АБЫЗШВА АРДЫРРА ЙАЦХЪРАГIУШТI

Адуней апсыуа-абаза конгресс ЙхІаракІу асовет аунашвачпагІв, йбергьльу ахІаракьатчпагІв, зуагІахъа рылахь магІын ду азызбауа хІхаквлагІв ЭГЬЗАКЬ Мусса ХIабальа йпа унашва зхъицIауа «Алашара» жвлара адкIылара гIаншищтара абаза бызшва, акультура ргIахчара йгьи ртшауацIыхра йазынархата, хIуагIахъа рызгIвадара агъьчIврала, абанпара аспорт йазаргванчIврала уыс бзи щарда дырхъйитI. Ауат йрыуапI абаза бызшва атшауацIнарыхра йгьи ахвыцква ауи ахьыла разыгIальаматра йалархIара йырзынарху анхараквагьи. «Алашара» жвлара адкIылара йаланакIуа «Абаза бызшва» хъвшара унашва ахъызцIауа ДЖЬАНДАР Мурат Анатолий йпа абаза бызшвала арыпхьагIвчва йгьи асабигIзартаква рпны йынхауа абжьагIвчва рынхара апны цхърагIагата йырзалуаш асаби дидактика хъвмаргаква, Интернет апны йаныргIалу абгъьыцква шгIауауаш, датшагьи йапшым ауысква абзазара йшаларжьуала ахабар хIыцагIвишатI. Джьандар Мурат йшихIвазла, абаза бызшва йазынарху хIхаквлагIвчва ргIаджвыквцIараква «Алашара» адкIылара джьгарта йрыцыркIитI. – АуыжвгIанчIвиква йапшым агаджетква рымамкIва рбзазара рыла йыгьрызгIацIажьхуам. Ауат зымгIва, йшыгIдыруа апшта, урышв йа датша бызшвала акIвпI «йызлагIахIачважвауа». ХIаргьи азаман хIацчIвырхъауата, абаза йгьи абхаз бызшва ззырдырырныс зтахъу йгIадрысабап ауаш амобильна приложениеква абзазара йалагIжьитI. Play market йгьи App Store рпны «Алашара» жвлара адкIылара йгьи «Крыммедиаком» хIацынхауата хприложениекI – «Апхьадзараква», «ХIарыфба», «Апсыуа-урышв ажвар» – лыхIхтI. «Апхьадзараква» хъвы апны дзачIвызлакIгьи дпхьадзауа тшизыбжьуштI. Ауи апхьадзара асуратгьи гIанарбитI, ахIващагьи гIаунахIвитI. «ХIарыфба» апны абаза хIарыфква ууырдырырныс уылшуштI. Ауаъагьи йара ауи апшта ахIарыф агIвыщагьи ахIващагьи урыханаргIвазитI йгьи ауи ахIарыф уъашIашвауа ажваквагьи гIаунахIвитI. «Апсыуа-урышв ажвар» апны ажваква йгIарныцIуа йгьи ауат ргIаншаща аныпI. Ауи абызшва атшауацIнарыхра йгьи арбайара йацхърагIушта хIайгвгъитI. Ауат абгъьыцква зымгIва чIарачIата йаныргIалпI, дзачIвызлакIгьи дшхънахуаш, абаза бызшвала йазыгIальаматра йшаланархIуш йырзынархапI. Йызтахъу йтелефон апны йгIатайрышвта тшрыхайыргIвазарныс йылшуштI – йгIаликIгIатI Джьандар Мурат. Ауи йшихIвазла, Интернет ашIыцраква аларцIапхьадза ахприложениекIгьи рынхара шапымшвтуаш апшта йгIадыршIыцхлуштI. ХIыбызшва ззырдырырныс зтахъыта ауи апш лшара змам агIвымакъральква рпны йбзазауа абызшва ддырдырырныс рылнаршуштI. ЙащтагIайуата сентябрь агIан абзазара йаларжьтI «ШварагIвара злу йгьи йызлам», «Асурат адкIылх» дидактика хъвмаргаквагьи. Арат ахъвмаргаква лызхыз Псыжв йаныргIалу «Алашара» сабигIзарта аунашвачпагIв Ачбокъва Зурида СултIан йпхIа лакIвпI. Сквш 27 цIуата арыпхьара йалу аъачIвагIагIв рынхара апны йатахъу бзита йылдыритI, арат адидактика хъвмаргаква лылхтI. Ауат ргIацIщтра йацхърагIаз «Алашара» жвлара адкIылара лразыра ажваква рзыналырхитI. «ШварагIвара злу йгьи йызлам» хъвмарга асабигIзартаква рбжьагIвчва цхърагIагата йырзалуаштI. Ауи ахвыцква рызгIвадара ахчара йазынархапI. Асаби дызхьыс ауаш йгьи шварагIвара злу апкъыгIваква рыцIа майрата йгвникIылра ахъазла ауат рсуратква йдырбауамца дрыхадыргIвазуштI. Ахвыц йдырбауа акарточкIаква йапшым апкъыгIваква рныпI. Ауат аунагIва апны дызшIашвауа апкъыгIваква ракIвпI. ЙгIауахвырквын: чIвымыгъ, хъышв, хъвшвы, сарныкь, айту, гвыр, хIваспа, кIьанджьы, топ, йапшым ахъвмаргаква. Асаби ауат дызхьыс ауаши йамуаши гIвгвыпкIта йалихра атахъыпI. АкарточкIаква ахвыцква йшрымагIальаматхуш апшта чIарачIата, рнадзара хIагIата йчпапI. «Асурат адкIылх» дидактика хъвмаргагьи асабигIзартаква йцауа ахвыцква йырзынархапI. Ауи гIвбата йагIвшу акарточкIаквали ауат рсурат абгаквали йалапI. АбжьагIвы йдлырбауа асурат ахвыцква йалырссу йгIарылырххта апазлква рапшта абгата йадыркIылхра атахъыпI. Арат ахъвмаргаква асабиква ршварагIварадара йазынархапI. Ачбокъва Зурида йлылхыз адидактика хъвмаргаква асабигIзартаква рбжьагIвчва рынхара апны шIыцрата йалалуаштI йгьи асабиква абаза бызшва дырдырра йацхърагIуштI. Йхпахауа уыста сынчIва «Языковая среда» проект абзазара йалалуаштI. Джьандар Мурат йшихIвазла, абызшва азаман йацчIвырхъауата тшауацIнарыхра магIын ду амапI. – ЙцIыхъвахауа ажвасквшапхьадзараква ангьльыз бызшва адунейла тшауацIнахитI. Йапшым акъральква рбзазагIвчва абагвынгIвра ахъазла щардагIвы ангьльыз бызшва гIалырхитI. СквшигIадза атехнологияквагьи тшауацIырхитI, пкъыгIва щарда гIаншитI. Абызшва йадынхалуа апхьахьаква мшигIадза абзазара шIыцрата йгIалалуа йрыквыргIапсу ажваква лырхитI. ХIаргьи ажва шIыцква хIчважвара апны йгIахIрысабапуа хIалагитI. Ауат ршвапхала абаза бызшва атшауацIыхра, арбайара йырзынарху ауысква акIвхIыршитI. Абаза бызшва йадынхалуа зымгIва рацынхарала сынчIва неологизмта 14 абзазара йалагIжьуаштI. Ажваква йхIыму алацIащала йгIаныршапI. Ауат атаблицаква абзазагIвчва кытипхьадза йкIыдхIцIарныс хIгвыгъапI. ХIбзазара апны йгIахIымрысабапхуа апкъыгIваква алшвтпхьадза ажваквагьи ажвырахитI. Ауат ртарала йгIалалуа ашIыцраква рыхьызква абазала йгIахIымхъвыцырквын, хIыбызшва злалу ажваквагьи рпхьадзара мачIхуштI. ХIчважвара апны йгIахIрысабапуа урышв йгьи датша абызшваква йгIархъыху ажваква рпхьадзара йалахIуштI. Абызшва абайара йалымдзгIара ахъазла анеологизмква урыдынхалра магIын ду амапI, – йхIвитI ауи. Джьандар Мурат ауат ажваква раныргIалра йгьи ргIацIщтра йадынхалыз Тльабыча Шамиль йгьи асуратгIвгIв Джьджьу Рустам аразыра ажваква рзынайырхитI. – ЗымгIвагьи хIкъаруква адхIкIылта, хIуагIахъа руачIвымш агъьчIвра, абаза бызшва атшауацIыхра хIазынхарквын, хIапхъала йхIыргылуа амурадква гIахIдахIвуаштI. ЙгIадзынгылуа абанпара рыбызшва хвы аквырцIауа, бзи йырбауа йхIзыбжьуштI, – йрыбагъьитI Джьандар Мурат.