АЭЛЕКТРОЭНЕРГИЯ ГIАРХАРДЖЬРА ТШАУАЦIНАХИТI

Москва апны КЧР а-Хъада ТЕМРЕЗОВ Рашид «РусГидро» ПАО агенеральна директор ШУЛЬГИНОВ Николай дйынйатI. Анйара апны хIреспублики акомпания пхатши рацынхара йалачважватI. «РусГидро» ПАО Къарча-Черкес апны аинвестиция проектква абзазара йаланажьитI. Акомпания хIреспублика хъахIара азгIазгуа налог зшвауа анхарта пхатшаква йрыуапI. Къарча-Черкес апны «Зеленчукские ГЭС ГАЭС» йахъазымкIва, агидроэлектростанция хвыцква руыхвитI. Темрезов Рашид йгьи Шульгинов Николай асквшква 2021–2022 руацIа йгIахъыртIуаш Устьджьгваты, КрасногорскIа ГЭС руыхвара йалачважватI. Аинвестиция проектква сом 13,5 миллиард рыквшвитI. Асквш 2021 агIан Ударна поселок (Прикубань район) апны 11 мегаватткI аъара къару змазлуш «Куршавская малая» ГЭС ауыхвара джвыквылуаштI йгьи апроект сом миллиард 1,6 аквшвитI. Ауи а-ГЭС хвыц асквш 2024 йгIахъыртIырныс йаквдырпшитI. Анйара апны датшагьи «РусГидро» аобъектква ъаруыхвауа Устьджьгваты йгьи Къарча районква ркытква дзыла йадгалрала анхараква ауатыкв йгIатаргатI. КЧР а-Хъада Темрезов Рашид Къарча-Черкес апны агидроэнергетика атшауацIыхра къару ъалайцIауа, асоциальна, агвчIагIвра проектква йъарыцикIуа рыхъазла Шульгинов Николай дшизыразу йхIватI.