СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

ЗУЫС ЙАЗЦIАБЫРГУ АУНАШВАЧПАГIВ

19.07.2019 264
ЗУЫС ЙАЗЦIАБЫРГУ АУНАШВАЧПАГIВ
Асаби йбзазара апны щъата йгIайыцIагылуаш адырраква ъайауа апхьарта апны акIвпI. Апхьарта анхара йшатахъу апшта йащтацауа йщаквыргылра ахъазла дырра цIола уымазлара акIвымкIвагьи ауыс уазгIашыкъызлара атахъыпI. Зынхара йазцIабыргу апхьартаква рунашвачпагIвчва дрылапхьадзапI Черкесск йбыжьбауа апхьарта адиректор КЪВАПСЫРГЬАН Шамель Зед йпагьи. Ауи асквш 1960 агIан Къвбина кыт дйытI. Апхьарта дангIалга Германия атанк рхъвква рпны механикмашинанкъвцагIвта къвырльыкъв йхатI. Ауи амщтахь Къарча-Черкес къральыгIва институт аспорт факультет дыцIалтI. Асквш 1987 агIан ауи дгIалган, Черкесск йаныргIалу йгIвбахауа апхьарта апны физкультурала арыпхьагIвта йынхара джвыквицIатI. Ауаъа жвахсквша дынхатI. Швапха бзи зырхIаз, зынхара йазгIашыкъыз арыпхьагIв асквш 2000 агIан йбыжьбахауа апхьарта дадиректорта ддыргылтI. Ужвы йъагIадзазгьи Шамель Зед йпа апхьарта унашва ахъицIитI. – Апхьарта сабита 500-гIв гIайитI, йара тыпта йаму 270 ракIвпI, хIгьыгIвнашвум. Асквш 2020 спорт площадкIа хIуыхвара хIмурадпI, – йхIватI Къвапсыргьан Шамель. Ауи йшгIаликIгIазла, сынчIва апхьарта апны рчIаджьра ду гьакIвдыршум. ЙагIвсыз асквшква агород амэрия рцхърагIарала капитальна рчIаджьра рчпарныс рылшатI, сынчIвагьи ауат апхьарта йадыргалуаш ашвыгаква рзалырхуашта йгвыгъитI. – СынчIва йжвизхауа акласс йгIалгушыз апхьагIвчва гьхIымамызтI, йауа ухIварыквын, йыжвбахауа акласс апхьарта йыцIцIхын, аколледжква йрыцIалтI. Ауаса йгIайуа асквшква аъаща рыцIа йагъьпI, йжвабахауагьи йжвизхауагьи аклассква хIымазлушта хIгвыгъитI, – йгIаликIгIатI апхьарта адиректор. Шамель Зед йпа йшихIвазла, сынчIва ОГЭ йахъысыз йжвбахауа акласс апхьагIвчва зымгIва архъвыхраква дахIврала йыркIытI. Асабиква апхьара сахIатква рымщтахь художества-эстетика, спорт, физика-математика нархараква зымагIальамату цIолата йддырдырырныс рылшитI. Ауат ракIвымкIвагьи, ахIвсса дзахра тшазырбжьитI. Къвапсыргьан Шамель йшгIаликIгIауала, апхьарта йцауа асабиква швабыжта йтынчпI йгьи йбжьапI. Ауи йшйырхъвыхызла, ауат райхIарагIв рандучви рабадучви зцбзазауа ракIвпI. АхIбачва йырбжьауа асабиква апхьарта апынгьи йгIарылукIгIитI. Ауат арыпхьагIвчва йрархIвуа зынла йрыларкIитI, урыдынхалырнысгьи рыцIа ймайрапI. ЙцIыхъвахауа азаман зыбызшва зчвыбаргву асабиква рыцIа йщардагIвхитI, ауи йгIалцIла раттестатква йырнылуаш аоценкаква бзийызлара ахъазла зыбызшва ззмырдыруагьи гIарылашвитI. – Ацри бызшвали литературали апхьара сахIатква йалкIгIата гватра рзалхIхитI. Ауат ракIвыршара ахъазла йатахъу зымгIвала йадгалапI. Йджьащахъвугьи урышв чкIвынкIгьи абаза бызшва ййырдырра йтахъыта апхьара сахIатква дцитI. Ауи йапшу агIаншараквагьи аъапI, ауаса закIы-гIвба сквшы рыбызшва йапхьата йызчвыбаргвхауа урышв бызшва гIалырххитI. ХIара ауат ран-рабачва гIахIрайгвитIта хIрачважвитI. ХIкультура, хIхабзаква, хIреспублика абзазагIвчва руагIахъара рхчара ахъазла абызшва рдырра магIныта йамула хIрачважвитI, – йхIватI Шамель Зед йпа. Апхьарта йынхауа агвып швабыжта йабаркIыпI, ацацхърагIара рызбжьапI, аунашвачпагIвчва аъачIвагIагIв шIаква йрыцыркIитI. СынчIва апхьарта йдрайгваз Агырба Аза Аслан йпхIа историяла йгьи обществознаниела йалрыпхьуштI. Ауи ужвыгьи дстудентыркIвапI, ауаса лъачIвагIа дазгIашыкъпI. АъачIвагIагIв шIаква арыпхьагIвта анхара йаквдыргвышхвауата аколледж йгIалгаз рынхаша 3-нзыкь рызгIаларцIитI, аинститут йгIалгаз сквш 30 йнамдзас 5-н зыкь гIарыртитI. Апхьарта адиректор апхъахьыла арыпхьагIвчва йымкъытхара ахъазла уахьчIва уалагата йгIадзынгылуа абанпараква арыпхьагIв йъачIвагIа йаквгIазшIытра магIын ду амата йпхьадзитI. Ауи йшихIвауала, рынхара шIыцра щарда гIалалитI. СквшигIадза арыпхьагIвчва рдырраква йрыладырхIитI, йатахъу акурсква йырхъыситI. АунашвачпагIв йхъвдаквцIараква йнардзата йъайырхъйауа агвыпгьи рынхара ащтацуштI. Черкесск, йбыжьбахауа апхьарта 19 сквша унашва ахъызцIауа Къвапсыргьан Шамель дызцынхауа агвып швабыжта хвы йыквырцIитI, пIатIу ду йымапI, апхьагIвчвагьи ран-рабачвагьи рсабиква дыррата йрауала йразыпI.  
264 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный