СКФО Преимущества покупки пластиковой сетки у OPT Relation СКФО 1. Технические характеристики, сертификация продукции и регистрация технических характеристик СКФО В республиках СКФО на 61% вырос спрос на образование с господдержкой СКФО В Ставрополе состоится общегородская зарядка   СКФО Дагестан создаст аналог зарубежных курортов

«АГIАРБАРА ХIАГIАКВА ХIЫРЗАБАКIУАШТI»

09.09.2020 127
«АГIАРБАРА ХIАГIАКВА ХIЫРЗАБАКIУАШТI»
КЧР а-Правительства Тдзы апны август а 26 апхьара сквш шIыц йапылуата йакIвшаз арыпхьагIвчва райззара йалан арыпхьарала РФ а-Министерства архъвыхра уысквала а-Департамент адиректор РОМАНОВА Тамара, КЧР а-Правительства а-Председатель йапхъахауа йзаместитель ТАМБИ Руслан, наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель ГАНШИН Алексей, хIреспублика арыпхьагIвчва рпрофсоюз организация аунашвачпагIв БЕСЛЕНЕЕВ Мурадин, арыпхьарали наукали КЧР а-Министерства Ажвлара совет унашва ахъызцIауа ЖДАНОВ Геннадий, а-Министерства анхагIвчва, арыпхьара аветеранква, агородкви арайонкви арыпхъарала рхъвшараква йгьи арыпхьара нхартаква рунашвачпагIвчва. КЧР а-Правительства а-Председатель йапхъахауа йзаместитель Тамби Руслан алачIвара йалаз тшырзынайырхауата йгIаргванхауа апхьара сквш шIыцла пхата драйхIвахIвтI йгьи коронавирус ашIашкIгIара тшауацIнамхра ахъазла амальта йнахвчIву зымгIва рапхьартаква аздрыхIазырырныс тшырзынайырхатI. – СынчIва йгIаджвыквлыз азгIва шIыц арыпхьара уысква псахра рыланацIазтынгьи, арыпхьагIвчвагьи апхьагIвчвагьи ауи йапшIагылырныс рылшатI. Асабиква апхьара программа йгIахьымшварныс ахъазла тшдрыгIапсатI. Сентябрь а 1 йапхъахауа акласс йыцIалуаш йгьи й-11-хауа акласс йцуш апхьагIвчва ргвы йгIатахауата гвыргъьахъв дута йакIвыршара атахъыпI. Ауаса «Роспотребнадзор» аунашваква швырхъйарныс шшвборчу швхъшвымраштылын, асабиквагьи рхъа рхчара шатахъу рлымхIа йтышвымхын, – йхIватI Тамби Руслан. Арыпхьарала РФ а-Министерства а-Департамент адиректор Романова Тамара арыпхьарала РФ аминистр Кравцов Сергей йажваква гIарылалхIватI: «ХIкъраль апны арыпхьара шабгу электронна амаль зынгьи йгьазцушым. Ауи акIвызтIхIва, дистанция амальла арыпхьара ъадзакIвшуз азаман ауацIа аинтернет технологияква ргIарысабапрала йшвырхIаз ашвапха амагIны дупI. Арыпхьарала РФ а-Министерства йаргылуа ахачIв хъадаква йрыуапI арыпхьагIвчва дасугьи йапхьара сахIатипхьадза рпны знадзара хIагIу арыпхьара квпшыраква гIадрысабапырныс». Йшбергьльу апшта, КЧР а-Хъада Темрезов Рашид йунашвала хIреспублика апны асквш 2020 арыпхьара йа-СквшпI. Ауи апкъ йтата хIышта аунашвачпагIв арыпхьара ргIапсща атшауацIыхрала ахачIвква зымгIва апхьагIвчва знадзара хIагIу дырра рытра йазынархапI. УахьчIвала КЧР-ла арыпхьара программа архъйара бзита йацхърагIитI ауагIахъа проектква. Арыпхьарали наукали КЧР аминистр КРАВЧЕНКО Инна хIышта апны арыпхьарала псахрата йыншуш гIалхIватI. «Демография» уагIахъа проект апкъ йтата асквш 2021-дза асабигIзартаква рпны ужвыгьи тыпта 1080 гIаншуштI, 14 апхьартакI абзазара йаларжьуаштI. – «Арыпхьара» уагIахъа проект апкъ йтата «Саби зму атгIачваква цхърагIара драдзара» федеральна проектла асквш 2024-дза анабачви асабикви психология, педагогика йгьи кьангьашра цхърагIара рзадгалра атахъыпI. Асквш 2021-дза кьангьашра цхърагIара дызрадзауа амуниципальна хъвшараква гIахъхIтIуаштI. УахьчIвала хIреспублика ауацIала ауи апш квтата хпа дахIврала йынхитI, анабачва ауат рпны кьангьашрата йддрадзаз зыкь 70 йайхIапI. Анабачва йгьи асабиква рхвитнагIаква шырхчуш йахадыргIвазитI, арыпхьара уысквала баргвырата йзынйауа йшгIарылсуашла акьангьашраква ддрадзитI. Аквтанай апхьартаква рпны арыпхьара ргIапсщагьи апсахраква гIалалуаштI. РыцIа хъгалра рымазлуштI «УыжвгIанчIви апхьарта», «АпхьагIвипхьадза йдахIвраква», «Саби зму атгIачваква йрыцкIра» шIыпIа проектква. «Арыпхьара» уагIахъа проект абзирала хIышта апны апхьарта шIыцква руыхвитI, ауат рымлыкв-техника щата багъьахитI, акытква рпны аспортзалква дырчIаджьитI, зызгIвадара лшараква ахъарысу асабиква йызларыдынхалуа аргIапсгаква йрылахIитI. Ауи йахъазымкIва, ауагIахъа проект асабиква кьазукIта йапхьауата йхIыргIапсырныс хIылнаршитI. Ауат зымгIва арыпхьара анадзара щтIыхра йацхърагIитI. Ауи апшта, сынчIва апхьарта йгIалгаз йрыуата 336-гIв «За особые успехи в учении» медальква рквнадыргатI, 27-гIв апредмет кIьыдаквала рбаллква 100 йнадзатI (асквш 2017 агIан балл 100 змаз хгIвы ракIвын, асквш 2018 – хвгIвы, асквш 2019 – 14-гIв). Арат агIарбараква гьгвымхам, хIапхъахьыла ауат рыцIагьи йшрылахIуш хIазынхара атахъыпI, – йылрыбагъьатI аминистр. Ауи йшгIалылкIгIазла, хIреспублика апхьагIвчва заджвгьи йшгIайхьымшвауа гIадырцIабыргра ахъазла асквш 2022 агIан аматематика йгьи анаука гIальма тшауацIдрыхра йазынарху – PISA дуней рхъвыхра йалалуаштI. Ауи агIарбараквала РФ йагъьу ажвасубъекткI йрылашварныс йгвыгъитI. Кравченко Инна йшгIалхIвазла, асквш 2021-дза хIреспубликала кыт апхьартата 72 рпны «Точка роста» квтаква гIахъыртIуаштI. Асквш 2019 угIалагата ауат рапш квтата 19 гIандыршатI, ари асквш ацIыхъвадза 42 гIахъыртIуаштI. Ауат рпны апхьагIвчва ауыжвгIанчIви технология гIадрысабапуата йадрыпхьуштI. ХIызту асквш ацIыхъвадза афедеральна бюджет субсидията йгIаунащтызла «Кванториум» технопарк анхара джвыквылуаштI. Асквш 2020 ацIыхъвадза ужвыгьи гIвтехнопарккI, дырра цIола зму асабиква рыхъазла «Сириус» арыпхьара Квта йашIырпшу аквтаква гIандыршуштI. Аминистр коронавирус згIва ашвхIаусыгIвала йгIаншаз абаргвыраквагьи дрыквгIашIастI. ЙшылхIвазла, апхьагIвчвата зыкь 53-гIв рапхьара онлайн джыпха йтагылата йакIвшатI. АрыпхьагIвчвагьи, апхьагIвчвагьи, ан-абачвагьи ауи арыпхьара квпшыра дахIврала йдырхъйатI. – Адистанция апхьара апхьарта магIныта йаму йгьи швынхара ахв зымгIвагьи йгIаргвыннаргIвытI. АрыпхьагIв йгIапсара датшата йапшуа йачпатI, – йгIалылкIгIатI аминистр. Ауи арыпхьагIвчва ръачIвагIадырра йалархIара йазынарху «Учитель будущего», «Земский учитель», «Молодые профессионалы» федеральна проектква хIреспублика апынгьи дахIврала абзазара йшаларжьуа гIалхIватI. ЙшгIалылкIгIазла, адуней ауацIала йщаквгылу арыпхьара джыпхаква йрыквыргIапсу акадрква рыхIазырра магIын ду амапI. Йауа ухIварыквын, уахьчIва апхьарта йыцIалуаш асабиква ауи йгIалгандзыкIьара адуней тшапсахуаштI, ауат рылшараквагьи ртахъыраквагьи датшазлуштI, апхъаламгIвайсра бзазара йазызрыхIазыруаш арыпхьагIвчва ръачIвагIадыррагьи датша квпшырапI йамазлуш. Асквш 2020, июль а 21 Россия а-Президент мачвы зцIайцIаз «О национальных целях развития на период до 2030 года» а-Унашва апны йгIарбу астратегия хачIвква йрыуапI Россия арыпхьара анадзарала йагъьу ажвакъралькI йрыланакIра. Ауи ахъазла апхьагIв дъабзазалакIгьи, дъапхьалакIгьи знадзара хIагIу дырра цIола йаура атахъыпI. – Щарда хIчпарныс хIылшатI, ауаса ужвыгьи хIыздынхалра атахъу ауыскви абаргвыракви шаъу бзита йгIахIгвынгIвитI. АгIарбара хIагIаква хIырзынадзара ахъазла ахачIвква зымгIва хIырхъйарныс йхIыхъвдаквпI. Апхьара сквш шIыц апны адахIвракви адырра гIарбара бзикви швымазтI, – драйхIвахIвтI Кравченко Инна арыпхьагIвчва. Ари атшын сквшщарда руацIа рамайчра нхара йгьи рдахIвра бзиква рыхъазла «Россия Федерацияла ЧIахIра зму арыпхьари абжьари рынхагIвы» гвплацIа рквнадыргатI ОрджоникидзевскIа квтанай апхьарта адиректор йзаместитель БАЙРАМУКОВА Заида Бородин йпхIа, ЭркеншахIар квтанай апхьарта арыпхьагIв ХАДЖИМОВА Валентина Мхвтар йпхIа, «Полет» Черкесск город й-37-хауа асабигIзарта аунашвачпагIв лзаместитель КIАМ Оксана Владимир йпхIа. Арыпхьарала РФ а-Министерства а-ЧIахIра ртшхъвага йанкъвгагIвхатI Зеленчук станица й-1-хауа аквтанай апхьарта арыпхьагIв ЗАВЕРЗА Светлана Виктор йпхIа, ХIабаз квтанай апхьарта адиректор лзаместитель КЪВАПСЫРГЬАН ФатIима АхIмад йпхIа, ПервомайскIа кыт й-6-хауа квтанай апхьарта адиректор ХАПЧАЕВ Али Магомет йпа. ПщгIвы КЧР а-Правительства, гIвыджь арыпхьарали наукали КЧР а-Министерства рыртшхъвагаква рквнадыргатI. КЧР АуагIа Айззара (а-Парламент) а-ЧIахIра ртшхъвага гIазыртыз дрылапI ЙынджьыгьчкIвын квтанай апхьарта арыпхьагIв ДЖЬАНТЕМЫР Нури Фуъад йпа. АлачIвара йалаз арыпхьарала РФ аминистр Кравцов Сергей онлайн амальла йачважварныс рылшатI.
127 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный