АФЫРРА ЩТАДЪА ЙГЬЫДЗУАМ

Байрамыкъва Халимат лыхьыз зхъу ареспублика библиотека апны «Абазашта – сышта цри» зхьзыз абаза литератури азъазари рымчыбыжь гІахъыртІытІ. Ауи АйгІайра асквш 75 йазынархата йадыргалтІ. Ахъвлапын йалан культурала КЧР аминистр йзаместитель ХАБОВ Алхаз, Къарча-Черкес АуагІа Айззара (а-Парламент) регламентла, амандат йгьи ахабарргагаква руысквала акомитет апредседатель БЫДЖЬ Исмель, агІвгІвчва, апхьахьаква, ажвлара уыснкъвгагІвчва, ахабарргагаква рынхагІвчва, «Полиглот» колледж йгьи Къвбина кыт аквтанай апхьарта апхьагІвчва, абаза театр анхагІвчва. Абиблиотека афойе апны йадыргалыз «Из сокровищницы абазинской культуры» гІарбара акнига джьащахъваквали АйгІайра амш йазынархата йапшым асквшква рагІан йгІацІцІыз «Абазашта» газет аномерквала йалан. Ахъвлапын йгІадгылыз асасчва йрымаджьащахъвата ауи тшахадыргІвазатІ. Анйара ъакІвшуз азал апынгьи асквш 2020 ауацІала, йызюбилейу абаза уысагІвчви агІвгІвчви ргІацІщтраква, ажурналист-фронтовикква ркнигаква, Къарча-Черкес Республикала гІатгара зму асуратчпагІв Хъибльахь Зоя йгьи ауи лпа Хъибльахь Азамат, асуратчпагІв ХІашвцІа Эдуард рсуратква аныргІалын. Асасчва тшырзынайырхауата дгІачважватІ Хабов Алхаз. Ауи йшгІаликІгІазла, ансисквша ареспублика библиотека апны йадыргалуа ауысква хІхаквлагІвчва зымгІва рыхъазлагьи магІын ду рымапІ, йалкІгІата йгІадзынгылуа чкІвыныргІа рыхъазла. АуысагІв Щыбзыхва Лариса ауыжвгІанчIви абаза литература аъащата йызту йгьи хІапхъахьыла ауи атшауацІнарыхрала амальква дрыквгІашІастІ. Ауи ахІбачва ртынхараква гватрата йрызхІыму йалархІара йгьи алитератор шІаква йрыцкІрала архъйачIвква гІалылкІгІатІ, КЧР агІвгІвчва р-Союз ачІахІра грамотаква агІвгІвчви ауысагІвчви йырквналыргатІ. «У подвига есть имена: абазинские писатели, поэты, журналисты – участники Великой Отечественной войны» электронна презентация абиблиотека аъачІвагІагІв Ласкова Наталья йакІвлыршатІ. Зкъальам щтIазцІата з-Абашта йазгылыз Джыр ХІамид, Мгваджьыкъва Абдул, МалхІваз Мурадин, Агырба Джьамльадин, Ерыжв Умар, Тобыль ИсмагІиль, ХІачвыкъва ЗамахІщари, Этлыхв Адыльгьари, Цекъва Пасарби, КІвыдж ШахІым рынцІра-бзазараква йауацІыхта дрыквгІашІастІ. «Алашара» адкІылара аъачІвагІагІв, КъарчаЧеркес Республикала гІатгара зму ажурналист ЧкІала Георгий Абашта айсра Ду йалаз абазаква рхъмаштылра йазынархата уыста йадыргалыз йгьи «Подвиг героев Абазашты» книга шгІацІырщтыз даквгІашІастІ. Ауи йшихІвазла, уахьчІвала акнига йалайырхІата, рыцІа йауацІыхта агІацІщтра дадынхалитІ. Къарча-Черкес Республикала гІатгара зму ажурналист, «Абазашта» газет аредактор хъада Къвыл Фардауыс абазаква ртурых, ркультура, рыбызшва рхчарала агазет магІныта йаму даквгІашІастІ. – Абашта айсра Ду агІан совет уагІахъа йгІатыргаз АйгІайра йазынархата «Айсра асабиква» рубрика агазет йгІатахІцІалитІ. Абаза кытква йыртыцІта анамыца фашистква йырпшІагылаз рыхьызква зну «ХІпсадгьыл гІазхчаз квырмыш рзыхІчпитІ» книга хІадынхалын, АйгІайра асквш 70 йапылуата «Алашара» адкІылара апрезидент Эгьзакь Мусса йцхърагIарала йгІацІцІтІ. АйгІайра асквш 75 йапылуата «Хъмаштылра полк» книга аэлектронна вариант хІрыхІазыртІ, «ЙыгьхІхъмаштылтІ, хІрыладухитІ» рубрика йацІата гІвыра щарда агазет йгІанылитІ. АйгІайра амш йазынархата ПервомайскIа урам апны йадыргалуа астендква аредакция йынхаз айсра аветеранква, агІвгІвчва-фронтовикква йырзынархугьи рылапІ. Араъа кІьыдата абиблиотека анхагІвчва ауагIахъаква рмамыр ащтаныкъвара рыбагъьарала, чкІвыныргІа рпатриот бжьарала уыста йадыргалуа хвы шаквцІауачву гІалскІгІара стахъыпІ. АъачІвагІагІвчва зымгІвагьи АлахІ дшвзыразхатІ, – лхІватІ Къвыл Фардауыс. Анйара йалаз аршІыйагІвчва Йуан ГІалиса, Аджьбакь ХІаджьисмель, Апса ФатІимат, Щыбзыхва Лариса руысаква Къвбина квтанай апхьарта апхьагІвчва йгІарыпхьатІ, арыпхьагІвчва Дагвжвей ФатІима лгІачважвара йгьи ХІасарокъва Людмила йылхIваз ашва анйара йалаз йыргвапхатІ. НапІасра дула йнардастІ абаза театр анхагІвчва Хвыжь Людмили Ныр Мурадини рашваква. Щарда мцІуата зуысаква разкІкІра гІацІцІыз Чамба Нателла ажваквагьи амакъымгьи лара йылчІвыта йылхІваз «Афыр йызцауата» амагІны шцІолу зымгІвагьи йрылархІватІ. Афилология наукаква ркандидат ХІасарокъва Бильаль Цекъва Пасарби йашва «Чвахъабага» йгьи «Белорусский вокзал» фильм йалу «Нам нужна одна Победа» ашва абаза бызшвала йанихІвуз азал йчІваз зымгІвагьи йацыркІтІ. Абаза литератури азъазари йырзынархаз ахъвлапын апны уыс бзи щарда йрыквчважватІ. Ауи йапшу анйараква щтадъа йгьыдзуам.