Актуально Представителей IT-индустрии КЧР пригласили на бесплатный вебинар по акселерационной программе от Минцифры России Актуально Врач рассказала, кому категорически противопоказан кофеин Актуально В КЧР определили победителя регионального этапа Всероссийского конкурса »Учитель года России» - 2024 СКФО 1,4 млн тонн ставропольской сельхозпродукции продали за рубеж в 2023 году СКФО В Дагестане временно закрыли зоопарк из-за отсутствия лицензии

АБАРГВЫРАКВА РРЫДЗРА ЙАЗГЫЛАПI

26.07.2019 203
АБАРГВЫРАКВА РРЫДЗРА ЙАЗГЫЛАПI
Июль а 12 Россия УагIахъа фронт (ОНФ) КЧР-ла ахъвшара аштаб алачIвара апны хIреспублика абзазагIвчва знадзара хIагIу дзыла йадгалрала анхараква йрылачважватI. Айззара йалаз йшгIалыркIгIазла, акытква рбзазагIвчва ансисквшагьи апхынла дзыла йгIапситI. ОНФ КЧР-ла ахъвшара асопредседатель ЖДАНОВ Геннадий йшихIвазла, асквш 2018 агIан «Роспотребнадзор» федеральна къвырльыкъвхарта йакIвнаршаз архъвыхраква йшгIадырбазла, хIреспублика адзы ауысла абаргвыраква ъащарду хIкъраль асубъектква йрылапхьадзапI. – ХIреспублика акытква рбзазагIвчва йгIадрысабапуа адзы анадзара уарыразуашта йгьаъам йгьи ауи процент 66,1-ла асанитар хабза тахъыраква йыгьрыквшвум, – йгIаликIгIатI Жданов Геннадий. Акытква рбзазагIвчва йгIадрысабапуа адзы аъаща йауацIыхта даквчважватI «Роспотребнадзор» КЧР-ла а-УнашвахъцIарта знапIыцIу йзаместитель Овчинников Александр. Ауи йшихIвазла, хIреспублика акъральгIвчва рпроцент 57 (26792-гIв) акытква рпны йбзазитI. Ауат рызбжа ракIвпI дзыцкьа гIазрысабапуа. Арахьарат (зыкь 139-гIв) йрызцауа адзы ацкьаралагьи анадзаралагьи асанитар хабза тахъыраква йыгьрыквшвум. – «Роспотребнадзор» КЧР-ла акъвырльыкъвхарта анхагIвчва хIреспублика арайонква рбзазагIвчва йгIадрысабапуа адзы анадзара запыт йдырхъвыхлитI, – йхIватI Овчинников Александр. – АцIабырг схIвапIта, дзы шрадзауа, ауи аъаща йазыразым ауагIа щардагIвыпI. АъачIвагIагIвчва акытква рпны йгIазыркIкIуа адзы асанитаргигиена нормаква йшрыквшвауа дырхъвыхуата алаборатория нхараква акIвдыршитI. Асквш 2018, декабрь а 31 агIарбараквала, АдыгьахIабльа, НагIвай, Зеленчук, Къарча, Абаза районква рпны адзы ауысла абаргвыраква рыцIа йщардапI. КъарчачкIвын районла йакIвшаз архъвыхраква йшгIадырбазла, акытква рбзазагIвчва йгIадрысабапуа адзы анадзара пщпроценткIла акIвпI асанитар-гигиена нормаква йызларыквымшвауа. АъачIвагIагIв хIреспублика апны адзы анадзара знакъву ашвхIаусыгIваквагьи дрыквчважватI. Овчинников Александр йшихIвазла, акытква дзыла йадызгалуа аргIапсгаква, адзцагаква ъажвыз йгIалцIла абаргвыраква гIаншитI. – Акытква дзыла йадызгалуа астанцияква нхарыгьи, йажвыз адзцагаквала аунагIваква дзпIай рызцитI. Адзы зрыцкьауа аргIапсгаква гIадымрысабапуата, адзцагаква рымпсахкIва абаргвыраква йыгьрылдзгIушым. Акытква дзыла йадызгалуа анхартаква ауатква зларчпуш ахча рымамкIва рхIвитI, – йгIаликIгIатI Овчинников Александр. ЙалкIгIата апхынла акытква дзыла йшгIапсауа йызнымкIва агазет йгIанхIцIахьатI. Ахъвыжвква дзыла йгIапсауищтара щарда цIитI. СынчIва йцIыхъвахауата йгIакваз аква чвгьа амщтахь Хъвыжвду кыт абзазагIвчва дзыдъа йгIанхатI. АдзыгIв андуха ауи атшпы йаныргIалыз астанция йузыгIащаквмыргылхуаш зарар анарадзатI. Айззара йалаз уыхварали ЖКХ-ли КЧР аминистр йзаместитель Батчаева Зульфира йшылхIвазла, Хъвыжвду кыт апны адзы йагаз астанция атара шIыц уыхвамкIва йгьауашым. – Хъвыжвду кыт администрация анхагIвчва дзы гIахъазцылуа станция шIыц уыхварала апроект йадынхалитI. Ауыс ахчата йаквшвуш анщаквдыргылра ауыхвараква шакIвдыршуш йазхъвыцуаштI, – йгIалылкIгIатI Батчаева Зульфира. Ауи датшагьи акытква дзыла йадызгалуа аргIапсгаква анптшра, йтIахсахаз адзцагаква шдырчIаджьуа йгIайззаз ахалыргIвазатI. Батчаева Зульфира йшгIалылкIгIазла, акытква рбзазагIвчва йымгIапсауата дзы гIадрысабапра ахъазла йажвыз адзцагаква псахымкIва йгьауашым. Дзы гIахъазцылуа, йызрыцкьауа аргIапсгаква гIаршIыцхра, йуыхвара атахъыпI. – Арат ауысква ймачIым ахча рыквыдзуаштI. ХIреспублика абзазагIвчва знадзара хIагIу дзыла йадгалрала апроект хIазырпI. Экономика тшауацIыхрала РФ а-Министерства апны ауи нарахвырквын, апроект апны йгIарбу ахачIвква йрыквыдзуаш ахча ахъвыкI афедеральна бюджет йгIаунащтуашта хIгвыгъитI, – лхIватI Батчаева Зульфира. Айззара йалаз ажвлара уыснкъвгагIвчва, КЧР а-Правительства агIащтийыгIвчва, агIарысабапыгIвчва рхвитнагIаква зхчауа аъачIвагIагIвчва йгьи ажурналистква дзыла йгIапсауа ауагIа зташваз аъаща баргвы йгIалызгуш амальквала ргвгIанаграква рхIватI. УахьчIвала ауысква шаъу акIвызтын, нхара ду гIазцIазкIуа абаргвыраква ррыдзра РФ а-Правительства ацымхърагIакIва ауагIа дзыла йадызгалуаш аобъектква руыхвара гьласуысхушым.
203 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный