIра йазынарху ахабза шдырхъйауа йахъпшылуата анхараква акIвдыршатI. Асквш 2019 апны ари ауысла афедеральна хабзалыхра анмыгIвхъырга гIаншарата пщынзыкь айхIа ашвъа йанырцIатI. Ауат алдыргауата актта 1400 ргIвытI, мыгIвхъгара нзыршаз ачыннкъвгагIвчва йрыуата 700-гIвы джьауап ддыркIытI. Акоррупция мыгIвхъгараква рщарда акъральыгIва, амуниципальна цхърагIараква анадыргалуаз, йапшым апкъыгIваква анырхвгIуз, акъральыгIва йгьи амуниципальна йырхъатачIвыру амлыкв, абюджет ахчаква ангIадрысабапуаз йындыршатI. КЧР апрокуратура анхагIвчва анхартатыгIвчва йындыршауа амыгIвхъгараквагьи алдыргауата нхара ду акIвдыршатI. Апрокурор рхъвыхраква рымщтахь анхара хабза анмыгIвхъырга гIаншарата 3,7 зкьы ашвъа йанырцIатI. Анхартаква йрыкву апсарчIвы ауагIа йрыртхра ахъазла апрокурорква ахабза апкъ йтата рхачIвква дырхъйитI. АпсарчIвы йауата сом мильуан 25 йгIазынхаз йрыртхтI. Анхара хабза мыгIвхъызгаз анхартатыгIвчва (105-гIвы) административна джьауап ддыркIытI, гIвыджь йырзынархата уголовна уыс гIахъыртIытI, – йхIватI апрокурор Жариков Олег. ЖКХ апынгьи амыгIвхъгараква гьмачIым. Апрокуратура анхагIвчва асквш 2019 агIан ари ауысла мыгIвхъгарата зкьы айхIа гIадрыбергьыльтI, 452-гIв административна джьауап ддыркIытI. Апрокуратура анхагIвчва абюджет хабза шдырхъйауа йахъпшылуата йгIадрыбергьльыз амыгIвхъгараквала (1,2 зкьы) актта 366 ргIвытI, 300-гIв административна джьауап ддыркIытI. КЧР апрокурор Жариков Олег йшихIвазла, апрокурорква социальна цхърагIара йазыбжу акъральгIвчва рхвитнагIаква рхчауата хабзамыгIвхъгарата 500 айхIа гIадрыбергьыльтI. – ЦхърагIара йазыбжу ауагIа рыдынхалрала амыгIвхъгараквагьи гьмачIым. Аныкъвадыкъваква нхарала йадгалра, ауат асоциальна тыдзква, аткванква, ахъвшвтйыртаква майрата йшырзгIарысабапуаш, рмашинаква ъадыргылуаш рзалхра датшагьи анархараквала апрограммаква ахабза йшгIанахIвауа апшта абзазара йшаларымжьуа щаквдыргылтI. АмыгIвхъгараквала актта 200 айхIа ргIвытI, – йхIватI Жариков Олег. Ауи датшагьи ахIаракьатчпагIвчва, аинвесторква рхвитнагIаква хчара гватра ду шазалырхуа гIаликIгIатI. Апрокурор йшихIвазла, ареспублика йгьи амуниципальна властькви ахIаракьатчпагIвчви рацынхара шакIвшауа йахъпшылуата архъвыхраква адыргалитI. АнгIалрала акъральыгIва атахъыраква зырхъйауа ахIаракьатчпагIвчва рхвитнагIаква анмыгIвхъыргара апрокурорква амыгIвхъгараква алдыргара атахъхитI. Асквш 2019 апны апрокурорква рцхърагIарала ахIаракьатчпагIвчва йрыртхра атахъыз апсарчIвы йауата сом мильуан 260 ддыршвахтI, юридическIа хъата зму йгьи ахъатачIв хIаракьатчпагIвчва йырзынархата швхIаусыгIвадъа йакIвдыршауа архъвыхраква йрылдзгIатI. Асквш 2019 апны КЧР апрокуратура анхара йшгIанарбазла, апрокурорква йрызхъазцIауа, ауат тшырзыназырхауа ауагIа рпхьадзара йалахIитI. Асквш 2018 ацкIыс цIыпх асквш ауацIа апрокурорква йрынйаз рыцIа йщардапI, 1700-гIв райхIа ртшазынархараква йрылапштI, юридическIа цхърагIара ддрадзатI. Жариков Олег йшихIвазла, асквш 2020 апынгьи апрокурорква йрыхъвдакву ахачIвква дырхъйауата ркъаруква йыгьрайгьдзушым. АкъральгIвчва рызгIвадарахчара йазынхауа рхъвдаквцIараква шдырхъйауа хъпшылра ахъцIара, збальыгъ йнамдзас асабиква рхвитнагIаква хчара, хъпшылыгIвдъа йгIанхаз гIвнабзазартала йшадыргалуа датшагьи анархараква гватра рзалырхуаштI. Апрокурор дангIачважва амщтахь ажурналистква разцIгIараква джьауап риттI.