ЗЪАЧIВАГIА ЗЫРТЛАПIУЗ АПХIВЫС

Ноябрь мшыта Красна Восток кыт агIвадахь хIабльала йбзазуз КЪЛЫЧ (Гваджьа) Октябрина сызлызцаз смурад анласхIв, ахъартшхъвара зцIасмыз, мачIкIгьи лхъа дачвпхащауа сылрайгватІ. Айшва йгылаз хIадзхъачIвата гIвсахIаткI раъара хIайчважватI. Октябрина асквш 1941, октябрь а 10 Апсуа кыт дйытI. Ауи лыхьыз турых апщылапI. – Сан Музминур ТльысргIа дыртпхIан. Ауи йшылхIвахуазла, айсра анакIвшуз акыт сабищтIыхыгIвта йынхуз дурышвын, сара октябрь мызта адуней сангIаквыл, ауи «Октябрина» сыхьылцIатI. Ауи азаман саба ПIатIа айсра дпшцIан, хI-Псадгьыл ахчара дазгылан. Айбащра чвгьакI апны дхвхан, мшквакIла дгIарщтитI. Ауи азаман сащахIба Али – жвсквша, Абрагьзауыр – хысквша, сара гIвымызкI ракIвын йхIхъыцIуаз. ХIаба йхвыртаква анбзихах дхъынхIвыхын, йатаркIвах айсра амцаблыра даталалхтI. Ага счкIвынызтынгьи, йыздырхитI саба «Щтадъа дыдзтI»-хIва швъа сан йангIаладза йхатым шырчпуз. Сан льакъвым шылрыдзуаз, саба йахща Ната лбжьа саквчIвата дшчIвыуаз сгIвылакI йрыцIаркIвапI. Ауаса гIващагIара ншатI, саба дгIащаквхатI, асквш 1953 агIан дгIахъынхIвыхтI. АкIьадыгв дгIагваралхта хIаниба заджвгьи хIыгьгIайымдырхтI, «Арат зчIвуда?», «Ари апхIвыспа хвыц щта?»-хIва дырцIгIун. Ауи йшихIвахызла, алакшара мчыкI апны атоп йаргван йагIвжван нышв гIайыквнапсатI, тшыйымдыруата анамыцаква гъарта дыркIытI. «Йа сырщра, йа с-Псадгьыл сазцахра» йхIван, дгIардахтI, ауаса ахIапса дтадырчIван жвасквша йгатI, – йгIалгвалашвахуан Октябрина. Ауи йшылхIвахуазла, Абашта айсра Ду ъадзакIвшуз азаман, ауи амщтахьлагьи лан архъа дынхун. АунагIва апны аны-абата йырхъарпаз лащахIба Али йакIвын. Октябрина ланду абаза гIвгIвы Къврымбай АбдулахI йхабаргIвыра дгIазквчважвауа, Апсуа йауаз, Ставрополь йаныргIалыз а-Гимназия йгьи Санкт-Петербург а-Император Университет амарагІацІцІырта бызшваква рфакультет йгIалгаз Алий Мырзабакь ТIытIа йпа дйахщацрийын. Ауи йхъапщыла днамыцан, саби дыгьрымамызтI, акнигаква «От тети Кати»-хIва йырзыгIалщтиуан. – Сара асквш 1949 агIан йапхъахауа акласс саныцIал сан урышв бызшвала йслырдырыз «Что такое хорошо, что такое плохо» уыса акIвымкIва датша закIгьи гьсымдыруазтI, – лхIватI Октябрина лчкIвынхъа гIалгвалашвахуата. – Йапхъахауа сарыпхьагIв Эгьдза Назир йахща Тльыс Екатерина Бакьмырза йпхIа лакIвын, урышв бызшвалагьи Надежда Иван йпхIа (лткъвым гьсыздырхуам) пхата сгвы дгIатахатI. Апхъала щапIхъацІа гьаъамызтI, сан йылдзахуаз акIасчвамгIаквала апхьарта сцун. Сцри кыт апхьарта йагIбахауа аклассдза сапхьатI, уацIыхъван ЭрсакIон сцумца йжвбахауа–йжвабахауа аклассква сгIарылгахтI. Апхьарта гьаргванымызтI, хкилометркI раъара бжьан. ЭрсакIон апхьарта йцуз ахIвсси ачкІвынчви зымгIвагьи акыт уаналцIра тшазхIкIкIуанта хIабаркьахвуа, хIабаргвышхвауа, хцхIакI хIырхъысуанта хIцун, йара ауаса хIгIайхуан. Асквш 1959 агIан ЭрсакIон апхьарта сгIалгауата «ЙыбмагIынхушйа?»-хIва йангIасцIгIа, схъа йшгIаташвазгьи сымдыруата «сврачхуштI»- хIва сджьауапхатI. Октябрина дымврачхазтынгьи, дмедахщахатI. ЛащахIба Али йыргвышхварала Черкесск йтагылу аучилища акушер хъвшара дыцIалтI. Ауаъа лкыт йауата йапхьуз лара заджв лакIвын, лан йлыцынхаз ТхIвахIв Джьалдуз тдзы чкIвынкI лыманта ауаъа йацыгIвнан. – Ауи сан лацкIысгьи багъьата дсхъарпан, мачIкI скъвазарквын лажва багъьаквала сылрыхвхвуан, «Сара бан бансызхъалцIазара сажва бахъыпата йгьызуашым, бхIаль пшдзахарныс, бымгIващарныс, бгвыбзыгъахарныс акIвпI йстахъу» -хIва дгIасайбжьун, – йгIалгвалашвахуан Октябрина. – Саргьи мшкIы лажва сгьапшIамгылтI, дсзыразта сапхьара сквшква руацIа лпны саъан. Октябрина йшылхIвахуазла, ЭрсакIон апхьарта дазрыпхьуз къабард йгьи урышв арыпхьагIвын. Аучилища апны мачIкIгьи анатомия йгьи латынь лчвыбаргвын, уацIыхъван днанауахвхтI. Ауи дъадзапхьуз агIвысквши ажвамызкIи руацIа Черкесск йгьи Джьгваты рчымазагIвтараква, асабийыртаква рпны атшыбжьараква дырхъыстI. – Йыгьсхъаштылхуам Черкесск ачымазагIвтара хIандырца мзагIвкI агIвихуата знапIы пызкъыта йнаргыз чкIвынкI данызба зынла сгвы шчвгьахаз, – йгIалгвалашвахуан Октябрина. – Ауи амщтахьла апсчва ъаргауа йызнымкIва сцатI. РыцIа схъызхуаз, съачIвагIа йаквыргIапсыз асабийырта акІвын, саби пшкакI адуней лашара дангIаквылрыз сгвыргъьара гIвына гьамамызтI. Асквш 1962 агIан аучилища йгIалгаз зымгIва хIъарщтиуашыз рхасахахьан. «Йбтахъызтын Ставрополь край йа КъарчачкIвын район» рхIван саладырпшытI. Сара «Йамуазтынгьи суагIаква рпны хъыхчара сымазлапI» схIван, КъарчачкIвын район апны абазаква ъабзазауа Красна Восток кыт гІалсхтІ. Апхъала, ужвы апшта, асфальт мгIва гьаъамызтI. Черкесск автобус саквчIван, Пятигорск тланыкъвала сгIахъыкIвшан, Учкекен сцатI. Райша айъазагIв хъада Тамбиев йкабинет снашылтI. ЙыдзхъачIваз апхIвыси йари гIасайгвыргъьатI, «ПервомайскIа», «Терезе»-хIва къарча бызшвала йырхIвуз слымхIаква йангIартас сгIархIан, йгIасархIвуашыз йахасмырдзауата «Йауашызтын, Красна Восток кыт сшвщти» схIватI мачIкIгьи спхащауа. АгIвыджьгьи «Какая смелая!» рхIван йхъыччатI, уацIыхъван «БхIщтиитI» гIацырцIахтI. Акыт апхIвысква йрыцта йгIайуаз апхIвыспа чкIвын лгIвылакI йырбауа лымаджьащахъвата агIвагвана гIамылдун. Къзылпагвын ахъахь йгIадзата акыт чкIвын анылба «Ари акIвма Красна Восток кыт?» лхIван, ларгван йчIвакваз дырцIгIатI. «Момо, ари Къзылпагвын кыт акIвпI, ауи йащтагIайитI Красна Восток кытгьи», – джьауап гIалыртхтI. Ауи дъакIныцIуашыз, дъацушыз гьлымдыруазтI. Аучилища данапхьуз, акушер хъвшара йгьи медахщата датша курс йыцIаз, йлахIбачваз, Гвым йауаз ахIвсса-ахщчва МартазаргIа Лини Нурхани «Акыт бцузтын хIпны бадгыл» шырхIваз лдыруан. – Швабыжта дгIасайгвыргъьатI ахIвсса раба Джьамырза, йтаца Соня лакIвынта, съалырчIвара лымдыруа дсхъыкIвпшшун, лпахIба Артур дсабипшката агара дылан. Ауи йсзылчпаз апсхIальыва Гвымла йапхъахауата йсшIашваз рызкъыпІ, – йгIалылкIгIатI Октябрина. – Ауахъ МартазаргIа спхьан, ащымта ачымазагIвтара йнасырдзатI. Швабыжта йгIасайгвыргъьатI ауи азаман акыт айъазагIв хъадата йынхуз Абакаров Борис, йыцынхуз Марченко Галина йгьи Джьмакъвыл Зоя. УацIыхъван агвыргъьара лахIвара сынкъвнагауа хIпны сцахын мызкIы саъан, сабагьи дсыцта сгIахъынхIвыхын, сынхара джвыквсцIатI. МартазаргIа рунагIва саъата сынхарныс ртахъын, ауаса анхарта йъачвыхъараз йгIалцIла ПрицепиловкIа хIабльа йбзазуз Пари Льольа лпны старцIатI. Ауаса сащахIба Абрагьзауыр йыцапхьаз, аща црита йпхьадзуз Кълыч Къанокъва йуагIа сызнайын, рпны сдмырцакIва йыгьрымуытI. Октябрина йшылхIвахуазла, айъазагIв хъада тшынла дынхунта хъвлапныла йунагIва дадгылхуан, йгIанхуз ракIвын уахъынла йчIапщуз, ачымазагIвквагьи ртахъыраква назырхъуз. Ауи азаман «ЦхърагIага ласы» йгьи датша машина гьаъамызтI. ЦхърагIара зтахъыз ачымазагIвква рпны уахъынла тшынла рымамкIва чвы йа тшыуандырла, тракторла йыргун, щапIыла йцун. – Сара айъазагIв хъадата ХвытI Борисгьи ГIвкIьатI Тамарагьи срыцынхатI, – лхIвитI Октябрина. – ГIвкIьатI Тамара ауыс джьауапкIра азлыман, дадгалагIв багъьан, дгвыбзыгъан, схъатала сыззылбжьаз щардапI. Апхъала, ужвы апшта, зны йрыдыргалуа агвырква гьаъамызтI, йара гвыркI гIадыршуамца щардагIвы рпны йгIадрысабапуан. «Уызднагалуа урапшхитI» шырхIвауа апшта, сызднагалыз ахIба гвыбзыгъа Марченко Галина лхатI пшдзаква гIасрысабапуамца сынхара адызгалуан, асабиква рщтIыхра йахъазымкIва, ачымазагIвтара хвыртакI змата йгIайуаз сара йыздзахыхуан, йатахъу хъвшвы рыдызгалуан. Сара счкIвынын, сквшы 20 ракIвын сызтаз, збжьагажва сацIаз айъазагIв хъадаква йырхъазымкIва, сызднагалыз асанитар Айсан Фаризат, Тауыж Баблина, ДжьмакъвылргIа Щаща йгьи Нагва анцынхъвыта йысзаъан, швабыжта йсызбзийын, – лхIвун Октябрина ауат рбзира хвы алтуата. Къарабаш КІвнаца лпхIахIба данлауаз сара йсхъазын, сыгьгIамырхIатI, атшыбжьараква съацаз йшсдырбаз апшта йгьи сахIба Марченко Галина сшазылбжьаз апшта зымгIва бзидзддзата йагвынсыргIвытI. Йапхъахауата адуней йгIаквлыз, снапIквала йгIащтIысхыз асаби пшка дабгазгIвадата данызба сацкIыс байа даъамкIва тшыспхьадзатI. ЙгIванхауата зсаби дщтIысхыз Огвыз Сима ссамссадза санылба, «Ей, бара, аджвырагIв щтIыпххьума?»-хIва дукI йсызхъалымцIауа дгIасцIгIатI... Ауыгьи гIальаматта дахъвдаквыцIтI. Апсуа ййыз, зынхара уысла Красна Восток кыт йгIарщтийыз Октябрина, араъа лылахьгьи лаутI. – АгIмызкIы рахIа мцIыскIва зунагIва саъата сынхуз КълычргIа рунакъващ МухIарби сйырттI, – лхIватI Октябрина. – Акъыльаквшвара хIызбжьата сквш 44 хIацбзазатI, пщгIвысабичва гIадзынхIыргылтI. АхIбадза МухIамад акIьадыгв дсыцпI, МухIадин адуней дгьыквхым, гIвыпхIчва гIайтынхатI, Нурали Подмосковье даъапI, пхIакI дгIадзынйыргылитI, айцIбадза Рафаэль Краснодар край даъапI, атшырхIара дапщылапI. Октябрина тшпсщара данчIвахгьи ахъартынчра дукI тшгьалымттI, лунагIва нкъвылгун, акIьадыгв лцхърагIара йазыбжу дырзыгвжважвун, лсабиква рпхыцIа дазхъвыцуа, рыхайырква драйгвыргъьауа дбзазун. Кълыч Октябрина зтшын амедицина халат шкIвокIва ахъалцIата квра анналахIв йгIашIарышвта ауи дамайжьауата Гвым кыт – сквш 28, Учкекен квта чымазагIвтарагьи 18 сквша дынхатI. Асквш 46 руацIала ага баргвырагьи, ага ащтамцарагьи дыршIашватI, ауаса йгIалылхыз аъачIвагIа мшкIгьи дгьамайжьатI, ауи лцхърагIарала адуней йгIаквылуаз асабиква ддыргвыргъьауа лынхара мгIва амылдатI. Ауи лынхара хвы аквырцIауата «Ветеран труда» медаль, йапшым ачIахIра грамотаква, асогIаква, ачвахъабага гвплацIаква гIалквнадыргатI. Ауаса лара йанакIвызлакIгьи согIа дута йылпхьадзуз йабга-йызгIвадата адуней йгIаквылуаз, аткъвымква зрыщардуз асабиква ракIвын. Ауи йанакIвызлакIгьи рахIа йхъадаз лъазари лгвапари гIалырбун, дтынчын, дпшкан, луыс къвыпIчIта йлырхъйун. ХIайчважвара ацIыхъва «Гвалара хъадата йбымайа?» -хIва сылцIгIатI. – «Запхъала йымпшуа дгвлашвпI» рхIвитI. АлахI йбзирала спа йпа Абдул унагIвара далалтI. Адуней йыквхым спа МухIадин йгIвыпхIчва Бэлли Нателли агIсквша цIитIта Америка йаъапI, дасу йъачIвагIала йынхитI. Ауат гIайхта, йунагIвахата йызбазарквын, дуней млыквта йыспхьадзушын. ХIсабиква айсра рымбауата, агвымха йачвыхъарата, рдуней тынчта йбзазарныс стахъыпI, – лджьауапхатI ауи. Ноябрь а 21 атшын Кълыч Октябрина лпа МухIамадгьи длыцта сгIардасхтI. Ауи йылзынарху агIвыра хIазырхахьата, ауаса агазет йгIаквымшваскIва хабар нашхыйа гIасадзатI – Октябрина декабрь а 5 адуней лхIваджьтI. Ауи дъайыз Апсуа кыт ахв зынгьи йыгьналмыркъвытI, лылахь ъалауыз Красна Восток кыт апIатIу щтIылхуа, аткъвым лрыпшдзауа, акIьадыгв рпны дгвыцкьата, дтынчта, дгвапата, луыс дазъазата тшгIалырбатI. Нхаралагьи, унагІвалагьи, гІвычІвгІвысагІалагьи лборч лырхъйан, тынчта адуней дшыквыз апшта абзазара далцІтІ.