АГIАХIВРА ЗБЗАЗАРА ЙАХЪВХАЗ АРШIЫЙАГIВ

Черкесск город асаби ршIыйара апхьарта апны йгIаныршу «Конфетти» гIахIвыгIвчва гвып рхабар бзирала йгауищтара щарда цIитI. Ауи аунашвачпагIв НОВОСЕЛЬЦЕВА Ольга Николай йпхIа зуыс йазъазу йгьи бзидздза йызбауа дъачIвагIагIвпI. Ольга Николай йпхIа Хабаровск край йаланакIуа йдучвам Николаевск– на-Амуре город апны дйытI. Апхьарта дапхьаркIвауата Ольга агIахIвра дхънахуан йгьи асаби ршIыйара Тдзы апны йаныргIалыз акружок дцун. Ауи лцри город адрамтеатр апны йакIвшаз «Розовые туфельки» балет далатагьи дгIахъвмартI. АгIахIвра швабыжта бзи йызбуз апхIвыспа жвкласскI дангIарылга Донецк йаныргIалыз ахореография училища дыцIалырныс мурадта йылкIытI. Ауаса, аучилища жвизкласскI йгIарылгаз ракIвын йнарахвуаз. Ольга Къарча-Черкес астолица Черкесск город апны йылтахъу апш ъачIвагIа гIацIгарта шаныргIалу ахабар лагIатI. АпхIвыспа лани лаби ауаъа дырщтийырныс йадлыргылтI. Даргьи йырчвыхъару КIавкIазла дауырщтырныс гвы рчпатI. Ольга лыгIвза Скрябина Ира лабагьи дрыцта ахIвсса апхьара Черкесск йгIайтI. Ауат акультури азъазари ручилища апны ахореограф ъаза Балаенков Алексей Семен йпа йапхъахауата йадикIылыз агвып йрылашватI. Ольга ауи агIан лычвагьи лпхызгьи йгьаламызтI сквшквакI анцIра ларыпхьагIв йыхьыз зхъу анкъвакъвраква рпны дыздынхалуа асабиква йызнымкIва йагъьта тшгIадырбушта. Новосельцева Ольга аучилища дангIалга, асквш 1973 агIан сквшыкI «Эльбрус» ансамбль дрылата дгIахIвытI. Ауи амщтахь Черкесск арыхьшвашвага ъамапсымаква рзавод акультура Тдзы апны дынхауа йджвыквылцIатI. Ауи йхIаракIу ъачIвагIа гIацIгартакI дыцIалырныс лмурадын, ауаса лылахь гIацIцIын, унагIва даннашыл амщтахь, зджьарагьи дымцахуата анцIрала Черкесск город лбзазартахатI. Ольга лгвымчIвара йаквшахIатта акультура Тдзы апны лхъвдаквцIараква йрыцта педучилища астудентква дрыдынхалуан, Псыжв кыт «Абазинка» ансамбль апынгьи дгIахIвуан. Апсахраква рымщтахь асквш 2006 агIан Ольга Николай йпхIа Черкесск асаби ршIыйара апхьарта нхара ддрайгватI. Ауаъа «Сувенир» ансамбль йрылата «Конфетти» зхьзу айцIбачва ргвып гIанлыршан дамайчуата дрыдынхалуа йджвыквылцIатI. УахьчIвала Ольга Николай йпхIа асаби ршIыйара апхьарта ахореография хъвшара унашва ахъылцIитI. – Цысквша йырту рпны йгIашIарышвта агород асабиква хIапхьарта йгIацIалитI. Ауат агIсквша руацIа йахIрыпхьитI, йапшым агIахIвыщаква йырзыгIбжьитI, – лхIвитI аъачIвагIагIв. Ахореограф ауагIахъа гIахIвыщаква рыцIа бзи йылбитI, «Казачий танец», «Тарантелла», йапшым аполька квпшыраква дара асабиквагьи йыргвапхитI. Апхьарта адиректор Братова Лейла йшылхIвауала Ольга Николай йпхIа ршIыйара злу дъачIвагIагIв гвымчIвапI. – Ауи йгIанлыршаз ахореография гвып хIхъа рыладухауата йапшым анкъвакъвраква рпны йанакIвызлакIгьи бзита тшгIадырбитI. Асквш 2016 агIан Невинномысск город апны йакIвшаз «Звездная волна» фестиваль апны йапхъахауа степень диплом гIарквнадыргатI. Асквш 2018 ауацIалагьи йызнымкIва ргIатгараквала хIдыргвыргъьатI. Ессентуки йакIвшаз «Планета звезд» анкъвакъвра апынгьи «Конфетти» гIахIвыгIвчва гвып Гран-при рымата йгIайхтI, – йгIалылкIгIатI апхьарта аунашвачпагIв. Новосельцева Ольга Николай йпхIа дыздынхалуа агIахIвыгIвчва гвып ргIатгараква ужвыгьи йгIашIупхьадза ауаштI. АъачIвагIагIв лгвымчIвари ламайчри йаргвышхвауа асабиква даргьи анцIрала агIахIвра бзи йдлырбатI.