АДГЬЫЛ ЗЫРХАРДЖЬУА ЙАЙШВА ГЬЫМЦЫРАМ

ХIызту азаман нхарта гIауауырныс швабыжта йбаргвыпI. Ауаса йынхуш тшыздикIылуаш уыс гIайауаштI, агIвычIвгIвыс йылшараква щардапI, ауат йырхъйарныс акъраль хвитнагIа щарда гIайнатитI. Ауи акIвпI АлбыргIан абзазагIв ТIЫКIВА Зураб МухIаб йпа нхарадъа дангIанха дукI дымхъвыцуата адгьыл нйырхарныс мурадта йзичпаз. ТIыкIва Зураб асквш 1986, мартI а 9 АлбыргIан дйытI, ауаъа дгIадзынгылтI. Апхьарта дангIалга КЧГТА апны юриспруденция ъачIвагIа дапхьатI. УадыргIвана «Дервейс» автомобиль компания апны слесарьта сквшбжакI дынхатI, ауи йащтагIайуата мастерта ддыргылын, йхъыргIвахындзыкIьа (жвасквша) дынхатI. Зураб нхарадъа дангIанха адгьыл тшадикIылтI. – Адгьыл нсырхарныс зтшын сгвы йгIаташваз сынбжьагIвчва ХIвадж Алимырза сйыдзхъагылырквын, мгIвакI сшыквицIушыз гIасархIвтI. Саргьи дукI йсмыркъвахуата Алимырза сйынйатI. «Адгьыл уадынхалырныс угвы йангIаташвазара, АлахI йгIаудайрыхIвтI. Адгьыл нуырхара ахъазла бзи йубара атахъыпI, ауи гьуыс майрам» – йхIван йгьи дгIасайхIвахIвтI, сызлайыдгылыз ауысгьи йара атшын йсзахъвдаквищттI, адгьылтагьи 15 гектаркI багьандата йгIаситын, йынсырхауа салагатI. ЙащтагIайуаз асквш хIадгьылква йрыквыргIапсу, йлацIара атахъу ажвлаквала акIартIоф ауысла акIвызтI, анартыхв ауысла акIвызтI Гьаргьа Шамель швабыжта дгIасцхърагIатI, – йгIайгвалашвахитI Зураб йапхъахауа йчIвырхъаква. Зураб хвысквша цIитIта нартыхв, кIартIоф лайцIитI. УахьчIвала йхвгIазтынгьи, багьандата йгIайахвызтынгьи, гектар 33 йырхарджьитI, хгектаркI рпны кIартIоф, арахьарат рпны нартыхв лапI. Зураб йшихIвауала, анартыхв адынхалра рыцIа ймайрапI: ауысква зымгIва техникапI йызлаучпауа. АкIартIоф уанадынхалуа уагIа утахъхитI, архъа апны йгIазхъвшвушгьи, йангIаргхра йалызххуашгьи утахъыпI. Ари ауысла Зураб ХIвадж Света дылзыразпI. УагIа анитахъу ауи йлайхIвызтын, гвып адылкIылитI. Зураб йшихIвауала, адгьылква нзырхауа ансисквша алацIара уысква йанрылгара, архъа апны къвырман рчпитI, АлахI тшыгIвра бажв шгIаритуашла йыхIвитI. ХIахIбачва йхIызгIаныржьыз ари ацIас пшдза чкIвыныргIа йдымрыдзуата хвы ъазырбауа угвы йаланархIитI. АчкIвын тшыздикIылыз ауысла ужвыгьи кьангьашра дазыбжапI, мгIва тамам дыквызцIауа дзачIвызлакIгьи йажва хвы азибитI. Швабыж дизыразта дйыквчважвитI тракторла анхараква рпны сквшпхьадзара йгIайцхърагIауа Къвач Аслан. – СынчIва сзыргвыгъаз заджвы сижьахын, адгьыл сзыламцIауата йгIанхун. СшIа йгIатыйымщтуата Хъиблахь ХIазрат хымшкIыла йсзылайцIатI. Хъсал МухIамад нхара уысызтынгьи, хъвшвызтынгьи, жвлазтынгьи – сызлайыдзхъагыллакIгьи сгвжважвагIва тищтитI. Йапхъахауата адгьыл нырхара саналага цIагылагIвта йсзалыз МухIамад йакIвпI. АлацIан угIалагата ацIагахындзыкIьа арат асквшква Гьаргьа Данель щъата дсыцIагылапI ухIва ауаштI, швабыжта сырзыразпI зымгIвагьи. Саргьи йстлакIьуала йызбитI. Абзира урыдзра гьатахъым, ауаса уанайкьангьашуа йухауа ауыс рахIагьи уазгвышхвитI, – йхIвитI Зураб. А дгьылрхард жьгIви йхъапщыла Залини пакIи пхIакIи рымапI. Асабиква дырхьпшуа дъадзачIву азаман лымрыдзра ахIатырла хъацIи пхIвыси йабаргвышхван, руатра апны теплица руыхватI, ауатралыцIква дырхарджьитI. ГIвысквшала утхъахта Интернетла теплица шыртиуала ахабар аниба йгIайахвырныс Нальчик дцатI. Акыт хвыц Черная речка ахьзын. Апшвыма ТIыкIваргIа дшрыуаз анихIва Зураб швабыжта йджьайщан, дрызцIгIауа далагатI. Йшаъула, ауи акыт апны ТIыкIваргIа ртлапкъ йауата унагIва 30 бзазитI. Зураб атеплица гIайгын йапхъахуз асквш ауат амцIайцIатI, адгьыл гIатигатI, адгьылрбзигаква адигалтI. Арат ауысква сквшыкI дыркIытI. ЦIыпх йапхъахауа тшыгIвра гIатыргатI. Атеплицаква хпа йнадзитI, азакIы апны наша лан, агIвба рпны пIатIражана. Арпхарта анырхарала датшагьи ауысквала КIам Азамат швабыжта дгIайыцIагылтI. Зураб йгIаджвыквицIаз ауыс апны цIагылата йзалтI йахща, йайщчва. Къвбина йанща ГIват Ромик алацIара уысква рпны дгIайцхърагIатI. – Атеплица апны ауысква айхIара зчпауа схъапщыла лакIвпI, сара архъа рыцIа сазаргванпI, – йхIвитI Зураб. Залина йшылхIвауала, апIатIражана щарда уазпшитI, ауаса ауи азгIваква гьазычвгьам, щарда йщтIаурызла ауитI, файда амапI. Анаша ауыс майрапI, ауаса азгIваква йырчвухчарныс баргвыпI, абыгъьква гIважьхауа йалагитI. Нашагьи пIатIражанагьи хъвшвыта йрыдыргалуа апшыпI, йчмазагIвымызтынгьи, закI гIанамуахвра ахъазла йаквучвалара шатахъу чакь гьалам. АзцIгIаракI ангIаншара Зураб рпхарта змакву тшырзынайырхалитI, закI гIайгвнымгIвуазтын, КIам Азамат дицIгIалитI. Ажвалагьи, уыслагьи Зураб йгIайцхърагIауа, йгIайыцIагылуа зынгьи йхъмаштылуата йгвы пхата йтапI. Ауи аъарагIвы йгIаджвыквицIаз ауыс йъацыркIуа Зураб рахIагьи даргвышхвитI, йуысква шбзихуш дайгвгъитI. ЙцIыхъвахауа азаман чкIвыныргIа рыуа щардагIвы адгьылрхарджьра тшартитI. ДзачIвызлакIгьи згIвадара багъьа йымазтI, ймурад бзиква гIайдахIвыргIатI, тшыгIвра бажв гIацIазгуш йрыуахаргIатI.