Бу йылдынъ 8 сентябринде, Расул Гамзатовтынъ тувган куьнинде, Дагестанда ЮНЕСКО-дынъ баславы ман озгарылатаган «Ак турналар куьнлери» Халклар ара фестиваль басланды. Белгили шайыр, язувшы, коьшируьвши, политикалык аьрекетши Расул Гамзатовтынъ эстелигине багысланган амаллама Россиядынъ туьрли регионларыннан шайырларды эм язувшыларды йыйды. Онда Россиядынъ язувшылар Союзынынъ басшылыгы да катнасты. Амаллама бу йыл отызыншы кере озгарылды. Бир неше куьннинъ бойында озган фестиваль шайырлыктынъ шынты байрамына айланды. Онынъ катнасувшылары йыйылып, шайырдынъ ятлавларын окыдылар, онынъ яшав эм яратувшылык йолы акында билдируьвлер мен боьлистилер.
Бас дегенде, фестивальдинъ катнасувшылары шайырдынъ Тарки тавында ерлескен кабырын йокладылар, сонъ онынъ Махачкалада, Орыс театрынынъ янында, орынласкан эстелигине шешекейлер салдылар. Амалламада Дагестан Республикасынынъ Басшысы Рамазан Абдулатипов та ортакшылык этти. Сонъ баьриси де шайырдынъ Махачкаладынъ Абубакаров орамында орынласкан уьйинде болдылар.
Фестивальдинъ калыбында Расул Гамзатов атлы мектепте музей ашылды эм торжестволы митинг озды. Шайырдынъ республикадынъ басшылыгынынъ шакырувы ман келген дослары оны йылы соьзлери мен эскердилер, йыйылганлардынъ алдында республикадынъ биринши вице-премьери Анатолий Карибов соьйледи.
Айтып озбага тийисли, Дагестан Республикасынынъ Басшысынынъ баславы ман эм миллетлер ислери бойынша федераллык агентствосынынъ демев этуьви мен быйыл «Ак турналар» халклар Дослыгынынъ Ордени токтастырылды. Биринши савгаларды бу йыл дагестаншылар алдылар.
Комментарии