«АГIАПЫН ХIВРАПШДЗАКВА ЙЫРГIВЫЗАПI»

АпхIвысква рдуней Мшы йапылуата Черкесск город йаныргIалу акультура Тдзы йдрайгваз Абашта айсра Ду аветеранква, атыл анхагIвчва, саби зщарду анчва, нхарала адахIвраква зму ахIвсса КЧР а-Хъада ТЕМРЕЗОВ Рашид пхата драйхIвахIвтI. АхIвсса пIатIу шрыквырцIауа гIадырбауата ачIахIра айззара йалан КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства а-Председатель УАЗ Аслан, аминистрква, агородкви арайонкви радминистрацияква рхъадаква. – МартI а 8 – хвду ззыгIбауа апхIвысква хIанрайхIвахIвуа, асогIаква анрыхIтуа гвыргъьахъвпI. Швара бзазара гIахIышвтитI, анхара апны швгIахIыцIагылитI, агвыргъьахъвква рагIан хIшврыпшдзитI. Ахъачва швгIархьымшвауата йапшым ауысква швырхъйитI, хIреспублика, хIкъраль ртшауацIыхра къару ду алашвцIитI. Анаука, аршIыйара, азъазара, аспорт рпны швгIатгараква хIхъа аладута хIрыквчважвитI, хIшвызхIвахIвитI. Абашта айсра Ду апны АйгIайра асквш 75 йазынарху ахъмаштылри ачIахIри ры-Сквш апны анамыцаква йырпшIагылата фырра гIазырбаз айсыгIвчва ранчва, афронт йпшцIаз апхIвысква анцIрала ахъмаштылра йалазлуштI. Ауат ршвапхала чкIвыныргIа хъацIара, чхIара рылата, р-Псадгьыл йазцIабыргта йгIадзынгылитI. Адуней ъашврыпшдзауа, рахIа йгвапата йъашвчпауа ахъазла пIатIу швыквхIцIитI. Швпшдзарала ахъачва йхIаракIу агIатгараква йрызшвыргвышхвитI, насыпта йаъу швара йшвпщылапI. ХIанчва швылаква ангвыргъьауа, швнашхква анлашару хIгвы йазхIитI, йгьи швара хIъашвсабийу швабыжта хIгвыргъьитI, – хIва йгIайззаз тшырзынайырхатI Темрезов Рашид. Ауи айззара йгIадрайгваз Абашта айсра Ду аветеранква, атыл анхагIвчва «Асквшква 1941–1945 рагIан Абашта айсра Ду апны АйгIайра асквш 75» юбилей медальква риттI. Россия а-Президент Путин Владимир йгIаджвыквцIарала аюбилей медальква зыртыз дрыуапI Абаза район, ЙынджьыгьчкIвын кыт абзазагIв, атыл анхагIвы ЦЕКЪВА Фатка Ильас йпхIа. АпхIвысква рдуней Мшы йазынархаз агвыргъьахъв концерт апны ЭркеншахIар поселок йауу зхъахIара мачIу атгIачваква рсабиква, хъпшылыгIвдъа йгIанхаз, аныаба змам асабиква анчва рпхара, рпшкара йгIарыквчважвауа ауысаква йгIарыпхьатI. ХIреспублика ашвахIвагIвчва, аршIыйагIвчва гвыпква дугьи хвыцгьи рнашхква гIащтIырхтI. Ари атшын айззара йдрайгваз зымгIва акультура Тдзы анашылырта апны КЧР а-Хъада Темрезов Рашид йыхьызла ахIврапшдзаква рыцта ахIвахIвра зну открыткIаква рырттI.