Абашта айсра Ду аветеран, «Орден Отечественной войны» акавалер, медаль щарда зму
Меднороск поселок абзазагIв РОГОВОЙ Василий
Семен йпа январь сквш
95 йхъыцIтI. Ауи уахьчIва
йъагIадзаз ажвлара уысква дрылапI, йгIадзынгылуа чкIвыныргIа дрынйалитI, рпатриот бжьара
къару щарда алайцIитI.
Аветеран данйыз амшла йайхIвахIвтI Уарп муниципальна район администрация ахъада ШУТОВ Алексей, Медногорск поселок гIаныршара ахъада йхъвдаквцIараква зырхъйауа
БАЙРАМЫКЪВА Галина, акыт абзазагIвчва. Ауи
Россия Федерация а-Президент Путин Владимир
йхIвахIвра швъа йгьи
Къарча-Черкес Республика а-Хъада Темрезов
Рашид йразыра сальамшвъа йырттI.
– Сара швабыжта йсгвапапI акъраль йгьи
ареспублика аунашвачпагIвчва ауи апш гватра
ъасзалырхыз. Ауи къару чIыда гIасыланацIитI,
сныбыжьла счкIвынхмызтынгьи, абзазара сазгIашыкъта сачпитI. ХIара,
ахIбачва, йанакIвызлакIгьи ажвлара сабапкI азгIагIгырныс хIхIазырпI.
Швабыжта йстахъыпI АйгIайра асквш 75 скытлагIвчва срыцта йсыртлапIарныс, – йхIватI аветеран.
Василий Семен йпа
асквш 1924, январь а 14
Краснодар край йаланакIуа
Бесстрашна кыт апны дйытI.
ЙыквлагIвчва зымгIва
рапшта агвыгъара пшдзаквала дырчвыта дгIадзынгылтI. Ауаса, йгIалагаз
Абашта айсра Ду ауи
абанпара рмурадква зымгIва апнакъьатI. Асквш
1943 агIан Роговой Василий й-Псадгьыл ахчара
дазгылтI, Лагъь КIавкIаз
ашIыпIаквала йакIвшаз
айбащраквала йджвыквицIан, Европа агIархвитхрагьи далан. Ауи
й-123-хуз апогранична
полк дрыцта хъацIара ду
гIайырбауата дайсытI.
Василий Семен йпа
Уарп район йаныргIалу
апхьартаква рапхьагIвчва дрынйалитI, йгIагвалашвахраква рыцагIвишитI. Асабиквагьи ауи
зынла дгIакIвдыршитIта
йгватшныта йыздзыргIвитI. Ага ахIбачва рпхьадзара йалдзгIазтынгьи,
йгIадзынгылуа чкIвыныргIа ауат ргIахIвахраквала Совет Союз ауагIахъаква фыррата йгIадырбаз, тшадыркIылта анамыцаква рыгIвара йштарцахыз йалыргата йахагIвазапI, ауат ршвапхала апатриотра тшазырбжьитI, амамыр рзызхчаз
айсыгIвчва рхъмаштылра квырмыш азырчпауа
йбзазитI.
Асквш 2018 агIан
Къарча-Черкес Республика а-Хъада Темрезов
Рашид аветеран къаймат Роговой Василий «За
заслуги перед Карачаево-Черкесией» орден
йквнайыргатI. Амамыр
бзазара апны Василий
Семен йпа Медногорск
поселок апны йыруыхваз
акомбинат йкъару ймачIымкIва йалапI.
– Сара съачIвагIала
сшоферпI. Ага ауаса йаъазтынгьи, акомбинат
аныруыхвуз бетон аласцIатI, кырбыджь аквсцIатI,
ауыхвагаква ъащтIаз асклад схчатI. ХIкомбинат
атурых асквш 1920-ква
рагIан йгIалагатI, апсабара гIалцIыртаква гIадрыбергьыльтI. Асквш 1960
агIан «Урупмедьстрой»
ащата щтIарцIатI, ауи
амщтахь ашахтаква руыхвара джвыквылтI. СССР
йапшым ашIыпIаква йгIартыцIыз чкIвыныргIа змагIны дууыз ауи ауыхвара
ркъару алапI. Асквш 1965
йгIашIарышвта саргьи
араъа сынхара джвыквсцIатI, Медногорскдъа сбзазара сыла йыгьсызгIацIажьуам, – йхIвитI аветеран.
Ауи ауыхвара йапщылаз абаргвыраква, агIатгараква, аунашвачпагIвчви анхагIвчви ртдзыхьызкви рыхьызкви дара
бзита йдырхитI. Ажва
пхала дгIайгвалашвахитI
астахановец Савостин
Михаил. Ауи йгIадзынйыргылыз аъачIвагIагIвчва щардагIв дрыуапI
Алибердыкъва кыт йауаз
Йуан ХIамидгьи. Ауи
йгвымчIвара щардагIвы
швапхата йырзалуан,
йынхащи йгвыбзыгъари
гIарпхьадзауата СССР
а-Верховна Совет дадепутаттагьи далырхтI.
Айсра йгьи анхара
аветеран Роговой Василий
Семен йпа дахIба уасаражвпI, ауи уйачважвапхьадзагьи хIхакв атурых
йауата джьащахъвара
щарда узыгIахъитIырныс
йылшитI. УахьчIва йъагIадзазгьи ауи арайон аунашвачпагIвчвагьи абзазагIвчвагьи кьангьашагIвта дырзалитI, йырхIаз
ашвапха байа гIадрысабапитI
Получайте свежие новости на электронную почту
Комментарии