Актуально В КЧР проводят проверку по факту наезда на малолетнего ребенка на электромобиле СКФО В Ставрополе 20 июля пройдут две ярмарки СКФО В Дагестане до конца года планируют достроить 40 объектов водоснабжения СКФО Годовая инфляция в Чечне в июне ускорилась до 7,7% СКФО В Ингушетии борются с загрязнением реки Назранка

АФЫРРА ХIАНСИМШ УЫСКВА ШВАГАТА ЙЫРЗАЛИТI

20.05.2019 261
АФЫРРА ХIАНСИМШ УЫСКВА ШВАГАТА ЙЫРЗАЛИТI
ЙымгIвайситI азаман. РыцIа-рыцIа йхъарахитI Абашта айсра Ду асквшква, ймачIыгIвдзахитI амамыри ахъахвитри хIзыгIазхчаз айсыгIвчва рсатырква... Ауаса АйгIайра абаракъ щтIызхыз, фырта зхъа щтIазцIаз рыхьызква анцIрала атурых йалазлуштI. Абанпараква тшырпсахитI, ауаса айсра гIаздсылыз унагIвипхьадза дара рфырква рыхьызква хIагIата йщтIырхитI, xI-Псадгьыл апачва рхабар йрыщтагIайуа йырзырхчитI. Кытипхьадза рпны афронт йпшцIалыз рыхьызква зну ачвахъабагаква тагылапI, апхьартаква рпны амузейква гIаныршапI, афырква рыхьызква аурамква йынкъвыргитI, айсра ажьыхьыдара гIахъызтIуа йапшым акнигакви афильмкви щардапI. Ауаса зымгIва рацкIыс йтлапIапI Абашта айсра Ду йалаз ргIахIвахраква, зчкIвынхъа айсра йчвнарбблыз ргIагвалашвахраква. Сквш 74 цIитI амамыр гIатыргищтара, ауаса уахьчIвала зныкI йайщчвата йырпхьадзуз аукраинеци аурышви апшIадыргылтI, йыгьтынчым датша шIыпIаквакI рпынгьи. АйгIайра ахъазла зхъа щтIазцIаз амильуан 27-гIв ргврымбыжь рлымхIа йыгьтымггIума айсра шIыцква ацIызхъиуа аполитикква? Рпхызква йыгьгIарыламлума аконцлагерьква йтархъвараз рлактаква, амла йагаз асабиква, зкьпхьадзарала йалагылу айщчва нышвынтараква? Атурых ацазкIра змураду аполитика судагьарква ацIабырг гьырзыптшуашым. Россия акъалаквала, акытквала йцIасхаз «Бессмертный полк» акция paxIa-paxIa тшауацIнахитI. УахьчIва асабигIзарта йцауа ачкIвынчви ахIвсси рпны йгIашIарышвта зыбра шлаз ахъачви апхIвыскви раба, рабаду йан йа йаба рсурат рнапIыцIакIта йангIамгIвайсуа ауат йгIаргуа рлактаква хIырташвырпшы. ЙтлапIадзу хI-АйгIайра заджвгьи йшйызмырпудуаш, амамыр ацкIыс байаракIгьи шаъам дугьи хвыцгьи хIацшIакIта йхIшвырхIва. Мшы 1418 йакIвшаз, агIвычIвгIвара атурых апны рыцIа йхьантаз Абашта айсра Ду, Совет Союз абзазагIвчва рапшта, Къарча-Черкес ауагIахъаква рпачва йгьи рыпхIчва азгылтI. Анамыцаква йырпшIагылыз йрыуата 21750-гIвы рынцIра шIаква йырмайгьдзауата xI-Псадгьыл агIархвитхра ахъазла рхъа щтIарцIатI. Щтадъа йыдзыз, зчIвылахъв ъану бергьльым 13-нзкьыгIв ранчва, рпхIвыс шIаква, рсаби-йыбаква ауат рхабар зджьарала йгIагушта йгвыгъумца рынцIра ргатI... АйгIайра а-Мш агIан Йымчвуа Амца, акытква йтагылу асинква йрызгIайта рщапIы ахIврапшдзаква щтIазцIауа айсыгIвчва рпачва, ауат йгIарыцIагылыз чкIвыныргIа зчIвылахъв ъану рымдыруа ръахIльы, раргван йакIвпI зымгIва рапхъа квырмыш ззырчпауа. ЗымгIва рыхъазла дара райсыгIв д-ФырпI, дара раргван йакIвпI АйгIайра Ду зпырщылуа. афашистква йырпшIагылыз зкьпхьадзарала хъамайгьдзара гIадырбатI, батырта йайсыз щардагIвы акъральыгIва ртшхъвагаквала йгIалыркIгIатI. УахьчIвала унагIва щарда рпны айсыгIвчва йгIарквнадыргаз аорденкви амедалькви йрызсакъдзауа йынкъвыргитI, АйгIайра йадамыгъата йырпхьадзитI. Асквш 1940, май а 16 агIан Москва, Кремль апны афин айсра йпшцIата хъацIара гIазырбаз Къвныжв ЗамахIщари Уасман йпа Къарча-Черкес абзазагIвчва руацIала йапхъахауата «Совет Союз а-Фыр» ЧIахIра хьзы гIайквнадыргатI. Айсра агIан хIайсыгIвчва рфырра йаквшахIатхауа ахабарква щардадзапI. Асквшква 1941–1945 рагIан хъацIара гIазырбаз хIхаквлагIвчва йрыуата 28-гIв «Совет Союз а-Фыр» йгьи «Россия а-Фыр» чIахIра хьызква гIарквнадыргатI, 8-гIвы «Орден Боевой славы» ахстепенькIгьи гIатыргатI. Ауат йрыуапI Богатырев ХIарун, Биджиев СолтIан-ХIамид, Белан Сергей, Бутаев Георгий, Бадахов ХIамзат, Голаев Джанибек, Гербеков Магомет, Енжиевский Андрей, Ижаев Абдул, Казаев Александр, Къардан Мурат, Калоев Александр, Кумуков Халмурза, Каракетов Юнус, Къардан Охид, Касаев Осман, Лободин Иван, Леонов Виктор, Лаар Иосиф, Меркулов Иван, Омельянюк Филипп, Панченко Дмитрий, Стариков Дмитрий, Степин Виктор, Узденов Дугербий, Хаиркизов Кичибатыр, Хабеков Умар, Чочуев ХIарун. Черкесск город йаныргIалу «Афырква р-Аллея» апны ауат рсинква гылапI. Агвыргъьахъв мшква ауаъа йадгылуа ахIахъв йану афырква рлактаква йыртапшитI, гвалагIваласракI рылата рщапIква ахIврапшдзаквала йхъдрыситI. Ауат рфырра хIансимш уысква швагата йырзалуа, хIчIвырхъипхьадза ауат рхъамайгьдзара йазыхIчпауа аквырмыш йгьи хIхъмаштылра йырдамыгъата хIбзазарныс ахъазла акIвпI мильуаныгIвпхьадзара рынцIраква зпшцIарцIаз...
261 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный