АЭЛЕКТРОЭНЕРГИЯ ГIАЛЦIЫРТАКВА ЙРЫЛАХIИТI

Петербург дуней экономика форум апкъ йтата КЧР а-Хъада ТЕМРЕЗОВ Рашид йгьи «РусГидро» агенеральна директор ШУЛЬГИНОВ Николай КрасногорскIа апны а-ГЭС хвыцква руыхварала ангIалра мачвы ацIарцIатI. Темрезов Рашид йшгIаликIгIазла, ангIалра апкъ йтата йдырхъйуш апроект хIреспублика аэкономика атшауацIыхра йацхърагIуштI. – А-ГЭС хвыцква руыхвара анхара тып шIыцква гIандыршуштI, аэлектроэнергия къытра йалнардзгIуштI, – йхIватI хIреспублика а-Хъада. Агидроэнергетика проект шIыцла уахьчIва йынхауа Зеленчук ГЭС-ГАЭС-ква рпны унамдзауата Къвбина дзыгIв апны гIвэлектростанция хвыцкI руыхвуштI, закIипхьадза акъару 24,9 МВт йнадзуштI, сквшыкI апны квтанайта мильуан 83,8 кВт сахIат гIанархарджьуаштI. Агидроэлектростанцияква асквшква 2021–2022 рагIан абзазара йаларжьуаштI, руыхвара сынчIва июнь йджвыквырцIитI. АнгIалра апкъ йтата «РусГидро» Къвбина дзыгIв апны Красногорск гидроэлектростанция хвыцква йырзалху адзхчартаква руыхвара ахъазла адгалра нхараква акIвнаршуштI, Къарча йгьи Устьджьгваты районква рбзазагIвчва электроэнергияла йадызгалуа аргIапсга уыхвара йаквшвауа ахча ахъвыкI ашвуштI датшагьи. Агидроэлектростанция шIыцква электроэнергия гIархарджьра йахъазымкIва адзхчартаква Къвбина дзыгIв апны адзы ацIолара тшампсахуата йырчпуштI. Июнь а 19 КрасногорскIа ГЭС йапхъахауа ахIахъв щтIарцIуштI.  А-Дуней экономика форум апны СКФО-ла РФ а-Президент йгIащтийыгIв МАТОВНИКОВ Александр далата КЧР а-Хъада ТЕМРЕЗОВ Рашид йгьи «МРСК Северного Кавказа» ПАО агенеральна директор ИВАНОВ Виталий ацынхарала ангIалра мачвы ацIарцIатI. Ауи апкъ йтата жвасквшала хIреспублика апны аэлектросеть нхартаква ацифра технология йаздырцауата йгIадыршIыцхуаштI. – УахьчIва электроэнергията йгIахIрысабапуа ансисквша йшалахIауа гIбитI, – йхIватI Темрезов Рашид ангIалра мачвы анацIайцIуз. – Аэлектроэнергия гIалцIыртаква йырпщылапI хIышта аэкономика тшауацIнарыхра. Ауи ахIатырла йапымкъьахауата электричествала хIадызгалуа ауыжвгIанчIви электростанцияква хIтахъыпI. ЙхIчпаз ангIалра агIвытланыкъвакIгьи хIгIальаматра алапI.