«ЙБЫРХЪЙИТІ АНЦIРАЛА АРЫПХЬАГІВ ЙУЫС БАРГВЫ»

Къвбина кыт квтанай апхьарта апны абаза бызшвали литературали арыпхьагІв ДОХВТА ФатІима Къасбот йпхІа йылхъыцІыз асквш 75 йазынархаз гвыргъьахъв акIвшатІ. Сквш 59 руацІа асабиква рыбызшва атшауацІыхра, агІазара-бжьара уысква йрыдынхалуа арыпхьагІв йлайхІвахІвырныс ауаъа йгІадгылтІ наукала, арыпхьарала, культурала, спортла, чкІвыныргІа руысквала йгьи туризмла Къарча-Черкес Республика АуагІа Айззара (а-Парламент) акомитет апредседатель БЫДЖЬ Исмель, «Абазашта» газет аредактор хъада КЪВЫЛ Фардауыс, Къарча-Черкес къральыгІва университет апроректор, апрофессор ПІАЗ Сергей, «Абаза» жвлара организация апредседатель ДЗЫУА Зауыр, Россия агIвгIвчва р-Союз йалу ДАГВЖВЕЙ МухІадин, КъарчаЧеркес ауагІа руысагІв ЩЫБЗЫХВА Лариса, аэкономика наукаква ркандидат ГВАНА Муминат, «Алашара» адкIылара апны абаза пхІвысква р-Координационна совет апредседатель МАЛХІВАЗ Залиха, акыт абзазагІвчва, аъахІыльчва, арыпхьагІвчви апхьагІвчви. Агвыргъьахъв хъвлапны акІвзыршуз арыпхьагІв ХІАСАРОКЪВА Елена ауыс пшдза ЩЫБЗЫХВА Лариса луыса асатырквала йгІахъылтІытІ: Абаза бызшва ажваква цырцыруа Абазашта йгІадриуа йтапІ йгвы. Ауи апшдзара бапхьагІвчва йдбырдыруа, ЙбырхъйитІ бынцІрала ари ауыс баргвы. Дохвта ФатІима апхьарта дангІалга ъачІвагІата йгІалылхуашызла щардала дгьымкьангьаштІ – ауи йанакІвызлакІгьи дарыпхьагІвхара лтахъын. Черкесск город йаныргІалыз апедагогика училища дыцІалтІ. Ауаъа дангІалга дшынхузымца Къарча-Черкес къральыгІва педагогика институтгьи дапхьахтІ. ФатІима Къасбот йпхІа лцри абаза бызшва цІолата йылдыритІ, бзидздза йылбитІ, йалрыпхьауа зымгІвагьи ауи йазылбжьитІ. Дъадзанхауа асквшква руацІала апхьарта йгІаллыргаз зъарагІвы йнадзауа гІапхьадзауачвапІ. Ухъагвы аквыта йуызрыбагъьуш закІыпІ – ауат зымгІвагьи рарыпхьагІв лапхьара сахІатква, лгІвычІвгІвысагІа анцІрала ргвы йгІатахатІ. АрыпхьагІвчви асцена апны йгІахъвмаруа артисткви йапшыта лкІгІаракІ рымата рхІвитІ. Анатгьи аратгьи йызквчважвауа ауыс, йгІадырбауа атурасы йрыздзыргІвуа цІолата, абгата йырзынадмырдзакІва рборч дырхъйата йгьырпхьадзум. Дохвта ФатІима (акыт апны зымгІвагьи ауи НурханпІ дызлардыруа) асабиква данрыдынхалуа йщаквгылу амальква йырхъазымкІва лара лхъатачІв методикагьи гІалрысабапитІ. Ауи абызшва, алитература данрыквчважвауа ухъналымрыхкІва амаль амамкІва акІвпІ лайчважвара шадылгалуа. Ауи заманкІ ауацІала арайон арыпхьара хъвшара апны методисттагьи дынхатІ. ФатІима Къасбот йпхІа ауаъагьи лхъвдаквцІараква йнардзата, джьауапкІра ду лылата йлырхъйатІ. Нурхан абаза бызшви литератури бзита йылдыруа йахъазымкІва, аурышв класикква рлитературагьи цІолата дахагІвазапІ. Ауи йапшу аъаща лапхьара сахІатква рпны дазъазата йгІалрысабапитІ, агІвыбызшвакІ ашІлырпшуамца апхьагІвчва адырраква йхъналрыхитІ. Агвыргъьахъв хъвлапны йгІа дгылыз йгьи зюбилей пшдза дыртлапІуз ФатIима Къасбот йпхIа тшырзынайырхауата дгІачважватІ апхьарта адиректор КІВРАЩЫН Умар. Ауи йшихІвазла, арыпхьагІв лаби лани йгІалыларцІаз луасаражври руагІахъа йрызлыму абзибари лапхьагІвчва йрыладлыркІырныс ъалылшауа ахъазла зымгІвагьи швабыжта йылзыразпІ. «Алашара» адкІылара апрезидент ЭГЬЗАКЬ Мусса йхІвахІвра сальамшвъа дгІапхьатІ МалхІваз Залиха. ФатІима Къасбот йпхІа йлайхІвахІвтІ апрофессор ПІаз Сергей, КЧР АуагІа Айззара адепутат Быджь Исмель, «Абазашта» газет аредактор хъада Къвыл Фардауыс, «Абаза» жвлара организация апредседатель Дзыуа Зауыр, апхьахьа Гвана Муминат, агІвгІвы Дагвжвей МухІадин, ауысагІв Щыбзыхва Лариса, йапшым асквшква рагІан апхьарта йгІалгаз акыт абзазагІвчва, анабачва, арыпхьагІвчва. Анйара дрыпшдзатІ абаза театр артистква Хвыжь Людмили Ныр Мурадини. Аюбиляр йгьи апшыгІвчва швабыжта йыргвапхатІ ахореограф шІа Щыбзыхва Бэла йлыргылыз агІахІвыща пшдзаква. Ахъвлапын пхата, гвлахІарата йакІвшатІ. Ауи йалаз аразыра ажваква рзынадырхатІ Дохвта ФатІима йгьи ауи лпхІа Элла