АДЫРРАКВА РЫТШГIВА АТУРЫХ БАЙАПI

АЛИЕВ Умар йыхьыз зхъу Къарча-Черкес къральыгIва университет хIышта апны йапхъахауата йгIахъыртIыз йхIаракIу апхьартапI. Ауи сквш 80 ахъыцIтI. Атурых байа хIалапшхуата хIышта атшауацIыхра йацта ауниверситетгьи мгIва алачпа йшгIалсыз, багъьата йщаквгылыз ацIаскви алкIгIаракви шаму хIзыхIвуштI. Асквш 1938, октябрь а 1 агIан РСФСР ауагIа комиссарква р-Совет ащаквыргылрала МикоянШахар (ужвы Къарча город) апны Къарча йгьи Черкес автоном областьква рапхьартаква рыхъазла гIвысквшала арыпхьагIвчва ъадрыхIазыруашыз институт гIахъыртIытI. Асквш 1940, август а 27 йгIашIарышвта ауи абызшви алитератури йгьи физики математики рфакультетква зланакIуа педагогика институтхатI. Ари арыпхьара нхарта ащаквыргылра гIашIанарыстI йгIалагаз Абашта айсра Ду. Ауи гIван йхъыргIвахтI – асквш 1942 август агIан анамыцаква Къарачай йангIатал йгьи акъарчаква Къазахстанли Квта Азияли йантырга. Ауи йгIалцIла гIван йгIащаквыргылхра атахъхатI – афашистква Къарча-Черкес йантырцах амщтахь асквш 1943, мартI а 1 йгьи акъарчаква ангIахъынхIвых асквш 1957 октябрь йгIашIарышвта. ЙхIаракIу апхьарта мачIмачIымца йгIащаквгылхуа йалагатI. Асквш 1967 агIан художества-графика йгьи спорт факультетква, асквш 1979 – педагогика йгьи апычIв классква рметодикала, асквш 1991 – музыка-педагогика, асквш 1992 – естественнагеография факультетква гIандыршатI. Ауи йахъазымкIва, афилология факультет апны журналист ъачIвагIагьи арыпхьара программа йаларцIатI; асквш 1997 агIан «Психология» ъачIвагIа йапхьарныс йапхъахауа агвыпгьи гIарахвтI. Асквш 1992 угIалагата Къарча-Черкес педагогика институт апны йгIахъыртIыз аспирантура Россияла шIыпIа щарда йрыуу аспирантква апхьитI. РФ йхIаракIу апхьартаква йгьи арыпхьарала РФ а-Министерства ркъральыгIва комитет акомиссия йакIвнаршаз архъвыхраквала КъарчаЧеркес къральыгIва педагогика институт педагогика университетхатI, асквш 2003 агIан къральыгIва университетхатI. Ари аъаща аестественна наука, аэкономика, асоциальна нархараквала аъачIвагIаква рарыпхьари анаука-рхъвыхра лаборатория квтаква ргIахътIри рылнаршатI. Асквш 2006 агIан йкIьыду хъвшарата аэкономика йгьи аунашвахъцIара рфакультет гIахъыртIытI. Йара ауи асквш ауниверситет апхьахьа, акъральыгIва уыснкъвгагIв Алиев Умар Джашау йпа йыхьыз ахъырцIатI. Асквш 2018, февраль а 28 агIан психологияла афакультет ацынхъвы психологии социальна нхари рфакультет ашвква ртIытI. Сквш 50 цIуата КъарчаЧеркес къральыгIва университет акъарча йгьи анагIвай, ачеркес йгьи абаза филологияла акафедраква ауагIахъа бызшваквали литературали апхьагаметодика цхърагIагаква йъарыдынхалуа квтата йалитI. Аквтанай апхьартаквагьи, йара ауниверситет апынгьи ауагIахъа бызшваквала уахьчIвала йаъу апхьагаква, апрограммаква, ацхърагIагаква райхIара ауат акафедраква рапхьагIвчвагьи алата йацлырхтI. Ауат йапшым датша кафедраква, йхIаракIу апхьартаква, йапшым анаукархъвыхра организацияква аргваныта йрыцынхитI. АрыпхьагIвчва, астудентква йгьи аспирантква йацыта сквшщарда руацIа рамайчра абзирала хIреспублика ауагIахъаква, ауат ршIалахIвара ршIыйара, апхъанчIви цIасква йырзынарху анхараква адыргалта йгIацIырщтырныс рылшатI, ауыла абанпара щарда ркультура йгьи рлитература тынхаква гIархчатI.