Адамла бла тюбешгенди

Къарачай-Черкесияны Башчысы Темрезланы Рашид мындан алда адамла бла кёзюулю тюбешиу бардыргъанды. Аны кёзюуюнде Башчыгъа талай адам тюрлю-тюрлю тилекле бла келгендиле. Аланы бир къауумуну тилеклери Къобан районда Дружба элни бир-бир тийрелерин суу бла баджарыу иги къуралмагъаны бла, аны кибик башха социал эмда коммунал проблемала бла байламлы болгъандыла. Республиканы Башчысы айтылгъанлагъа эс бёлюб тынгылагъанды.
Тюбешиу болгъан кёзюуде Къобан районну администрациясыны башчысы Къазийланы Хусейн да алайда болгъанды. Анда ол билдиргенден, 2013-чю джыл КъЧР-ни Башчысыны излеми бла элни суу бла баджарыуну ишлери бардырылыб, быргъыла толусу бла ауушдурулгъандыла.

Ол джумуш кеси да Черкесскени суу бла баджарыуну ишлери бардырылгъан заманда шахар бла бирге этилгенди. Алай а бир-бир джерледе быргъыла эски болгъанлары амалтын суу кёб хайырландырылгъан кёзюуледе ол тыйыншлысыча келмейди.
Темрезланы Рашид Къазийланы Хусейннге суу быргъыланы эски болгъан джерлерин контролда тутарын, 2018-чи джыл джай а аланы толусу бла ауушдуртуругъун излегенди.
Черкесскечи тиширыу приёмну кёзюуюнде билдиргенден, шахарны ол джашагъан кёб этажлы юйюню башыны кровлясын ауушдурургъа керекди. Аны бла байламлы КъЧР-ни Башчысыны излеми бла республиканы Къурулуш министерствосу бла ЖКХ-сы Къарачай-Черкесияны джеринде орналгъан управляющий компанияланы хайырлы ишлегенлери бла къалгъанларын ачыкъларгъа аудит бардырлыкъды.
Тюбешиуню кёзюуюнде Черкесск шахарны мэрини заместители Пхешхов Ахмет КъЧР-ни Башчысын управляющий компанияны кючю бла джылны аягъына дери ол юйню башына ремонт этиллигине ышандыргъанды.
Къарачай-Черкесияны Башчысы Темрезланы Рашид кемизли сабийле бла сабийлерин джангыз кеслери ёсдюрген аналагъа социал болушлукъла табдырыу бла байламлы да талай аманат этди тыйыншлы органлагъа. Ол ишни къалай баргъанына кеси кёз-къулакъ болуб турлугъун да билдирди.
КъЧР-ни Башчысы Темрезланы Рашидни бу тюбешиую бла байламлы талай магъаналы иш баджарылгъанды.