АБАЗА ЧКIВЫН ДДЫРТШХЪВИТI

Красна Восток кыт йбзазауа ПщунаргIа рткъвым анхара йгIацIагылыз, ауи зща йалата йбзазауа йрыуапI. Гвым псыхIвала йыхьыз гвапата йдйырхIватI асквш 1904 агIан КъамбиргIа ртыдзква рпны йгIахъыртIыз апычIв апхьарта йапхъахуз апхьагIвчва йрылаз Пщуна ХIаджьисмель. Ауи асквш 1923 агIан КъарчачкIвын районла йапхъахауата акыт йгIандыршаз акомсомол ячейка анхара джьгарта далан. ХIаджьисмель Ворошилов йыхьыз нкъвызгуз аколхоз дапредседательта, адгьылрхарджьыгIвчва гвып друнашвачпагIвта, акыт йапхъахауата электрокъарула йадызгалыз, асквш 1952 агIан йгIахъыртIыз а-ГЭС ауыхвагIвчва дырбригадирта дынхатI. АдгалагIв бзита йырпхьадзуз, ауагIа йракъыльагIвыз ХIаджьисмель асквш 1952 агIан йкытлагIвчва Къардан МухIамад йгьи Лоу Джьамботгьари йыцта Москва акытмлыкврхIара гIарбарта (ВДНХ) дырщтитI. Асквш 1929 агIан акытла йапхъахауата йгIандыршаз Ворошилов йыхьыз нкъвызгуз аколхоз дапредседательын ХIаджьисмель йащайцIба Пщуна Быда. Асквш 1941 агIан алетчикква ъадрыхIазыруаз аучилища дгIалган, штурманта агъа фырта дипшIагылтI щтадъа йыдзыз Пщуна Дзадзу. ЙгIадзынгылуа чкIвыныргIа рыхъазла щта пшдза гIаныржьтI АйсраТенгьыз флот апны къвырльыкъв зхаз, зоотехникта, ахшгIахьарта ферма йаунашвачпагIвта йынхаз, ъачIвагIагIв гвыбзыгъата тшгIазырбаз Пщуна Зураб, амеханизатор ъаза Пщуна ДадакIара, Афганистан апны зинтернационал борч ртшхъварала йзырхъйаз Пщуна Банчыкв датшагьи. АхIбачва рыщта пшдза йбзазара йамгIвата, аткъвым ртурых хъардугата йпхьадзауа дгIадзынгылтI ПЩУНА Азамат Владислав йпа. Ауи йани йаби йыларцIаз ахIаль пшдзаква йырхъазымкIва, Кълыч Рауф йыхьыз нкъвызгауа акыт аквтанай апхьарта апычIв классква дазрыпхьаз ГIап ГIайщат Макьраъиль йпхIа йгьи йхвбахауа акласс йгIашIарышвта йжвбахауа аклассдза зунашва дацIаз арыпхьагIв Шау ФатIима Заудин йпхIа дырра цIола гIайырттI, абзазара ахабза хъадаква рымгIва дтадыргылтI. Азамат апхьарта йакIвшуз йапшым аспорт анкъвакъвраква джьгарта дрылалуан, арахвырхIари атшырхIари йырпщылаз йаба цIагылагIв багъьата дизалуан. Ауи атшква дырхьпшныс, йгIайрыгIвырныс бзи йбун. Йгьызным ауи ансисквша акыт йакIвшалауа атшрыгIвраква дъадзарылалыз. Асквш 2014 агIан Пщуна Азамат жвкласскI дгIарылгатI йгьи Черкесск йтагылу МЧС аъачIвагIагIвчва ъадрыхIазыруа апхьарта дыцIалтI. Ауаъа пщысквша дапхьатI, ауат асквшква руацIала йапшым аспорт квпшыраквала йакIвшуз анкъвакъвраква дрылалуан, дабакIырныс бзи йбун. Ауи Ставрополь йакIвшаз абакIрала анкъвакъвраква рпны апхъагылара гIатигатI, согIа ацта диплом гIайквнадыргатI. Асквш 2018, май а 25 Пщуна Азамат ар къвырльыкъвхара дызшIырттI. Ауи Пятигорск йаныргIалу «Росгвардия» йадырбагъьалу архъв апны къвырльыкъв йхитI, машина даквчIвата айсыгIвчва нкъвигитI. – Сара хIкъраль а-Президент Путин Владимир Владимир йпа йунашвала йгIанйыршаз «Росгвардия» амч шдуу, хI-Псадгьыл ахъатаква зымгIва рхчара йшазгылу ансагIа ауаъа къвырльыкъв ухарныс шчIахIру сыласхIватI йгьи ауи асатыр салазларныс стахъхатI, – йхIвитI Азамат. – Смурад ъагIасдахIвыз чIахIра дута йспхьадзитI. Абаза чкIвын архъв знапIыцIу хачIвыта йыздыргылуа джьауапкIра алата йъайырхъйауа, йкърар ъабагъьу ахъазла йгьызным дъадзадыртшхъвахьу. ДзыгIзаз, дгIадзынзыргылыз, дазрыпхьаз арыпхьагIвчва аразыра ажваква гIарзынадырхахьатI. АчкIвын йкомандирква дъадыртшхъвауа йаба Владиславгьи йан Анжелагьи, йахщчва Иннагьи Заирагьи айгвыргъьитI. «Азамат йабаду йаба ХIаджьисмель, йабаду Зураб, аткъвым зымгIва рыхв ъанаймыркъвуа, дгIазлыцIыз ауагIахъа рыхьыз пшдзарала йъайыргауа хIизыразпI, хайырла АлахI дгIахIылайгахыргIатI», – рхIвитI йхабар загIаз зымгIвагьи.