ЙХIАРАКIУ КЪРАЛЬЫГIВА РТШХЪВАГА ГIАЙКВНАДЫРГАТI

Асквш 2018, сентябрь а 20 Россия Федерация а-Президент Путин Владимир РФ акъральыгIва ртшхъвагаква рквнаргара ауысла мачвы зцIайцIаз а-Унашвала, акъральыгIва уысква сквшщарда гвхътIыла йзырхъйауа «За заслуги перед Отечеством» орден амедальква рырттI. Ари артшхъвагала йгIалыркIгIаз дрыуапI КЧР айсра комиссар, аполковник ТЕМЫР Арсен Тимур йпа. Темыр Арсен асквш 1987 агIан Гвым кыт аквтанай апхьарта дангIалга Горький йаныргIалу йхIаракIу айсра тыл аучилища дыцIалтI. Аучилища амщтахь асквш 1991 угIалагата Москва агенеральна штаб асвязь хъвшара фачIвыла йадгалрала акъвырльыкъвхарта даунашвачпагIвта хысквша дынхатI. Аофицер шIа Ставрополь нхара дырщтийындзыкIьа йунашвачпагIвчва йгIайыхъвдаквырцIуз ахачIвква дахIврала йырхъйатI. Асквш 1993 агIан Ставрополь город йкIьыду абатальон фачIвыли чгIвычали йадгалрала акъвырльыкъвхарта унашва ахъицIарныс гIайызхъарцIатI. Араъагьи дырра цIола шйыму, йыззхъацIа ауаш офицерта тшгIайырбатI. Арсен Тимур йпа атыл ачасть акомандир дизаместительта дынхатI. Ставрополь край айсра комиссариат ахъвшара даунашвачпагIвта йхъвдаквцIараква дахIврала йырхъйун. Ауаъа акрайла айсра комиссар йзаместитель ъанатIа гIайквнадырганадзыкIьа дынхатI. Темыр Арсен асквшква 2006–2009 руацIа Москва город апны айсра академия дапхьатI. Асквш 2010, июнь а 17 йгIашIарышвта Сочи город, Лазаревск, Центральна йгьи Хоста районквала Краснодар край айсра комиссариат ахъвшара даунашвачпагIвын. Ауаъагьи чкIвыныргIа къвырльыкъвхара йызшIытрала анхараква анзыргIалуа агвып дрылан. Ауи йгвы хътIыта сквшщарда дъанхауа, хъахчарала Россия а-Министерства йаргылуа ахачIвква дахIврала йъайырхъйауа рыхъазла къральыгIва ртшхъвагата йгIайквнадыргахьу гьмачIым. Ауат йрыуапI «Патриоты России» РФ а-Правительства медаль, «За воинскую доблесть» йапхъахауа йгьи йгIвбахауа степеньква зму амедальква, «За отличие в военной службе» ахстепенькIгьи, «За службу на Кавказе», «Ветеран ВМФ» датшагьи амедальква. Асквш 2013 агIан Темыр Арсен КЧР айсра комиссариат унашва ахъицIарныс йгIайыхъвдаквырцIатI. Ауи хIреспублика апны айсра комиссарта дъадзанхауа арайон, агород комиссариатква рынхара агъьырчIвтI. АгIапын, адзын зшIытраква джьгарта йакIвшитI, къвырльыкъвхара йырщтиуаш ачкIвынчва радкIылрала рхачIвква йгIахьымшвауата йырзырхъйауата анхара щаквгылтI. Асквш 2013 ацIыхъва КЧР а-Хъада Темрезов Рашид Темыр Арсен хIреспублика акъральыгIва къвырльыкъвхара уысква дахIврала йъанйыргIалуа ахъазла «КЧР-ла гIатгара зму акъральыгIва къвырльыкъвхара анхагIвы» ЧIахIра хьзы гIайквнайыргатI. КЧР айсра комиссариат анхагIвчва ансисквшагьи Абашта айсра Ду апны АйгIайра а-Мш агвыргъьахъв адгалри йакIвыршари къару ду аларцIитI. Темыр Арсен йхъатала аветеранква дрынйалитI, драйхIвахIвитI, ачвахъабага согIаква рквнайыргитI. Аргваныта дызцынхауа чкIвыныргIа райсра-патриот бжьара йадкIылу аъачIвагIагIвчвагьи гватрата йырзалихуа гьмачIым. Ауи апш нхара ъайзыщаквыргылыз ахъазла ахIбачвагьи айцIбачвагьи хвы йзырбитI, Абашта бзи йызбауа ауи йшвапхала йгIадзынгылитI. Асквш 2018, ноябрь а 27–29 руацIа Бурятия Республика апны Россия айсра комиссариатква рунашвачпагIвчва райззара акIвшатI. Путин Владимир й-Унашвала Темыр Арсен йгIайквнадыргаз «За заслуги перед Отечеством» й-II-хауа степень орден амедаль ауаъа йгIайыртхтI. Ауи хIкъраль аунашвачпагIвчва йхIаракIу къральыгIва ртшхъвага шгIайквнадыргаз ахабар ласы йхIымгIазтынгьи, йгIатгараквала абазаква хIыхьыз шйыргауа хIхъа аладута пхата хIйайхIвахIвитI. Темыр Арсен згIвадара багъьа йымата чкIвыныргIа акъвырльыкъвхара йазрыхIазыррала анхараква апхъахьылагьи йгIайдахIвыргIатI.