Декабрь а 11 КЧР АуагIа Айззара (а-Парламент)
йызкьазууым й-49-хауа
алачIвара апны адепутатква цуыскI йрылапштI.
«Къарча-Черкес Республика АуагIа Айззара (а-Парламент) адепутатква ралхра ауысла» КЧР а-Хабза
апсахраква аларцIатI. Ауи
йшщаквнаргылуала, РФ
а-Уголовна кодексла йдыркъванчауа рхIаквым ъадзархауа рунагIва йгIаджвылцIырныс йадымрыхвитуазтынгьи, алхраква рагIан напIы щтIырхырныс рылшуштI. Хабзалыхрала йгьи къральыгIва
уыхварала КЧР АуагIа Айззара (а-Парламент) акомитет апредседатель
УМАЛАТОВ Владимир
ари ауысла йшихIвазла,
ауаса зхвитнагIаква ахъарысу акъральгIвчва алхраква рагIан рпны йшыгIвну напIы щтIырхырныс рылшуштI.
– РФ а-Уголовна кодексла йдыркъванчауа рунагIваква ари ауыс адызгалуаш алхра участкIаква
рынхагIвчва ракIвпI. ХIыздынхалхыз «КЧР АуагIа
Айззара (а-Парламент)
адепутатква ралхра ауысла» а-Хабза алхра фондква анапIщтIыхраква йрыквдрыдзуа ахчагьи щаквнаргылитI. Апхъала сом жвыхвмильуанкI айхIа алхраква
йрыквдрыдз йгьахвитмызтI. Ужвы сом мильуан
50-дза гIадрысабапырныс ахабза йархвититI, –
йхIватI Умалатов Владимир.
Адепутатква бюджет
нархара зму гIвхабзакI
йрылапштI. «Асквш 2018
агIан Къарча-Черкес Республика абюджет йгьи
асквшква 2019–2020 рагIан ахачIвква руысла»
КЧР ахабзапроект апсахраква аларцIатI. Ари ауысла йгIачважваз афинансквала КЧР аминистр йапхъахауа йзаместитель ДАРЫМВА Неля йшылхIвазла, асквш 2018 агIан
абюджет йналогу йгьи
йналогым ахъахIараквала ахча сом зыкь 96250,8-ла
ймачIхатI. Йара ауаса, сынчIва йхъындмырхIвыхуашта абюджет йгIалалыз ахчагьи сом зыкь 3749,3-ла
йахъадрыстI. Ауаса, асубвенцияква сом зыкь 14111,
1-ла йрылахIатI. Ауат алдзгIараква гIарпхьадзан,
асквш 2018 агIан КЧР
абюджет ахъахIарагьи акврыдзраквагьи сом зыкь
100000,1-ла йахъадрыстI.
Асессия апны «Асквш
2018 агIан медицина хъыхчарала Къарча-Черкес Республика а-Фонд (ТФОМС)
абюджет йгьи асквшква
2019–2020 рагIан ахачIвква руысла» КЧР ахабзапроектгьи апсахраква аларцIатI. Ари ауысла адепутатква рпахь йгIачважваз
ТФОМС адиректор ДЖАНКЕЗОВ Айдемир йшихIвазла, сынчIва амедицина хъыхчарала ашIыпIа
фонд йгIалалыз ахчаква
йгьи асквш 2018, январь
а 1 агIарбараквала йгIаншаз агIахъыршвалраква
щаквдыргылуата ахабза
йадынхалхтI.
– КЧР ТФОМС ахъыхчара щтIацIачIвы сом зыкь
36860,60-ла йалахIитI йгьи
сом зыкь 690660,60 йнадзуштI. Медицина хъыхчарала ашIыпIа фондква
рбюджетква йгIархъшвалыз ахчагьи сом зыкь
260,60-ла йалдзгIатI, –
йхIватI Джанкезов Айдемир.
Апсахраква зларцIаз
ахабза адепутатква йацшIакIта йацыркIтI.
Адепутатква датшагьи
республика хабзаквакI
афедеральна хабзалыхра йаквшвара ахъазла
апсахраква рыларцIатI,
йкIьыду хабзалыхра актквакI къару шрымахым
щаквдыргылуата анапIщтIыхраква акIвдыршатI
Получайте свежие новости на электронную почту
Комментарии