ЗМУРАД ПШДЗУ АЧКIВЫНЧВА

Кавказские Минеральные Воды йгIацIанакIуа акъалаква, астаницаква, акытква йыртабзазауа абазаква гьмачIгIвым. Апхьадзараква йшгIадырбауала, тгIачва 78 – Подкумок поселок, тгIачва 82 – Ессентуки, 28 – Тепличный комбинат, 20 – Минводы, 40 – Пятигорск, 500 райхIа Кисловодск апны йбзазитI. ЙмачIгIвызтынгьи, БрыгIвстан йгьи Бакьышт станицаква йбзазитI абаза тгIачваква. Кавминводы урынйуштI Красна Восток, Къвбина, Къвайдан, Псыжв датшагьи акытква йгIадзынгылыз ачкIвынчви ахIвсси. Ауат ага ркыт нхарала йа датша уысла йгIатнагазтынгьи, рпхыцIа йъагаз акъалаква, акытква рпны рыхьыз пшдзата йдыргауа, рыхв дута йапшым ауагIахъаква йрыцбзазитI. Кавминводы йгIацIанакIуа акъалаква, астаницаква, акытква адызкIылуа ажвлара адкIылараква хIыбызшва, хIуагIахъара, хIцIас пшдзаква хIуачIвыла хIзайгвыгъауа чкIвыныргIа йырзыхчарала уыс щарда акIвдыршитI. Предгорна район йаланакIуа Подкумок поселок апны абазаква руагIахъа культура автономия «Абаза» уыста йахауа агазет апхьагIвчва ахасыргIвазара стахъыпI. Ауи швхIаусыгIва пшдза амапI. АдкIылара унашва ахъызцIауа, Красна Восток кыт йауу ШАРМАТ Рафик МухIарби йпа сотова телефон дсызгIастI: «Декабрь а 26 адкIылара йалакву хIайззуштI. ХIуагIахъа рызкъ къуатта йынкъвыргуз ажьыргIва рыдзи амамырси хIайшва йхвынгылата асквш хIшынхаз, уыста йакIвхIыршаз, йгIаталуа асквш шIыц мурадта йазхIыму мачIкI хIалачважвуштI. УгIахIрайгвитI, амашина угIанагуаштI йгьи уагахуаштI» – йхIватI. Рафик йшихIваз апшта, амашина сыщтагIайтI. Ауи змашина саквчIваз, Черкесск йгIатыцIта йгIайыз, тгIачвала бзидздзата йыздыруа, хвы ззызбауа ШАРМАТ Арнольд Юрий йпа йакIвта йгIацIцIтI. Сапхъыста йсхIвапIта, змашина саквчIваз Арнольд йхъвыцща цIола, йажва райша, йуагIахъа рпхыцIа дшазхъвыцуа, йгIарыдамхIвыз ахъазла гвыхьра шрызйыму, ргIатгараква гвлахIара ду шгIайыларцIауа, цхърагIарата йгIанйыршауа гIасайхIвуа даналага рыцIагьи спсы дазаргванхатI. «АлахI дузыразхатI, уара йуапшу чкIвынчва гвшаш, згвы йахвиту, зуагIахъа йрызцIабыргу хIыцIагылата хIуагIахъара гьыдзуашым, хIыбызшва хчахуштI, хIадкIылата, анахьанат хIгIарылхIвауата хIбзазуштI»-хIва сгвыла сйызхIвахIвуан. Щыбжьан надзауата хIара Подкумок ашIапIхарала йаныргIалу, адкIылара йалу ачкIвынчва ъалачIвауа атыдз тыбгIа ду хIнадгылтI. Апахь йацIырхъыйыз амца атлакъвыщква йырхвынгылата йхъвыз агIвчуанкI йрыдзхъагылаз ачкIвынчва рызджьакI ажьыргIва псыла дрыдзуан, рызджьакIгьи мамырса дрысун. Атдзы хIъанашылыз апынгьи Кисловодск йгIатыцIыз, Кълыч Рамазан дзахIбаз ачкIвынчва айшва йадзхъачIвата, амшыркъвари акьахври рхъадзгылата хабар рхIвун. ЙгIадрайгваз зымгIвагьи айшва ауыра агIвытланыкъвакIлагьи йадзхъачIватI. Ахъала йгылаз арымдза, мачIкI йахьшвата йгIаргыз, Подкумок йту абазаква рахIба Чква ГIальы дыквдырчIватI. Айшва йгIахвындыргылтI йпхапхуз амамырса ажьрыдз адзхъата, ашвы, льакъвым, хъкIы, дзыхъгIа, чIахъва агьиква. – Швабыжта сшвзыразпI уахьчIва шванйара съагIашврайгваз, – йхIватI сквш 87 йахъызцахьу Чква ГIальы йалачIваз тшырзынайырхауата. – Сара асквш 1957 агIан Подкумок абазата йгIатанагаз, тдзы зуыхваз, тшгIва ацIызхъийыз срыуапI. СынцIра айхIара хIаш ъагIацIырхуаз акарьер апны экскаватор саквчIвата сынхатI, зынгьи хвамыхвта тшыгьгIасмырбатI, «Абаза нхагIвы, абаза хъацIа»-хIва дсырхIватI. Абар ужвы, хвыц-дууызтынгьи, уагIата 262-джь акыт хIтабзазитI. ХIызлу ауагIахъаква рпны хIпIатIу дута, уызшIпшуаш тгIачвата акIвпI хIшаъу. Ауи швабыжта сайгвыргъьитI. УахьчIва швадызкIылыз Шармат Рафик йакIвпI, йгIайыцIагылуа зымгIвагьи АлахI дшвзыразхатI. УахьчIвала уыс бзи щарда швчпахьатI. Ауаса швапхъала хIуагIахъа йшрылахIуш, рыцIагьи швшадкIылазлуш, хIыбызшва, хIцIасква рхчара къалагIвырта швшазгылуаш шванйапхьадзагьи швалачважвара атахъыпI. Адуней шабгу рахIа йпшдзата йспхьадзауа хIыбызшва йгIадзынгылуа швсабиква йырзышвхча, амаль амазтын хIыбызшвала йчважвауа йахъазымкIва, йшашврыпхьуш амальгьи швазхъвыц. Абар уахьчIва айшва йхвынгылу, хIабачва, хIабадучва рызкъ хъадата йрымаз аунагIва рызкъква гьшвхъмаштылтI. ХIара хIанчкIвыныз амамырса хIымачвквала йыхIфун. ЗчкIвынхъа гIазгвалашвахыз Чква ГIальы напIыла йгIайахвуамца амамырси ажьрыдзи йгвы азйырчIватI. Анйара йалаз ргIачважвараква рпны йшгIасгвынгIвызла, Подкумок йгIаныршу адкIылара уыс бзи щарда акIвнаршитI. – ХIара йапхъахауата Кисловодск йгIаныршу «Абазашта» жвлара организация хIалан, – йхIвитI Шармат Рафик адкIылара шгIаншаз, уыста йархъйауа сахайыргIвазауата. – Подкумок йбзазауа абазаква ъащардагIвыз йгIалцIла, асквш 2011 агIан кIьыда уагIахъа автономия гIанхIыршатI. Ауи унашва ахъсцIарныс сара йгIасызхъарцIатI. АдкIылара йщаквгылу Уставла хIынхитI, йгIалалуа ахIвара швъа йгIвитIта дгIахIахвитI. УахьчIвала адкIылара йалапI 100-гIвы райхIа. Ауаъа йалу Подкумок поселок йбзазауа йгьырхъазым, Кисловодск, Ессентуки къалаква, БрыгIвстан, Бакьышт станицаква йбзазауа абазаквагьи гIаланакIитI. ЗымгIвагьи ащтаныкъвара пшдза хIызбжьапI, хIанйараква рпны хIцIаскви хIхабзакви шымдзуаш, хIсабиква рпхыцIа шпшдзахуш, хIыбызшва шхчахуш хIалачважвитI. Ауи йахъазымкIва, цхърагIара йазыбжу мчымхъакI йа швъакI агвынзыргIвуаш заджвы дангIаншара хIайкьангьашитIта йатахъу цхърагIара гIанхIыршитI, адкIылара йалакву, акыт хвы зму ахIбачва рюбилейква хIыртлапIитI. Ауи йахъазымкIва, Предгорна райсовет адепутат Шармат Галина ГIальы йпхIа, акыт Совет адепутатква Чква Мусса ГIальы йпа йгьи ХвытI Эрик Биталь йпа рхъвдаквцIараква йнардзата йдырхъйитI, йгIазлыцIыз абаза уагIахъа цхърагIарата йырзыгIандыршауа гьмачIым. Сара схъаталагьи асквшква 2001–2006 акыт Совет садепутатын, цхърагIарата йгIансыршаз, бзирата йсчпаз схIварныс, тшаласыртшхъварныс гьстахъым. ХIара Предгорна район йгIаншауа а г в ы р г ъ ь а х ъ в к в а г ь и хIрылалитI, йъакIвызлакIгьи «Абаза унагIва» гъыцIара гIанхIыршитI, ахвыцква хIуагIахъа рфашаква ршвыта асасчва гIадрайгвитI, абаза рызкъква ршIахIыршвитI. Предгорна район йгIаныршу аурышв, аукраин, анамыца, агрек, акъарча адкIылараква ргвыргъьахъвква хIанцауа йыгIгауа ахIальыуа хъылпи адзырдзи джьарщадзитI, йалкIгIата, адзырдза мхIачIвала йырфитI. СквшыкI Греция йгIатыцIта йгIайыз асасчва Предгорна район администрация ахъада йахIварала йхIчпаз, «Абаза»-хIва зныз ахIальыуа хъылпа согIа дута йырпхьадзауа, квырмыш хIзырчпауа йрыцыргатI. Ауат агвыргъьахъвква рагIан йадыгIгалуа «Абаза унагIва» хын апхъагылара гIатнагахьатI. «Заджвы йхъазы дыгькъалам» рхIвитI. АдкIылара сара унашва ахъсцIазтIхIва, адгалра уысква рпны щъа багъьата йгIасыцIагылуа щардагIвыпI. Красна Восток кыт атшчва ангIайуашыз Ар Руслани ГIап МухIамади цхърагIарата йгIандыршаз ажвала йухIварныс баргвхуштI. Швабыжта сырзыразпI ауыс ахъа ангIащтIысхра ацIыхъва сыцгIащтIызхуа Кисловодск къала йбзазауа ХвытI Хвсей, Кълыч Рамазан, Чагва Расул, Джьанымбей Рамазан, Трама Рамазан, Ессентуки йбзазауа Чагва Нурали, Агырба Роман, Пщуна Сослан, Шармат Рафик, БрыгIвстан станица йбзазауа Апса ХIазраъиль, Бакьышт станица йбзазауа Гвагв Айуб, Подкумок йбзазауа ХвытI Рауф, Аджьбакь Абдулкьарим, ГIап МухIамад, Шармат Анатолий датшагьи. Апхъала Предгорна район администрация дукI хIрымдыруазтынгьи, ужвы акъыльаквшвара, абагвынгIвыра хIызбжьата хIрыцынхитI. Йара ауаса акыт гIаныршара апынгьи хIылшараква гьмачIым. ХIалакIыта хIынхарыквын, хIапхъахькIьала хIылшараква рыцIагьи йшщардахуш йазхъасцIитI. «Змурадква пшдзу йгIайдахIвитI» рхIвитI. Асквш шIыц апны мурадта йшвыму гIашвдахIвыргIатI, хIычкIвынчва!