Черкесск шахарда «2017-чи джылны устазы» деген Бютеуроссия конкурсну муниципал этапынында алчы оруннга чыкъгъан устазланы алгъышлау болду.
- Конкурсха республиканы ара шахарыны школларында тюрлю-тюрлю предметледен дерс берген 11 устаз къошулгъанды. Аланы ичинде биринчи оруннга 17-чи номерли гимназияны ингилиз тилден устазы Назира Абдуразакова ие болгъанды, - деб хапар айтды Черкесскени мэриясыны окъуу управлениесини къуллукъчусу Хаджият Агирбова.
Ол айтханнга кёре, устазлагъа багъа берген заманда аланы сабийлеге дерс берген заманда къалай хазырланнганларына, бюгюннге джараулу методикадан хапарлы болгъанларына, усталыкъларына, билимлерини теренликлерине къаралгъанды.
Муниципал конкурс юч турдан къуралгъанды. Эм алгъа устаз бир башха школда танымагъан сабийлери бла ачыкъ дерс бардыргъанды. Экинчи турда устаз джангы методикаланы тамалында мастер-класс кёргюзгенди. Ючюнчю турда педагог кесини окъуу-билим бла байламлы проектин джакълагъанды.
Устазла барысы да бу конкурсха иги хазырланнганларын танытхандыла. Быйыл апрель айда «Джылны устазы» деген конкурсну республикан этапы ётерикди. Анда хорлагъан республиканы сыйын Москвада джакъларыкъды.
Комментарии