Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева Актуально Четверть сотрудников компаний КЧР по неосторожности «сливают» рабочие логины и пароли интернет-мошенникам Актуально Представителей IT-индустрии КЧР пригласили на бесплатный вебинар по акселерационной программе от Минцифры России

АБАЗА РАЙОН АРЫПХЬАГIВЧВА РАЙЗЗАРА

09.09.2020 113
АБАЗА РАЙОН АРЫПХЬАГIВЧВА РАЙЗЗАРА
Ансисквша август ацIыхъва Абаза район ауацIала арыпхьара нхартаква рунашвачпагIвчва рлачIвара акIвшитI. СынчIва август а 28 агIан йызкьазуу аконференция АлбыргIан квтанай апхьарта апны йадыргалтI. Ари атшын ауагIахъа проектква абзазара йалажьрала арыпхьара алшара шIыцква йырзынархаз алачIвара йалан Абаза район апхьартаква, асабигIзартаква, арайон ршIыйара Квта рунашвачпагIвчва, асквш ауацIа згIарбараква бзийыз арыпхьагIвчви абжьагIвчви. АунашвачпагIвчва коронавирус ашIашIкIгIара йгIалцIла ашварагIварадара амальква дырхъйауата уагIа щарда гьазрымддатI, арыпхьагIвчва райззараква дасу йапхьарта апны йакIвдыршахуаштI. АлачIвара гIахъылтIуата Абаза муниципальна район администрация арыпхьарала йгьи культурала а-УнашвахъцIарта ахъада МАРТАЗА Зимфира МхIамат йпхIа йагIвсыз апхьара сквшы ацIыхъваква коронавирус ашIашIкIгIара йгIаннаршаз аъаща йтагылата апхьартаква рынхагIвчва йапшым амальква гIадрысабапуа рхъвдаквцIараква нардзата йшдырхъйаз гIалылкIгIатI йгьи апхьара асквш шIыцла драйхIвахIвтI. Ауи амщтахь артшхъвагаква гIазквнадыргаз йрылттI. «Почетный работник воспитания и просвещения Российской Федерации» гвплацIа – Къвбина квтанай апхьарта абаза бызшвали литературали арыпхьагIв ДОХВТА Нурхан Къасбот йпхIа, Псыжв йгIвбахауа апхьарта биологияла арыпхьагIв МЫКВА Светлана ХIасин йпхIа, Псыжв йапхъахауа Гимназия апычIв классква рарыпхьагIв РЫСТА Светлана Алик йпхIа йгIарквнадыргатI. Арыпхьарала Россия Федерация а-Министерства а-ЧIахIра грамота АлбыргIан «Аленушка» сабигIзарта абжьагIвы КЪВАЧ Марйана Борис йпхIа йлырттI. Къарча-Черкес Республика а-Правительства а-ЧIахIра грамота – Ардзынба Владислав йыхьыз зхъу Къарапагва арыпхьара Квта математикали физикали арыпхьагIв КIЬЫЩМАХВА Дина Дольат йпхIа йгIалквнадыргатI. Къарча-Черкес Республика арыпхьарала йгьи наукала а-Министерства а-ЧIахIра грамотала йгIалыркIгIатI Псыжв «Звездочка» сабигIзарта аунашвачпагIв МАЛХIВАЗ Маргарита Сальымгьари йпхIа, АлбыргIан квтанай апхьарта апычIв классква рарыпхьагIв ХIАМЫКЪВА Октябрина МащкIа йпхIа, Къвбина квтанай апхьарта апычIв классква рарыпхьагIв ХIАШВЦIА Аминат Аркадий йпхIа. ЙагIвсыз апхьара сквшы Россияла йакIвшаз «Асквш арыпхьагIв – 2020» анкъвакъвра йалата Абаза районла йхътIу апхьара сахIатква АлбыргIан квтанай апхьарта апны йадызгалыз арыпхьагIвчва ачIахIра грамотакви асогIакви рквнадыргатI: Къарапагва арыпхьара Квта физикала арыпхьагIв КIЬЫЩМАХВА Дина Дольат йпхIа – й-1-хауа агыларта, АлбыргIан квтанай апхьарта апычIв классква рарыпхьагIв ХIАМЫКЪВА Октябрина МащкIа йпхIа – й-2 хауа агыларта, Псыжв йапхъахауа Гимназия математикала арыпхьагIв ШОГЬАН Светлана Руслан йпхIа – й-2-хауа агыларта, Къвбина квтанай апхьарта апычIв классква рарыпхьагIв ХIАШВЦIА Аминат Аркадий йпхIа – й-3-хауа агыларта, ЙынджьыгьчкIвын квтанай апхьарта абаза бызшвала арыпхьагIв ДЖЬАНДАР Лилия Муса йпхIа, Псыжв йгIвбахауа апхьарта географияла арыпхьагIв НЫР Анжела ХIасамби йпхIа. Абаза муниципальна район администрация а-Хъада й-ЧIахIра грамота Псыжв йапхъахауа Гимназия урышв бызшвали литературали арыпхьагIв ПШНАТI Марина МхIамат йпхIа, Псыжв йгIвбахауа апхьарта информатикала арыпхьагIв КЪАРМА Людмила Борис йпхIа, АлбыргIан квтанай апхьарта абжьара уысквала адиректор лзаместитель МЕРЕМКЪВЫЛЬ Мадина Маджьид йпхIа, ЙынджьыгьчкIвын квтанай апхьарта апычIв классква рарыпхьагIв ДАХЪВМА Марина ИсмагIиль йпхIа, Абаза район азъазара Квта анхагIвы ПЛЕХОВА Елена Валерий йпхIа, ЙынджьыгьчкIвын «Амра» сабигIзарта абжьагIвы ЦЕКЪВА Кристина Заудин йпхIа йырквнадыргатI. Ауи атшын зыхьыз рхIваз арыпхьагIвчви абжьагIвчви руыс йшазъазу, рхъвдаквцIараква нардзата йшдырхъйауа чакь гьалам, ауат агIатгара дуква йырзынадзарныс ахIвахIвра ажваква рзынадырхатI. – УахьчIва хIыззайззаз йагIвсыз апхьара сквшы шнахIырдзаз йгьи йгIаталуа апхьара сквш шIыц апны хачIвыта хIпахь йгылу хIрыквчважварныс акIвпI. Йшыжвдыруа апшта, Къарча-Черкес Республика а-Хъада Темрезов Рашид йунашвала асквш 2020 арыпхьара йа-Сквшта йщаквйыргылтI. Ауи йгIалцIла йгьи «Образование» уагIахъа проект апкъ йтата арыпхьара уысква рагъьчIвра хачIв хъадата йхIпырапI, – лхIватI Мартаза Зимфира. – Абаза район йаланакIуа арыпхьара организацияква рпны «Образование» уагIахъа проект ажванархаракI йрыуата апщбала йынхитI, ауат йрыуапI «Демография», «Современная школа», «Успех каждого ребенка», «Цифровая образовательная среда». СгIачважвара апны саквгIашIасра стахъыпI арат анархараквала арайон ауацIа псахрата йыншаз. «Демография» проект асабигIзартаква рпны асаби тыпква йрылархIара йазынхитI. ХIрайон ауацIала хысквша йырту рпны угIалагата быжьсквшадза асабигIзарта йаныргIалрала гIапсара гьаъам, хысквша йгьи рыцIа йайцIбачву тып рызгIахIауырныс йхIхачIв хъадапI. Ауи ауыс хIырхъйауата АлбыргIан апны сабигIзарта-ясля шIыц ауыхварала анхараква акIвдыршитI, йащтагIайуа асквш абзазара йаларжьуаштI. Ауи амщтахь Къвбина кыт апынгьи сабигIзарта шIыц гIаншушта хIгвыгъитI. ХIызту аъаща шIыц апхьарта йыцIамылс асаби йтахъу нахъауата дгIадзынгылра ахъазла асабикви ран-рабачви рыдынхалща амальква псахра атахъыпI. Ан-абачва абжьара уысквала рдырраква агъьчIвра ахъазла «Саби зму атгIачваква рцхърагIара» проект апкъ йтата акьангьашра квтаква гIаныршара атахъыпI. УахьчIвала хIреспубликала ауи йапшу хквтакI нхитI. Ауат йрыуапI «Мамонтенок» сабигIзарта апны йаныргIалугьи. Ауат ангIалра рыдхIчпалын, ан-абачва йаныртахъу разцIгIараквала тшырзынадырхитI. «Современная школа» нархарала асквш 2021 Псыжв йапхъахауа Гимназия йшварагIвару аъаща йту атдзы ахъвы хIырчIаджьырныс хIылшуштI, ауи асабиква кьазукIта йапхьарныс рылнаршуштI. Ари апроектла цIыпх АлбыргIан йгьи Псыжв йгIвбахауа апхьартаква рпны «Точка роста» квтаква рынхара джвыквырцIатI. ГIвба-гIвба кабинет йнадзауа аквтаква уыжвгIанчIви ъамапсымала йадгалапI, апхьагIвчва йрымаджьащахъвата йынхитI. Йцауа асквш апны ЙынджьыгьчкIвын йгьи Къарапагва квтанай апхьартаква рпны «Точка роста» квтаква гIахъхIтIуаштI. Ауат рыхъазла йазалырхыз апещква йыззыбжу зымгIвала йадыгIгалуаштI. Ауат аквтаква рынхара джвыквылра апхъала арыпхьагIвчва рдырраква йрыладырхIауата акурсква йырхъыстI, атехника шIыцквала йынхауа тшырбжьатI. «Успех каждого ребенка» программа арайон йауата хвапхьартакI йгьи аршIыйара Квта алалтI, дасу йара йнархарала дынхуштI, ауи апхьагIвчва рапхъахьыла йыръачIвагIахуш агIалхра йацхърагIуштI. «Цифровая образовательная среда» программала арайон апхьартаква зымгIва ласыта йынхауа Интернет рызкIылыгIгуштI, йапхъахауата йзадзуш Къвбина йгьи Псыжв йапхъахауа Гимназия апхьартаква ракIвпI, сынчIва ауат ауыжвгIанчIви ъамапсымаква гIарадзуштI». Мартаза Зимфира йшгIалылкIгIазла, йапшым афедеральна программаква згIадрысабапуа, арчIаджьра нхараква закIвдыршауа, апхьартаква уыжвгIанчIви ъамапсымала йзадыргалуа арыпхьара агъьырчIвырныс акIвпI. Сентябрь а 14 угIалагата октябрь а 12-дза йхвбахауа – йжвбахауа аклассква рапхьагIвчва архъвыхра нхараква (ВПР) ргIвуаштI. Ауат апхьагIвчва роценкIаква йыгьрызарархушым, йагIвсыз апхьара сквшы шалдыргазла рдырраква гIадырцIабыргуаштI. Айззара апны апхьартакви асабигIзартакви рунашвачпагIвчва апхьара сквш шIыц шджвыквырцIушла йгIаншаз азцIгIараква йрыквчважватI. Ауат йрыуата рыцIа йхъадаз апхьагIвчва коронавирус ашIашIкIгIара шIыц йшачвырхчуши хIкъраль а-Президент Путин Владимир йапхъахауа – йпщбахауа аклассква рапхьагIвчва хвыдъа фачIв пхала йадыргалырнысла йунашви йырпщылу ахачIвква ракIвын. Абаза район йаланакIуа апхьартаквагьи асабигIзартаквагьи рпещква цкьата йалыргапI, щарда цIуата йрыгхаз асабиква рдауыш йазпшитI. ЙызгIваду асабикви зкъару ту арыпхьагIвчви абжьагIвчви рыгымхаргIатI!
113 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный