АБЗАЗАГIВЧВА ПСАБАРА ГАЗЛА ЙАДЫРГАЛИТI

Къарча город утыцIта Теберда городдза акытква псабара газла йадыргалуата анхараква рхъвыкI алдыргахьатI. Новая Теберда абзазагIвчва йырзынадзахьатI, ауи акыт йазыргаз агазцага труба аура километр 26 йнадзитI. Ауаъа йбзазауа цтгIачвакI газ кIылыргахьатI. Ауат псабара газ рзауырщтуата акыт апны айззара ду акIвшатI. Ауи йалан РФ а-Правительства а-Председатель йзаместитель НОВАК Александр, экономика тшауацIыхрала РФ аминистр йзаместитель НАЗАРОВ Сергей, КЧР а-Хъада ТЕМРЕЗОВ Рашид, «Газпром» ПАО а-УнашвахъцIарта йалу МАРКОВ Владимир, «Газпром межрегионгаз» агенеральна директор ГУСТОВ Сергей, КЧР а-Правительства анхагIвчва, Новая Теберда абзазагIвчва. Новак Александр Къарча-Черкес а-Мшла йгIайззаз драйхIвахIвуата мамырта йбзазауа ареспублика ауагIахъаква згIвадара багъьа, насып шырзитахъу йхIватI. Ауи йшгIаликIгIазла, Темрезов Рашид КЧР унашва ъадзахъицIауа ажвасквша руацIа ареспублика атшауацIыхра мгIва йхвынгылата апхъала йчIвырхъитI. Новак Александр псабара газ ззыргахьаз акытква рбзазагIвчва ауи ласыта йрызкIылыргара ахъазла архъйачIвквагьи гIайхIватI. – УахьчIва газ ззаухIщтуа акытгьи рылата ауи ззыргахьу, ауаса ужвыгьи йъагIадымрысабапуа акытква рбзазагIвчва зымгIва асквш 2022-дза псабара газ рызкIылыргарныс РФ а-Президент Путин Владимир хачIвы йыргылтI. Къарча-Черкес апны кытта 107 псабара газ рзыргахьазтынгьи, тгIачва щарда ауи гьрызкIылымгастI. Ареспублика аунашвачпагIвчва ари ауыс дрыласуата йлырхыз ахачIвы нхара щарда гIацIанакIитI. АпIатла йахъымсуата ауи шырзырхъйуш йазхъасцIитI, – йхIватI Новак Александр. Марков Владимир йшгIаликIгIазла, Темрезов Рашид Къарча-Черкес акытква псабара газла йаддйыргалуата нхара ду акIвйыршитI, «Газпром» ПАО знапIыцIу аргваныта дрыцынхитI, дрангIалитI. – РФ а-Президент Путин Владимир Россия агородква, акытква, акъвтырква, апоселокква зымгIва асквш 2030-дза псабара газла йадыгIгалырныс гIахIыхъвдаквицIатI. Къарча-Черкес апны ари ауысла анхараква шакIвшауа акIвызтын, уахьчIвала газ змам акытква зымгIва асквш 2025-дза ауи рзынадзуштI. Ареспублика зымгIва псабара газла йадыргалуата, ауагIа рбзазара агъьырчIвуата КЧР а-Хъада Темрезов Рашид йгьи «Газпром» ПАО знапIыцIу Миллер Алексей ангIалра адырчпалтI. Анхараква ага йбаргвызтынгьи, агIвхъатакIгьи йлырхыз ахачIвква дмырхъйауата йыгьгIаныржьуашым, – йгIаликIгIатI Марков Владимир. Темрезов Рашид Къарча-Черкес псабара газла йадгалра йъацыркIуа ахъазла РФ а-Правительства, «Газпром» ПАО рунашвачпагIвчва дшырзыразу йхIватI, йгIайззаз ауагIа агвыргъьахъвла драйхIвахIвтI. Къарча город утыцIта Домбайдза акытква жвасквшапхьадзара рхъыцIуазтынгьи, псабара газ рзыргауа йалагищтара сквшквакI ракIвпI йцIуа. Домбай курорт псабара газ азыргауата анхараква ауи апхъала йджвыквырцIатI, газ гIахъазцылуа аргIапсгаква, ауи злацауа атрубаква зларуыхваз ахча КЧР абюджет йгIаунащттI. КЧР а-Мш андыртлапIуз Къарча район апны йгIахъыртIыз аобъект шIыц абзирала Новая Теберда, Верхняя Теберда кытква йгьи Теберда город рпны агIвнабзазартакви асоциальна нхартаква зырпхауа жвакотельнакIи газ рзынадзуштI. «Къарча–Теберда–Домбай» газомагистраль ауыхвара асквш 2022 агIан йалдыргарныс йаквдырпшитI. Асквш 2020 ноябрь агIан хIреспублика псабара газла йадыргалуата ахачIвква швъала йдрыбагъьатI. Асквшква 2021–2025 руацIа хIреспублика псабара газла йадгалрала анхараква рыласра йазалху апрограмма Темрезов Рашид йгьи Миллер Алексей йацыркIтI. Ауи йшгIанахIвауала, хIреспублика апны псабара газ йазыбжу зымгIва ауи рзыргауата анхараква асквш 2026-дза йалдыргара атахъыпI. Апрограмма апкъ йтата агазцагаква, ауи гIахъазцылуа аргIапсгаква руыхвуштI, йтIахсахаз атрубаква рпсахуаштI, ауат швыга гIважь рхьырщуаштI, Къарча йгьи Уарп районква рпны кыт 21 рбзазагIвчва газ гIадрысабапра ахъазла йатахъу зымгIва рчпуштI. УахьчIвала «Газпром межрегионгаз» аъачIвагIагIвчва Къартджьурт, Хвырзыгв, Учкъвлан кытква псабара газ шырзыргуш йазхъвыцуата йатахъу ашвъаква дрыхIазыритI, агазцагаква руыхвара ауысла апроектква йрыдынхалитI. Ари анархарала ахачIвква асквш 2024-дза йалдыргара атахъыпI. Къартджьурт, Хвырзыгв, Учкъвлан датшагьи ауат йырчвыхъарам акытква псабара газла йадгалра йазынарху апроект дырхъйарыквын, унагIва 1800 рпны «амца чIыхв» гIакIкIуштI. Къарча-Черкес апны газ ззыргахьаз акытква рпны ауи кIылзымгас рунагIваква «амца чIыхв» ласыта йгIакIкIара ахъазла йатахъу зымгIва рчпитI. Ари ауыс йахъпшылуа ареспублика штаб КЧР а-Хъада Темрезов Рашид йунашвала йгIандыршатI. Анхараква асквш 2022-дза йалдыргара атахъыпI.