Архыз тшпсщарта апны
асквшква 2018–2019
рагIан агъны гIамта йшазыхIазыру
йазынархаз алачIвара
йалан акъральгIв
хъахчарала, агвжважвагIва
аъащаквала йгьи апхастаква
рцIыхъватшараква
рыдзрала РФ аминистр
ЗИНИЧЕВ Евгений,
СКФО-ла РФ а-Президент
йгIащтийыгIв МАТОВНИКОВ
Александр,
КЧР а-Хъада ТЕМРЕЗОВ
Рашид, КБР а-Хъада
КIВАКIВА КIазбек,
КЧР АуагIа Айззара (а-Парламент)
а-Председатель
ИВАНОВ Александр,
КЧР а-Правительства анхагIвчва,
Россия МЧС
КЧР-ла а-Унашвачпарта
знапIыцIу, «Курорты Северного
Кавказа» компания
аунашвачпагIвчва.
АлачIвара йалаз хIышта
атшпсщартаква рпны
атурист йгьи ащхъа тларыджа
инфраструктура тшауацIдрыхра,
амедицина
цхърагIара адгалра йрыквчважватI,
атшпсщагIвчва
ршварагIварадара йалкIгIу
гватра азалырхтI.
Матовников Александр
йгIачважвара апны йшгIаликIгIазла,
къраль щарда
рбюджет ахъазла атуризм
йрызгIанагуа хъахIара
бзипI.
– Лагъь КIавкIаз аштаква
рпсабара аъащала,
ашIыпIаква рпшдзарала
агIвымакъральква
йыгьгIархьшвум, – йхIватI
Матовников Александр. –
Аштаква рпсабара аъаща
ащхъа тларыджа туризм
йаквыргIапспI, асы
анадзара хIагIапI, йыгьратуам,
ащхъаква рпны ахьта
тшгIауыланарпауата
йгьаъам. Ауаса агъын туризм
тшауацIнахра ахъазла
ауи гьнахъум, агъын
тшпсщара индустрия гIаныршара
атахъыпI. Ауи
агIан акIвпI атуризм аэкономика
злащаквгылу ахъвшараква
йанрыланакIуаш.
Ауи РФ а-Президент
Путин Владимир йхъвдаквцIарала
СКФО аштаква
рпны асквш 2021-дза агъын
тшпсщартаква ъаныргIалу
Лагъь КIавкIаз апны
йатахъу инфраструктура
гIаныршарала проект ду
абзазара йшаларжьуа айззара
йалаз йгIадйыргвалашвахтI.
– Лагъь КIавкIаз атшпсщартаква
рпны Архыз
йгьи Домбай рмагIаны
дупI, – йхIватI Матовников
Александр. – КъарчаЧеркес
ашта апны щъагIвта
уъагIамдуш, уыла ъауырпшуаш
аштаква 80 йайхIапI,
ащхъа тларыджа йхънахуа
гIванла йъарылахIаз
ахъазла асасыртаква
уыхвара, атурист инфраструктура
тшауацIнарыхра
шатахъу хIазнархъвыцитI.
КЧР а-Хъада Темрезов
Рашид йгIачважвара
апны хIреспублика ахъазла
атуризм тшауацIнарыхра
магIын ду шаму гIаликIгIатI.
– ЙцIыхъвахауа ахвысквша
Къарча-Черкес атшпсщартаква
йгIайуа сквшыкI
апны 1,2 мильуаныгIв йнадзитI,
– йхIватI КЧР а-Хъада.
– Домбай йгьи Теберда
зтурых бергьльу тшпсщартапI,
Архыз уахьчIва тшауацIнахитI.
РФ а-Правительства,
«Курорты Северного
Кавказа» компания
аунашвачпагIвчва ащхъа
тларыджа инфраструктура
тшауацIнарыхра джьгарта
йъацыркIуа ахъазла
хIырзыразпI. АтшпсщагIвчва
йъарылахIауа йгIалцIла
агъын тшпсщара гIамта
тшазадгалра йхъаду
ахачIвква йрыуапI. Ауи
ахъазла КЧР-ла МЧС, ауацIа
уысквала аорганква,
«Росавтодор» ацынхара
рызбжьапI. УахьчIвала Къарча-Черкес
атшпсщартаква
асквшква 2018–2019
рагIан ащхъа тларыджа
гIамта йшазыхIазыру хIзыхIвуштI.
Темрезов Рашид гвыпла
тшпсщара йгIайуа зымгIвагьи
ашвъа йанырцIаларныс
ажванахъа гIайгтI.
Россия МЧС аминистр
йзаместитель йхъвдаквцIараква
зырхъйауа Яцуценко
Виктор ареспублика
атшпсщартаква рпны
ахчагIвчва гвыпква бзита
йшынхауа гIайхIватI, ауаса
ахчара йазынамдзауата
апхаста гIашIакIра
магIны шаму гIаликIгIатI.
АлачIвара алдыргауата
акъральгIв хъахчарала,
агвжважвагIва аъащаквала
йгьи апхастаква
рцIыхъватшараква рыдзрала
РФ аминистр Зиничев
Евгений атшпсщагIвчва
ршварагIварадара адгалрала
ахъвдаквцIараква
йчпатI.
Получайте свежие новости на электронную почту
Комментарии