АКЬАНГЬАШРА КОМИССИЯ АЛАЧIВАРА ДАЛАН

Петербург а-Дуней экономика форум апны РФ а-Президент й-Администрация аунашвачпагIв йапхъахауа йзаместитель КИРИЕНКО Сергей йакIвйыршаз РФ а-Госсовет Акьангьашра комиссия алачIвара далан КЧР а-Хъада ТЕМРЕЗОВ Рашид. Ауи асубъектква рбюджетква рылшараква гIарпхьадзауата ауагIахъа проектква рырхъйара йазынархан. Темрезов Рашид йшгIаликIгIазла, хIызту асквш угIалагата уагIахъа проектта жваба рырхъйарала йлырхыз афедеральна программа 43 Къарча-Черкесгьи рылапI. Апрограммаква рфайда рылархIвахьатI. Араса ареспублика апны сабита йгIадриуа йрылахIара ахъазла йапхъахауа саби дзауыз атгIачваква ахча рзалырхитI, физкультура-згIвадарарыбагъьара комплекс ауыхвара джвыквырцIатI, амедицина нхартаква асертификатква рыртра ахъазла анхараква акIвшитI датшагьи. «ЙшварагIварам йгьи знадзара хIагIу амгIваква» уагIахъа проект апкъ йтата Черкесск апны амгIваква йрыладырхIитI, ахабза атахъыраква йрыквдыргIапситI, афедеральна мгIваквагьи гIаланакIуата авидеоргIапсгаква андыргIалитI, датшагьи анхараква акIвдыршитI. Къарча-Черкес апны агвы, ащацагаква йырпщылу азгIваква ршвхIаусыгIвала адуней зхIваджьуа йрылдзгIара ахъазла анхараква джвыквырцIатI, асабиква рыхъазла ауыжвгIанчIви айъазартаква гIандыршитI, арак згIва йаламшыкIьскIва йгIарыбергьыльра гватра ду азалырхитI. «Арыпхьара» уагIахъа проект апкъ йтата ареспублика абзазагIвчва рдырраква йрылазырхIауа апхьартаква гIандыршитI, асабиква рыхъазла арыпхьара тыпква йрыладырхIитI. – Россия а-Президент Путин Владимир йхIызйыргылыз ахачIвква рмагIны гIапхьадзахауата хIызту асквш йгьи йгIайуа ацба-жваба сквшквала хIбюджет апны асоциальна уысква йырзалхчIву ахчаква йрылахIалуштI, – йгIаликIгIатI Темрезов Рашид. – Ауи ахIатырла абюджет акврыдзраква рпны йхъаду хIаталапшхуаштI, йгIарысабапхауа ахча афайда йшалахIырхIуш хIащтазлуштI.