Актуально Глава КЧР Рашид Темрезов вручил ключи от 19 новых пассажирских автобусов Актуально «Россети Северный Кавказ» на 7,7 % улучшили платежную дисциплину потребителей электроэнергии в КЧР Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция

АЧВГЬАХАРАКВА РАЙХIАРА ГIАХЪЫРТIИТI

22.02.2019 261
АЧВГЬАХАРАКВА РАЙХIАРА ГIАХЪЫРТIИТI
Ареспублика прокуратура апны ажурналистква дгIарынйатI КЧР апрокурор ТЕРЕЩЕНКО Александр. Анйара ззынархаз асквш 2018 агIан ареспублика апрокуратура органква рынхара агIарбараква ракIвпI. Терещенко Александр ареспубликала йщаквгылаз ахабзанкъвгара аъаща даквгIашIастI. – Апхьадзараква гIауахвырквын, узыргвышхвауагьи узымрыразуагьи аъапI, – йхIватI ареспублика апрокурор. – Йшалу ахабзамыгIвхъгараква дукI йыгьрыламхIатI, йгIахъыртIыз ахабзамыгIвхъгараква процент 80-дза йрылахIатI, дыршала азгIвадара зарар арайдзара процент 20-ла йнакъвытI, амгIва пхастаква йрыладзыз 12 проценткIла ймачIыгIвпI. Ауаса агъычраква, агвыквсраква, ахIвынчIараква рыцIа йщардапI. Асоциальна-экономика баргвыраква ршвхIаусыгIвала йгIаншауа ахабзамыгIвхъгараквагьи йрылахIатI. ЙцIыхъвахауа асквшква йнымхауа йгьи йампхьауа йгIандыршауа ахабзамыгIвхъгараква йрылахIумцара йгIамгIвайситI, йагIвсыз асквш агIан ауат рыцIагьи йщардахатI йгьи процент 84 йнадзатI. ЙагIвсыз асквш ауацIала ареспублика апрокуратура органква йалкIгIу гватра ззалырхыз йрыуапI атерроризми аэкстремизми ргIашIакIра йырпщылу ауысква. ЗмагIны дуу анхартаква, ауагIа щардата йъайззауа ажвлара шIыпIаква, агIвнабзазартаква атерроризм йшачвыхчула ахъпшылра нхараква адыргалтI. Атерроризм тшачвыхчарала амальква нарахвра ахъазла асуд тшазынархарата 50 айхIа рщтитI, ауат зымгIва асуд тамамта йапхьадзатI. Йара ауаса апрокуратура атшазынархарала экстремизм злу исльам ауагIа йрылазгауа сайтта 60 хъыргIватI, 30-гIв джьауап ддыркIытI. – Апрокуратура органква хIынхара апны атехнология шIыцква шгIахIрысабапуаш хIащтапI, – йхIватI Терещенко Александр. – ЙагIвсыз асквш аквтаква рагIан Интернет апны атерроризм йгьи аэкстремизм йаквгIазшIызтуа агIвыраква, авидеоква гIазрыбергьыльуа программа гIахIрысабапуа хIалагатI. Йара ауи апрограммала датша нархара зму мыгIвхъгаракIгьи гIахIрыбергьыльтI. Заджвы агIвжвага шдрыхIазыруа Интернет йгIатайцIатI. Ауи ауыслагьи асуд тшазынахIырхатI. Йыззынарху йапщыламкIва ахабза мыгIвхъыргауата Интернет йгIатарцIауа зымгIва ауи апрограммала йгIашIахIкIлуштI. Атерроризми аэкстремизми йырпщылата йдыркъванчауа йырзынарху ауголовна уысква асуд апны йанрылапшуагьи апрокурорква алазлитI. Араса Лагъь-КIавкIаз айсра округ асуд апны аэкстремист гвып рхIаквым рхатI. Агвып йалаз зымгIвагьи тадырчIватI, агIсквши хвымызкIи угIалагата 12 сквшадза рыквырцIатI. Асквш 2018 агIан акоррупция апшIагылрала ахабза шырхъйахауа хъпшылра ахъцIарала нхара щарда акIвдыршатI. Ауи анархарала мыгIвхъгарата пщынзыкьи хвышв гIадрыбергьыльтI, ауат дрыдзхра ахъазла швъата 1400 ргIвытI, ъанатIанкъвгагIвта 800-гIвы райхIа джьауап ддыркIытI. АкъральыгIва унашвачпара йалу ачыннкъвгагIвчва акоммерция уысква акIвдыршун, рхъахIарала, рымлыквла, ракврыдзраквала йтамаму швъа гьгIадмырбузтI. Ауи акIвымкIвагьи, коррупция нархара зму амыгIвхъгараква гIадрыбергьыльтI акъральыгIва йгьи амуниципальна цхърагIараква драдзара апны, амуниципальна йгьи акъральыгIва тахъыраква рыхъазла анхараква акIвзыршуш ангIалырхуаз, ахвгIахвтраква анадыргалуаз, абюджет ахчаква ршара апны. Апрокурор рхъвыхраква рымщтахь уголовна уыста 41 гIахъыртIытI, ауат райхIара зпщылу абюджет акIвпI. Ареспублика апрокурор акоррупция хабзамыгIвхъгараквала ашвапхаквагьи гIайгтI. – АчыннкъвгагIвчва йцIыхъвахауа ахысквша йырхвгIаз йатымпауа амлыкв злагIарахвыз ахча ахабза мыгIвхърымгауата йшгIарынхаз рызмырцIабыргуазтын, судла амлыкв гIарыквырхитIта акъральыгIва йахъатачIвырахитI, – йхIватI Терещенко Александр. – Араса архъвыхраква йшгIадырбазла, Къзылпагвын кыт администрация аъачIвагIагIв йцIыхъвахуз ахысквша руацIала котельна, рхарджьырта тдзы, адгьыл йхвгIатI, ауат шалу сом 14 мильуанкI йахвпI, йара сквшыкI апны йхъахIара сом зыкь 350 акIвын йнадзуз. Акыт администрация аъачIвагIагIв ахчаква ъагIайгыз гьизымхIватI. Ауи йгIалцIла, КъарчачкIвын район апрокурор ахъацIа 14 мильуанкI йдыршвахра ахъазла асуд тшазынайырхатI. Асуд апны апрокурор йхIваз йацыркIтI йгьи ащаквыргылра къару нанауахвтI. Апрокурор хъпшылра йацIапI агIвнабзазартакоммунальна млыкврхIара йапщылу ауысквагьи. Асквш 2018 ауацIала ауи анархарала мыгIвхъгарата зкьы айхIа гIадрыбергьыльтI. Апрокуратура органква йыргIвыз ашвъала аунашвахъцIара компанияква йрыхъвдакву ауысква дырхъйарныс йазадырцалтI, ауат йрыуапI фатар щардала йалу атыдзква рпны абзазагIвчва йырзацалу амлыкв ахьпшра йгьи йырчIаджьра. Капитальна рчIаджьрала йазалху апрограммаквагьи абжараква шрыцIбу гIадрыбергьыльтI. ЙалкIгIу гватра азалырхитI збальыгъ йнамдзас рхвитнагIаква хчара, ауи анархарала мыгIвхъгарата цынзыкь гIадрыбергьыльтI. Апрокурор рхъвыхраква рымщтахь сабигIзартаквакI рпны асабиква рчара адгалрала, медицина хьпшрала йаъаз абжараква дрыдзхтI. Апрокуратура йагIвыз ашвъала асквш 2019 ареспублика бюджет апны апхьартаква апхьагала йадгалра йазалырхуаш асом мильуан 26 гIарбапI. Асаби-йыбаква фатарла йадгалра йбаргву ауысква йшрыуу йгIанхитI. – УахьчIвала хъацIакIыртала йадыргалырныс хвитнагIа зму айыбаква 515-гIв йнадзитI. ХIреспублика апны ауи ауыс швабыжта йаквыргъвгъварапI, гIвнабзазарта йазыбжу асаби-йыбаква йрылахIитI акIвымкIва йыгьрылдзгIум. ХIара йхIылшауа гьгIаныгIжьуам, асуд тшазынархарата 61 хIщтитI, ауат йрыуата 56 йрыцыркIтI, ахпа йрылапшыркIвитI. ХIреспублика а-Парламент ари ауыс йазалырхуа абюджет ахчаква йрыладырхIарныс тшазынахIырхатI. ЙхIыцыркIуашта сгвыгъитI, – йхIватI КЧР апрокурор. Къарча-Черкес Республика апрокурор датша нархараквала агIарбараквагьи дрыквгIашIастI, ажурналистква разцIгIараква джьауап риттI.
261 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный