Актуально Минприроды Карачаево-Черкесии усилило противопожарную профилактическую работу Актуально В КЧР женщина опубликовала откровенные фото своей знакомой и попала под следствие СКФО Северный Кавказ возглавил рейтинг самых спортивных регионов страны Актуально КЧР осудили на 6 лет автомеханика из Краснодарского края за мошенничество  СКФО   В Северной Осетии очищают реку Терек

АБЗАЗАРА ЙАЗДЗЫШУА АГIВЫЧIВГIВЫС

14.08.2020 150
АБЗАЗАРА ЙАЗДЗЫШУА АГIВЫЧIВГIВЫС
УахьчIва зхабар швахасыргIвазуш йуысла, йхатIла, йбзазащала щардагIвы рпны дбергьльыпI, йгIайыквчважвауа агIвыраква йырхъазымкIва, йара йкъальам йгIахъыцIыз агIвыра джьащахъваква йызнымкIва агазет йгIаншвалтI. СгIвыра афыр йтурых ауи аъара йауацIыхпIта газет напакIгьи азымхъарныс ауыпI. Зунашва схIвауа август а 10 сквш 90 зхъыцIыз АЙСАН Кьащиф Ибрахим йпа йакIвпI. Ауи гIвыкI йныбыжь анхара дапщылан. Йынхара хвы азырчпауата «За безупречную службу», «За добросовестный труд в годы войны 1941 – 1945 годов», «Ветеран труда» медальква, «Отличник милиции» гвплацIа йгьи йапшым артшхъвага швъаква гIайквнадыргатI. Айсан Кьащиф асквш 1930, август а 10 Красна Восток кыт дйытI. ЙчкIвынхъа акыт аколхозква ангIандыршуз, ауат рыщата андрыбагъьуз йаквшватI. АтгIачва гьчкIвынмызтI – быжьгIвысабичва йнадзун, агIвыджь йхвыцыркIвата адуней рхIваджьтI. Кьащиф йгIвылакI йрыцIапI дъагIадзынгылыз, хпещкI йнадзуз акъанджьаль тыдз, гектаркI аъара гIазцIазкIуаз ауатра апны йахща Чача, йайщчва Муса, Захар, Щамсадин дрыцта бельла дшыжуаз. Абашта айсра Ду ангIалага Кьащиф жвиз сквша дыртан, ауи рыцхIагIарати гвакъвпрати йгIанагыз йхъатала даквшахIатхатI, уахьчIва йъагIадзазгьи пхыз гвымхата йгIвылакI йрыцIаркIвапI. Ауи йыквлагIвчва ащардагIв рапшта, жвыгIв сквша рахIа дыртамкIва уаса йхчауа далагатI, апочта нкъвигатI. Асквш 1942 август акыт йгIаталыз анамыцаква ргвауара йызнымкIва дашIашватI, швара йымдыруата апартизанква цхърагIара дирадзатI. Кьащиф йхъмаштылра йгIалахатI йан, акъарча тпхIа Люба гIвкомандиркIи гIвсолдаткIи шылрысасыз, рчгIвычаква шылджвджваз. Анамыцаква ангIайуашыз аколхоз амлыкв ауагIа йшрыларшаз, йкытлагIвчва гвып-гвып, заджвызаджв ауандырква йрыквчIвата, щапIыла акыт йштыцIуаз. Гвым уырста, йаба йайщчва Диду, Йакъвып, Хадиль, МхIамат данырпырахх «Ай, хIунакъващ, айсра хIцитI, хIгIацампахырныс ауыпI» -хIва шгIайархIвыз, штшгIайыкIвдыршаз. Ауат рыуа заджвгьи айсра дгьгIахънымхIвыхтI, хгIвы-хыгIв сабичва гIартынхатI. Ауат рапхъала айсра йпшцIалыз ГIайсагьи, Щамсадингьи, ХIабадангьи гьгIахънымхIвыхтI. АйсанргIа рткъвым йауата зцришта йгIахъынхIвыхыз Муса заджвыкI йакIвпI, дхвыта Белоруссия агоспиталь дъащтIаз апны йкытлагIв ХвытI ХIамидби дипшIашватI. Асквш 1943 адзын акъарчаква зтыргаз Къзылпагвын кыт бзазара йхъаржьылыз йрыуапI Айсан Кьащиф йтгIачвагьи. Ауаъа акIвпI йапхьара ъаджвыквицIазгьи. – Къзылпагвын апны йпщбахауа акласс сангIалга, Гвым йтагылаз апхьарта сгIабгъалуамца йхвбахауа акласс сапхьауа салагатI, – йгIайгвалашвахитI Кьащиф. – Йыгьсхъаштылхуам, агъныла Джьмакъвыл ХIапагвагьи саргьи абкъвыл йгIалхыз атларыджаквала хIшгIабгъалуаз, апхьара сахIатква рымщтахьла ауат хIызкв йкIыдта, хIкIахIауа-хIгIагылхуа хIшхъалхуаз. Асквш 1952 агIан Айсан Кьащиф къвырльыкъвхара дызшIырттI. Ауи Севастополь даквшватI, дмеханикын, дматросын, архъв апны дсуратчпагIв-аныргIалгIвын. Абаргвыраква йгIарылсыз ачкIвын йборч йнардзата йъайырхъйуз ахъазла йызнымкIва ддыртшхъватI. Ауи апхьартагьи, акультпрсветучилищагьи, Къарча пединститутгьи дгIарылгахтI. Кьащиф Учкекен апны суратчпагIвта, акыт клуб даунашвачпагIвта, «Коммунизм алашара» газет суратхъыхыгIвта дынхатI. ЙпхыцIа Черкесск данагах 12 сквша амилиция дрылан, майор чын дазынадзатI, ртшхъвагата 16 гIайквнадыргатI. Ауат йрыуапI: «За добросовестный труд в Великой Отечественной войне» медаль, «Отличник милиции» ЧIахIра хьзы, «250 лет советсткой милиции» медаль датшагьи. Амилиция дангIарылцIх Лачвыш Биталь йахIварала аъачIвагIа гIацIгарта училища амшIычпагIвчва дырбжьагIвыта, ауагIахъа апхьарта-интернат нхарала арыпхьагIвта дынхатI. Асквш 1997 йгIашIарышвта Айсан Кьащиф дгьынхахуам, тшпсщара дчIвапI, Ауаса йбзазара гвшIыгъьрата йгьакIвшум, йпачва Ауес, Рустам, йыпхIчва Рита йгьи Алиса ргIариква дангIакIвдыршара дуней млыквта йпхьадзитI, драйбжьитI, аткъвым рхабар райхIвитI, йбайу йара йыршIыйара дйырбитI. Йтшварахаз, йапшым ахIврапшдзаква зыгIвнагылу йфатар йачвыхъарам йгараж апны йтахъу аъамапсымаква гIвнагылата, йгIагIвнакIкIауа амара нурква драйгвыргъьауа, хIауа цкьала дпсыпнкъвгауа сурат йгIвитI, ашвындыкъвара чкIвынква азакIи азакIи апшымкIва, йызбауа дхъырхуата йчпитI. – СыршIыйара йапшырныс йсызгIайитI апхьартаква рапхьагIвчва, йхIаракIу адырра гIацIгартаква йыцIу астудентква, асабигIзартаква рынхагIвчва, йапшым ауагIаква, – йхIвитI Кьащиф йнапI ъазаква йырчпаз ашвындыкъвара зигIваква сйырбауа. – Ауат йрыуата йрыласшахьу ари агараж йгьыгIвнамшварызтI, «чвахъабагата йгIасыт» зхIвауа заджвгьи дыгьсшвхIакIвум, сгвыргъьауа йрыститI. Йамуазтынгьи адуней саныквхым пхата салагIаргвалашвахпI, – йгIацицIахитI ауи. Асквш 2018, июль а 23 агIан Черкесск «АдзыгIвбжьа ЙачIва» тшпсщара парк апны абаза газет йахъыцIуаз асквш 80 йгьи абазакви абхазкви р-Баракъ а-Мш андыртлапIуз агвыргъьахъв йалаз йджьарщауата Айсан Кьащиф йнапIы йгIацIцIыз, мшIыла йчпаз ашвындыкъвараква йырпшытI. Ауаъа Адуней абхаз-абаза Конгресс ЙхIаракIу а-Совет аунашвачпагIв, «Алашара» жвлара адкIылара апрезидент Эгьзакь Муссагьи йкытлагIв йадигалыз агIарбара дгьагIвымстI, айшва йхвынгылаз ашвындыкъвараква дырпшытI, гвхътIыла дйачважватI, згIвадара йымата ауагIа зыргвыргъьауа йыршIыйара щардала дадынхалырнысла дйайхIвахIвтI. – Сара сахща Чача, саща Щамсадин, сгIариква, ауат йгIархъшахъыцIыз, бзи йызбауа съахIыльчва йырхъазымкIва, сынбжьагIвчвала скIвыршата сюбилей сапылтI, – йхIвитI Айсан Кьащиф. – ЙызбатI чкIвынхъа баргвгьи, млагьи, хьтагьи, гIапсарагьи. ШвхIакIвата сзынйазгьи гьмачIым. Адуней лашара сзырбаз сани саби, йсыгхаз съахIыльчва, йыздыруаз сынбжьагIвчва сгвы йангIанагра хвыртакI сарбцIуазшва йызбитI. Ауаса абзазара гIашIасра гьадырам, заджвгьи атахта тIатIа дтачIвата апсра дгьазпшуам. Уылаква йъадзарбауа, умахъащахъа уъадзанкъвыргауа, угвы ъадзанхауа абзазара уаздзышра атахъыпI. Сара сыщтахьла йгIанхаз асквшква дукI сгьрызхъвыцуам. АлахI йхIвузтын сымч тапI, скъару саргвышхвитI, «УуагIа бзиракI рзыха»-хIва апхъала сарцитI. СгIазлыцIыз, йысхъардугу суагIа сызлагIаргвалашвахуаш, асабиква ртурых йгIалахуш бзиракI сащтата сымшква наздаситI. «Бзира згвалу йгIайдахIвитI» рхIвитI. Айсан Кьащиф йюбилейла сйайхIвахIвуата згIвадара багъьа, йуагIа рсатыр далата, йгвыгъара пшдзаква гIайдахIвуа, йыршIыйара йгIайнатуа алахIвара даргвышхвауа ужвыгьи сквшщарда дбзазарныс йзыстахъпI
150 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный