Актуально «Единая Россия» проведет «Диктант Победы» на суше, в море и в небе Актуально Минприроды Карачаево-Черкесии усилило противопожарную профилактическую работу Актуально В КЧР женщина опубликовала откровенные фото своей знакомой и попала под следствие СКФО Северный Кавказ возглавил рейтинг самых спортивных регионов страны Актуально КЧР осудили на 6 лет автомеханика из Краснодарского края за мошенничество 

ЗАЖВИ ЗУЫСИ АГIВЫМСУА

16.08.2019 236
ЗАЖВИ ЗУЫСИ АГIВЫМСУА
Айсра-Тенгьыз флот апны къвырльыкъв зхаз дрыуапI скытлагIв бзи ЛАГIВЫЧВ Муъайад МухIарби йпа. Ауи асквш 1954, апрель а 4 Къвбина кыт апны дйытI. Асквш 1972 агIан Къвбина апхьарта жвакласскI дгIарылгатI. Йара ауи асквш КрасногорскIа ПРТ рабочата гIвысквша дынхатI, Устьджьгваты ДОСААФ апны шоферта дапхьатI. Асквш 1975 агIан ар йызшIыртыз Муъайад Севастополь йаныргIалу Айсра-Тенгьыз флот далата хысквша къвырльыкъв йхатI. – Хысквша руацIа баргвыра щарда сырхъыстI. ЙгIауахвырквын, сызлашваз акоманда радиометристын, «Радиотехническая служба» (РТС) – хIва йапхьитI ауи ахъвдаквцIара. Агъба апны ауи ацкIыс ъачIвагIа баргвы гьаъам. «Азбука Морзе» уыхвмачвкI рапшта йудырра атахъын, абаракъла «Семафор» ахIарыфква рдыррагьи гьмайрамызтI. Агъба апны зцынхъвы уцаз аматрос йа астаршина ауат ахIарыфква уымдыркIва уыгьйымрычвуашызтI. Ауат уымдыркIвагьи амаль гьамам. Атшыбжьараква 3–4 мзыла дахIврала санырхъыс, «ужвы сматросхатI» схIватI сгвыла. Къвырльыкъв зцысхуз ачкIвынчва айщчва цриква рапшта хIабаркIыта хIыззырбжьуз зымгIва хIылахIкIуан, – йгIайгвалашвахитI Муъайад. – Схъатала Средиземна тенгьыз апны йакIвшуз атшыбжьараква срылан. Ауаъа йхIыцын Алжир, Египет, датшагьи акъральгIвымаква рматросквагьи. Атшыбжьараква рымщтахь Алжир, Александрия рпынква хIсасытI. СызквчIваз «Очаков» гъба швабыжта йпшдзан, йдууын, ймадзаз йрыуан. АгIвымакъральква рымщтахь Севастополь апорт хIгIайхтI. ДукI йнамихуата Тихий Океан апынгьи агIвымакъральгIвчва хIыцта атшыбжьараква хIырхъыстI. ХIара хIгвы хIаннадзузгьи гIаншун, хIыуа дзачIвызлакIгьи пщсахIаткI дчIапщунта, гIвсахIаткI акIвын тшъадзапсхIщахуаз. Абарауаса хвымызкI йапынкIылата атенгьыз хIхъын. Ауи агIан ъачIвагIа азъазарата йгIасырбаз ахъазла ртшхъвагата «За дальний поход» йапхъахуз гвплацIа гIасырттI. Старшина II статьи чынгьи гIасквнадырган, аотделение сакомандирта сдыргылтI. Йхпахуз асквш апны «Старшина I статьи», «АйсраТенгьыз флот аотличник», «Йапхъахауа класс зму аъачIвагIагIв» хьызква гIасквнадыргатI. Скъвырльыкъвхара салгата сангIайхуаз лейтенант хьзы гIасквнадыргатI. Ужвы счын капитан-лейтенантпI. Муъайад къвырльыкъвхара данаъаз йыцыз ачкIвынчва гIвычIвгIвысагIара рылата, ркърар багъьата акIвпI уахьчIва йъагIадзазгьи йгвы йшгIатахаз. «Йыгьсхъаштылхуам, – йхIвитI Муъайад, – хIунагIва сангIайх хIыкIьадыгв асабиква щардагIвыта штшгIазыркIкIыз, ауат моряк дыгьрымбасызтI, срымаджьащахъван, азаджв абескозыркIа алентIа аякорьква дырпшитI, азаджв – стельняшкIа, арахьарат – сызкв напIыла йыркIитI». ЛагIвычв Муъайад дангIахъынхIвых амщтахь «Устьджьгваты сельхозтехника» шоферта далагатI. Дшынхузымца КIавкIазскIа совхоз-техникум механикта заочна дгIалгахтI. Асквш 1977 агIан анхарта атехника шварагIварадара дахъпшылуа ддыргылтI, пщысквша анцIы адиректор дицхърагIагIвта йгIайызхъарцIатI. Асквш 1984 агIан Муъайад «Устьджьгваты сельхозтехника» даунашвачпагIвхатI. ЙшихIвахуала, директорта дандыргылгIваца швабыжта дгIапсатI. Йауа ухIварыквын, азаман рахIа йанбаргвыз акIвын. Ауаса дгIапсазтынгьи, йшатахъу апшта ауыс атара йтайыргылтI, анхарта арайонла агIарбара бзиква йрызцатI, йызнымкIва йамырдауа а-Баракъ гIаквнадыргатI. Ауи ашвапха анахьанат анхартаквагьи йгIадрысабапуа йджвыквырцIатI. ЛагIвычв Муъайад нхарала зынгьи йыгьгIаймырльальатI. Асквш 1989 угIалагата «1719 автоколонна» даунашвачпагIвта дынхитI. ЙшихIвауала, машиналагьи, уагIалагьи йамцIдырпIлаз автоколонна гIащтIыххра швабыжта йбаргвын, ауаса йгIащаквйыргылхырныс йылшатI. УахьчIвала газельта 40 рымапI, ауат Устьджьгваты, Къвбина, Черкесск, Карачаевск, Ставрополь йцауа ауагIа аланкъвыргитI. РхачIвква дахIврала йдырхъйитI. Муъайад йгвымчIвара нхара гIалыркIгIауата «Заслуженный транспортник КЧР», «Отличник автотранспорта РФ», «Почетный работник автотранспорта РФ» чIахIра хьызква гIайквнадыргатI, чIахIра ртшхъвага щардала йыхьыз рхIватI. ЗъачIвагIадырра дашIамсуата йалазырхIауа Муъайад асквш 1987 агIан заочната КъабардБалкъар университетгьи дыцIалын, инженер-механикта дгIалгахтI. Асквш 2002 агIан хIхаквлагIв гвыбзыгъа экономикала Адуней академия аунашвачпагIвчва рунашвала академик хьзы данкъвгагIвхатI. Ауи сквшы гIважва цIуата Устьджьгваты район а-Советгьи депутатта далапI. Ауи йахъазымкIва фермер млыкврхIартагьи йымапI, рахвыта – 100, уасата – 800, тшыта – 30 йырхIитI. Муъайад уипшрыквын, уазйырхъвыцитI: йабагIайгуа ауи аъара къару? ГIвынхартакI уынхарныс швабыжта йбаргвыпI. «УымгIапсакIва закIгьи гьауашым» – йхIвитI йара Муъайад. АрахIмат зпщылу ари агIвычIвгIвыс гвчIагIвра ду гIазырбауа дрыуапI. Швапхата йгIасахвпIта, йцри кыт дъабзазауа аурам апенсионерква «Абазашта» газет рзацIицIауищтара сквшпхьадзара цIитI. Асквшква 1992 – 1993 рагIан гуманитар цхърагIара КЧР йтыргунта Абхазия апны айсра ашIасындзыкIьара йдйыргатI. ДашIамсуата Абаза йгьи Устьджьгваты районква, йцри Къвбина кыт дырцхърагIитI. ГIидипхьадза акыт адиннкъвгагIвчва уасакI рититI. ЛагIвычв Муъайади йхъапщыла Зареми акъыльаквшвара рызбжьата сквш 43 цIитIта йацбзазитI. Ауат гIвыпхIчви пакIи гIадзындыргылтI. АхIба Джьгватан Марйана бухгалтер ахIбата «1719 автоколонна» дынхитI, хгIвысабичва лымапI; аквтанай ФатIима КIьыщмахваргIа дыртацапI, ареспублика Счетна палата дынхитI, гIвысабичва лымапI; рпа Рамазан Устьджьгваты район асудья дицхърагIагIвпI, гIвысабичва драбапI. Муъайади Зареми ауат йгIарыцIагылуа асабиква швабыжта йраргванпI. Зуыси зажви агIвымсуа Муъайад МухIарби йпа йанакIвызлакIгьи йгвыла дшIапI, йкъару тапI. Апхъахьылагьи мурадта йкIыз АлахI йгIайдайрыхIвыргIатI.
236 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный