ЙМУРАДКВА ГIАЙДАХIВЫРГIАТI

«Аспорт – азгIвадара арыбагъьитI» йхIвитI жвизсквша йырту, згIатгараквала зцриква зыргвыргъьауа ОГВЫЗ Азамат Анзор йпа. Ауи асквш 2009, июль а 21 Красна Восток кыт дйытI, хабза пшдза ъагIвну аунагIва апны сквш 80 йахъызцахьу, збзазара швапху йабаду Нурдин йхабарква дрыздзыргIвуа дгIадзынгылитI. Азамат апхъала трактор, машина анаъамыз ауагIаква щъа багъьата йрыцIагылаз, руысква зларчпуз штшыз, ауат айсраква йшрылалуаз, гIвагвана ауыра шамырдуз, йхъатала «Токарь» йгьи «Бостон» тшква йбжьата алинейкIа йшацIайхIвуз, агвыргъьахъвква шдрыпшдзуз запыт йабаду йхIвауата йагIахьатI. Азамат йаба Анзоргьи тшы нкъвицитI, йунагIва уысква алайхитI, апхынла хIабльала тшадыркIылта рырахв ъадырцауа Пагвынсырт щхъа далахъалитI. – Усаби дуыртшхъварныс хIуагIа йгьырцIасым. Ага ауаса йаъазтынгьи, Азамат щъата дсыцIагылапI, – йхIвитI Анзор. – Ауи гIвба-хпа сквшы рахIа дыртамкIва атшы даквчIвауа далагатI. Ауасаква анцIасыркъвдуа дгІасцхърагIитI, ахIамач йрыцкьитI. Ауыс дъарыбагъьауа акIвымкІвагьи аспортгьи тшапищылтI, йгIатгараквала хIйыргвыргъьитI. Азамат йагIвсыз асквш, январь а 12 «Апсадгьыл» абаза жвлара адкIылараква р-Ассоциация аунашвачпагIв Эгьзакь Мусса йгIаджвыквцIарала йыруыхIваз «Алашара» спорткомплекс йапхъахауа амш йгIашIарышвта дцитI, хвитта абакIрала агвып дрылапI. АбжьагIвы Дедегкаев Марат йшихIвауала, Огвыз Азамат хвитта абакIра дшазычпу гIайырбахьатI, агIатгара дуква дырзынадзушта, йыхьыз хъарата йыргушта дгвыгъитI. Атшыбжьараква йгIайуа 20-гIвы раъара йнадзитIта, Азамат йгIатгараквала дгIарылхIIвитI. Ауи хвитта абакIра ахабзаква тамамта йгIайрысабапитI: дыгьшвум. йкъару даргвышхвитI. Азамат агвып ранкъвакъвра апны йхатI пшдза гIайырбахьатI. Ауи КъарчачкIвын район, «Абаза» клуб рпны апхъагылара дазабакIтI, Черкесск город йаныргIалу «Купол» спорткомплекс апны Россияла гIатгара змаз абжьагIвы Чква Михаил Заудин йпа йхъмаштылра йазынархаз анкъвакъвра, Ессентуки город апны йадыргалыз Россияла атурнир, ЭркеншахIар йакIвшаз ареспублика анкъвакъвра датшагьи дрылан. Рызна, джьаз медаль, адипломква, артшхъвага швъаква, асогIаква щардата йгIайквнадыргахьатI. АчкІвын сынчIва й-4- хауа акласс дгIалгатI, гIвпредметкIла «пщба» йымапI, арахьарат зымгIва «хвбапI». Ауи швабыжта дылзыразпI дырра цIола гIайызтуа йарыпхьагIв ДзыгIва Алла МухIамад йпхIа. – Апхьари аспорти шпадукIылуа, угьымгIапсума, – сицIгIатI ауи. – Ауат азакIы азакIы йасабапхитI, гвышхвара, гвыгъара пшдза гIасыларцIитI, – йджьауапхатI Азамат. – Апхьарта апны бзита сапхьара йахъазымкIва, йапшым ауысквагьи джьгарта срылалитI. Ауи апшта, цIыпх «АрыпхьагIв йы-Мш» сара йакIвсыршатI, йапшым агвыргъьахъвква рагІан уыса сгIапхьитI. ЦIыпх Черкесск й-16-хауа квтанай апхьарта апны йакIвшаз «Абаза бызшви литератури рфестиваль» салан, ауаъа хIкытлагIв Аджьбакь ХIаджьисмель йуыса «Гвым» збарла сгIапхьатI. Ажюри йалаз апхъагылара гIасквнадыргатI. Азамат дызпщылу аспортгьи гвыгъара пшдза гIайыланацIитI, анкъвакъврата дызлалхьу рпны йгвы йгIатахазгьи, дыззнархъвыцызгьи аъапI. – СынчIва Лагъь Осетия апны Россия ауацIала йбергьльыз атренер Фадзаев Арсен йхъмаштылра йазынархаз анкъвакъвра хвитта абакIрала хIызбжьауа Дедегкаев Марат сара, Аджьбакь Астемыр, Напса Астемыр йгьи Гочияев Таулан хIигатI. Ауаъа сара пщгIвы срымцIастI. ВладикIавкIаз йауаз чкIвынкI амахъарыхъвара йкIытI, арахьарат ахыгIв срайгIайтI. Ауаъа джьаз медали дипломи гIасквнадыргатI. Ауи анкъвакъвра бзира щарда гIалскIгIатI, сгIващагIарагьи снардыртI. Аспортсмен шІа йгIатгараква йабаду Нурдин, йанду Леля, йаба Анзор, йан Света, йахщчва – Кисловодск медколледж йапхьауа Амина, йгьи й-8-бахауа акласс йгIалгаз Алина швабыжта йайгвыргъьитІ. ЙгIайдахIвыргIатI ймурадква зымгІва, Азамат!