СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

АБЖЬАГIВ ГВЫМЧIВА ЙЦIЫХЪВАХАУА ЙЫМГIВА ДНАРДАСТI

22.02.2019 267
АБЖЬАГIВ ГВЫМЧIВА ЙЦIЫХЪВАХАУА ЙЫМГIВА ДНАРДАСТI
Cквш 74 дыртата адуней йхIваджьтI Россияла гIатгара змаз абжьагIвы ДАВЫДОВ Александр Степан йпа. Февраль а 12 ауи йцIыхъвахауа йымгIва днардасуата митинг акIвшатI. Александр Степан йпа йпсра згвы йыцIалыз йцриква, йыгIвзачва, бокс йазибжьаз чкIвыныргIа щардагIвы амитинг йгIадгылтI. Къарча-Черкес а-Хъада Темрезов Рашид йыхьызла КЧР а-Хъада йгьи а-Правительства р-Администрация а-УнашвачпагIв Уаз Мурат дгIачважватI. – Къарча-Черкес чкIвыныргIа рызгIвадара рыбагъьара, бокс йазыбжьара сквшщарда йазынхаз ахIба пшдза, агIвычIвгIвыс бзи дхIчвыдзтI. Россияла гIатгара змаз абжьагIвы Давыдов Александр гIвычIвгIвысагIара, хъацIара гIазлицаз йгьабанпаракIым йгIадзынйыргылыз. Ауи бокс йазибжьаз йрыуата Россия, Европа йгьи адуней чемпионатква, Олимпиада хъвмарраква рпны амедальква гIазквнадыргаз, хIреспублика ахьыз зыргаз щардагIвы йнадзитI. Ауаса чкIвыныргIа гвхътIыла йрыдынхалуаз, анкъвакъвраква йрыквзыргвышхвуз абжьагIв гвымчIва уахьчIва дгьхIылахым. ХIреспублика аспорт жвлара зымгIва Давыдов Александр йпсра ргвы йыцIалтI. Йцрикви йаргванкви хIрыцджьабитI, Александр Степан йпа щардала хIгвы дтазлуштI, – йхIватI Уаз Мурат. Давыдов Александр Черкесск город апны дйытI йгьи ауаъа дгIадзынгылтI. Дсабита аспорт тшадикIылтI, атлетика ласы, уадыргIвана футболла атшыбжьараква акIвйыршатI. Бокс рыцIа йшизаргвану ангIайгвынгIвы, аспорт амастер норматив йырхъйанадзыкIьа атшыбжьараква дгьгIаркъвымцIтI, анкъвакъвраква рпны тшгIайырбатI. УадыргIвана анкъвакъвраква рпны йадзаз аудын йгIалцIла анкъвакъвраква дгьрыламылхтI, бжьагIвыта анхараква джвыквицIатI. Давыдов Александр асквш 1972 йгIашIарышвта хIреспублика афизкультури аспорти ртшауацIыхра къару ду алайцIатI, Россияла йахъазымкIва адунейла зыхьыз зыргаз аспортсменква гIадзынйыргылтI. Асквш 2004 агIан Афины йакIвшаз Олимп хъвмарраква рпны боксла йхпахауа агыларта зкIыз Храча Мурат Давыдов Александр йакIвпI дызбжьаз, дгIадзынзыргылыз. Храча Мурат дангIачважвуз абжьагIв бергьльы щта пшдза шгIанижьыз, ауи йуыс бзиква дыздынхалуаз аспортсменква йшнадырдзахуаш гIаликIгIатI. – Давыдов Александр йбжьуз ащардагIв ауи рцрикI йапшта хвы йзырбун, бзи дырбун. Ауи йшвапхала асабиква йрыдынхалуа абжьагIвчва гьмачIым. Ауат апхъахьылагьи Давыдов Александр бзи йбуз, йынцIра зпищылыз ауыс йадкIылата Россия, Европа йгьи адунейла йчемпионхуш аспортсменква гIадзындыргылуаштI. Ауат абжьагIв бергьльы дырхъмаштылуата анкъвакъвраква рпны айгIайраква гIатыргуштI, – йхIватI Храча Мурат. Ауи Давыдов Александр йцIыхъвахауа йымгIва днардасырныс йгIайззаз йгьи амитинг адгалри акIвыршари йацхърагIаз зымгIва дшырзыразу йхIватI. Айззара апны ажва зыртыз Черкесск город а-Дума апредседатель йзаместитель ГIашокъва Иналь Давыдов Александр чкIвыныргIа дъарыдынхалуаз ахъазла йгIайквнадыргаз артшхъвагаква йырхъазымкIва, «Черкесск город чIахIра зму акъральгIв» хьызгьи дшанкъвгагIвыз гIайхIватI. – Давыдов Александр йхъа рыладута йынкъвигуз артшхъвагаква зымгIва йквнагадзата йгIайырттI. Ауи сабита аурам йгIаквидаз, бокс йазибжьаз, хъацIара гIазлицаз щардагIвы йнадзитI. УахьчIва хIхъа рыладута хIызквчважвауа аспортсменква ауи йбзирала агIатгараква йырзынадзатI. АбжьагIв бергьльы Давыдов Александр йпсра хIгвы йыцIалтI, йцрикви йаргванкви хIрыцджьабитI, – йхIватI ГIашокъва Иналь. Россия Федерацияла гIатгара зму абжьагIвы Пчелкин Вячеслав Давыдов Александри йари рчкIвынхъа угIалагата йшащтаныкъвуз, йшацынхуз гIайгвалашвахтI. – УахьчIва йцIыхъвахауа йымгIва днагIдаситI Россияла йахъазымкIва, адунейлагьи зыхьыз зыргаз абжьагIвы, хIыгIвза цIабыргы Давыдов Александр Степан йпа. Ауи чкIвыныргIа дрыдынхалуата, афизкультури аспорти йрыквйыргвышхвауата нхара ду акIвйыршатI. Атшыбжьараква рагIан аспортсменква анкъвакъвра дуква йырзирыхIазыруата дрылабжьун. Йбжьаз йрыуата агIатгара дуква йырзынадзаз гьмачIгIвым. Александр йшвапхала йгIадзынгылуаш чкIвыныргIа хIщардазтI, хIара ауи зынгьи дыгьхIхъаштылуашым, – йхIватI Пчелкин Вячеслав. Давыдов Александр дыздыруаз зымгIва ргвы пхата дгIатахатI, ауи йбзира зквшваз аспортсменквагьи абжьагIвчвагьи дшырхъмаштылуаш, йуысква шнадырдзахуаш кьангьашра гьалам. 
267 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный