Мы махуэхэм Къэрэшей-Черкес Республикэм и Iэтащхьэ къалэнхэр зыгъэзащIэ Темрезов Рэшид яIущIащ республикэ «Адыгэ Хасэ»-м и активым.
ЗэIущIэм къеблэгъащ КъЧР-м и Iэтащхьэмрэ и Правительствэмрэ я Администрацэм и унафэщIхэр, республикэм лъэпкъ IуэхухэмкIэ, цIыхубэ коммуникацэхэмрэ печатымрэкIэ и министр Кратов Евгений, Адыгэ-Хьэблэ, Хьэбэз районхэм я администрацэхэм я Iэтащхьэхэр.
ЗэIущIэр къызэIуихкIэрэ, Темрезов Рэшид жиIащ лъэпкъ жылагъуэ организацэхэм яIущIэныр IуэхуфIу зэрыщытыр. Абы ипкъ иткIэрэ жылагъуэ организацэхэр зыгъэпIейтей упщIэхэм, ахэр зэрызэфIаххэм зэрызыщигъэгъуазэр, властыр дэIэпыкъуэгъу зэрыхъуфынур къызэрыхалъытэр жиIащ.
— Нобэ фи жылагъуэ организацэмкIэ къыдогъажьэ лъэпкъ зэщIэхъееныгъэхэм даIущIэныр. Мыпхуэдэ зэIущIэхэр щIэх – щIэхыурэ едгъэкIуэкIыпхъэщ, дыщыгъуазэу щытын хуейщ ди цIыхухэр зыгъэпIейтей, зыгъэгумэщI упщIэхэм.
Си фIэщ мэхъу сыт щыгъуи дызытепсэлъыхьын Iуэху зэрыдиIэнур. ИкIи, мыпхуэдэ зэIущIэхэм деж дэ къыхэдгъэщыфынущ зыгъэзащIэ, хабзэкъэгъэщI властыр, щIыпIэ самоуправленэхэр жылагъуэ организацэхэм зэрадэлэжьэну упщIэхэр. Апхуэдэ Iуэху щIэкIэр щхьэпэнущ республикэм, абы щыпсэу цIыхухэм я сэбэп къыхэкIынущ, —жиIащ Темрезов Рэшид.
Мы махуэм къаIэта упщIэхэм ящыщщ къуажэ, жылагъуэ зэхуэмыдэхэм загъэужьыным, фермер Iуэхум хыхьэхэм, унагъуэ фермерствэм къэрал дэIэпыкъуныгъэ ягъэгъуэтыным, щIыуэпсым епхахэр.
Адыгэ Хасэм хэтхэм лъэIу къабгъэдэкIащ Щамым къикIыжа, ди республикэм къекIуэлIа лъэпкъэгъухэм я дэфтэрхэр ОФМС-м щIэтхэнымкIэ властым и дэIэпыкъуныгъэ зэрыхуэныкъуэм хуэгъэзауэ.
КъинэмыщIауэ, жылагъуэ организацэм и пашэхэм жэрдэм къыхилъхьащ Щамым къикIыжауэ ди республикэм щыпсэухэм щIэгъэкъуэн зыхуащIын мурадкIэ, шыщхьэIум (августым) и 1-м — Хэкум къэзыгъэзэжам и Махуэм, республикэм псапащIэ марафон щрагъэкIуэкIыну.
ЗэIущIэм хэтахэм къагъэлъэгъуащ нэгъуэщI упщIэхэри, властым и дэIэпыкъуныгъэ хэлъу лъэпкъ щэнхабзэр, хабзэхэр, лъэпкъыбзэр хъумэным хуэгъэзауэ.
Комментарии