Йигитлик мутылмаяк

Уллы Аталык кавгасы кутылганлы неше бир онйыллыклар озсалар да, онынъ аькелген ярасы халктынъ юрегинде эш битпеек. Эркин эм тынышлы яшавымыз уьшин яшавларын курманлык эткен ердеслеримиздинъ атлары эш мутылмаяклар. 22 июньде Черкессктинъ Енъуьв Паркында Эскеруьв эм тулланув куьнине багысланган торжестволы митинг озды. Амалламада Карашай-Шеркеш Республикасынынъ Басшысы Рашид Темрезов, КЧР Халк Йыйынынынъ (Парламентининъ) Председатели Александр Иванов, КЧР Правительствосынынъ Председатели Аслан Озов, Черкессктинъ мэри Руслан Тамбиев, Уллы Аталык кавгасынынъ ветеранлары, Правительстводынъ агзалары, депутатлар, дин элшилери, кала яшавшылары катнастылар. Торжестволы митингтинъ басында Керуьв Кавказ мусылманларынынъ Йорыклав Советининъ председатели, КЧР мусылманларынынъ Дин управлениесининъ басшысы Исмаил-аьжи Бердиев эм Керуьв Карашай-Шеркеш округынынъ Пятигорск эм Черкесск епархиясынынъ протоиерейи Александр Нартов Уллы Аталык кавгасында янларын бергенлердинъ сыйына дува эттирдилер. Сонъ митингте КарашайШеркеш Республикасынынъ Басшысы Рашид Темрезов соьз айтты. – Баалы фронтшылар, кавга ветеранлары эм тыл куллыкшылары! 77 йыл артта 1941 йылдынъ июнь айынынъ танъында онлаган миллион аьдемлердинъ яшавларын уьзген эм тарыйхка энъ авыр эм канлы болып кирген Уллы Аталык кавгасы басланган. Элимизди босатув уьшин савлай халк коьтерилген. Кими йигитлерше фронтта согыскан, кими тылда – фабрикаларда эм заводларда Енъуьвди ювыклаткан. Эм миллионлаган бизим яшавшыларымыздынъ аьскершилик йигитликлери эм иси аркалы кыралымыз енъген! Аьр йыл сайын биз аьскершилик мемориаллардынъ касында согыс майданларыннан кайтпаган ата-бабаларымызды, концлагерьлерде оьлтирилген, язалавга ушыраган, ашлыктан эм маразлардан оьлген кыскаяклыларды, картларды эм балаларды эскермеге йыйыламыз. Кыралымыздынъ эркинлиги уьшин яшавларын курманлык эткен аьскершилерге оьмирлик эстелик. Олар юреклеримизде оьмирлерге калаяклар. Коьплер мунда оьз йиенлери эм йиеншерлери мен келгенлер. Яс оьспир Енъуьв кайдай баа ман табылганы акында билмеге керек. Аркалар байланысы уьзилмейди эм эстелик оьмирлер яшаяк. Кавгадынъ катнасувшылары алдында басымызды тоьмен иемиз. Баьри йыйылганларга берк ден савлыкты сагынаман, аспанымыз аьр дайым таза болсын! – деди юртымыздынъ Басшысы. Митингтинъ катнасувшылары уьндемевлик такыйка ман янларын берген ердеслеримизди эскердилер. Уллы Аталык кавгасынынъ ветераны Евгений Мареев оьзининъ соьзинде булай деп айтты: – 77 йыл артта кыралымыз фашист Германиясы ман куьреске кирискен. Совет Союзы согыста шыдады, енъди. Мен суьйикли Элимди коршалаганым уьшин оьктемлимен. Кыска, ама толы «Енъуьв» деген соьздинъ артында миллионлаган совет аьскершилерининъ йигитлиги турады. Бизим балаларымыз тынышлы яшасынлар, эртенги куьнге сенимли болсынлар уьшин баьри зат этиледи. Сонъ митингте Биринши номерли Постынынъ штабынынъ агзасы Азнур Теувов соьйледи, яс аркадынъ атыннан тынышлыкты саклав уьшин баьри затты этееклери акында айтты. Ызында митингтинъ катнасувшылары «Оьмирлик Данък Оты» мемориалынынъ эм «Совет аьскершидинъ – енъуьвшидинъ эстелигининъ» туьбине шешекейлер салдылар.