14 МИНГ САБИЙ ЗАУУКЪЛУ СОЛУРУКЪДУ

Къарачай-Черкес Республикада бу джайгъы солуу кампанияны кёзюуюнде 14 минг сабий солур эмда саулугъун тюзетир мадар табарыкъды. Сабийле солурукъ джерлерине июнну 1-ден башлаб, къауумлагъа юлешиниб, алай джиберилликдиле. 4000 сабий шахарладан узагъыракъ орналгъан лагерледе, 1000 сабий шатыр лагерледе солурукъду, 1300 сабий да  санаторийледе саулукъларын бакъдырлыкъды. Республиканы орта школларында ачылгъан лагерледе да 6000-ден аслам сабий солуу кюнлерин зауукълу ётдюрлюкдю. Бу сабий солуу кампаниягъа 50 миллион сом джоюллукъду. Кёб сабийли эмда къыйын болумгъа тюшген юйдегиледен сабийлеге, аны кибик сакъатла бла ёксюзлеге санаторийлеге путёвкала хакъсыз берилликдиле. Башхаланы аталары-аналары аллай  путёвканы багъасыны 25 процентин тёлерикдиле. Бусагъатда сабийле солурукъ джерледе къоркъуусузлукъну болумуна къаралады, аны кибик башха хазырланыу ишле бардырыладыла. БАЙРАМКЪУЛЛАНЫ Зульфия