ЙАНАКІВЫЗЛАКІГЬИ ПХАТА ДГІАРГВАЛАШВАХИТІ

Абаза журналистика апны зыхьыз бергьльу аршІыйагІвчва рсатыр далапІ КЪМЫШ Амин Алимырза йпа. Ауи йынцІра шабгаз абаза культура, абаза ажва ртшауацІыхра дазынхатІ. Амин асквш 1949 январь агІан ЙынджьыгьчкІвын кыт апны дйытІ. АпычІв классква данапхьуз азаман йгІашІарышвта ауи ауысаква рыгІвра тшайтуан, дыршІыйарныс бзи йбун. Къмыш Амин 10 класскІ дангІарылга кыт млыкврхІарала аучилища, уадыргІвана атехникум дапхьатІ. Ауи йцри кыт, абаза уагІахъа йырпщылаз ауысква зынгьи дгьрызгвалымсмызтІ, рдахІвракви ргІатгаракви гвыхътІыла драйгвыргъьун. Амин сквшщарда руацІа ареспублика радиуакомпания абаза хъвшара апны аколхозква, асовхозква, акыт млыкврхІара йапщылаз ауысква дгІарыквчважвауа дынхатІ. Ауи йацйырцауата йгьи дыршІыйун. Амин йажваквала йгІандыршаз ашваква 40 йрайхІапІ, ауат арадиуа фонд апны йщтІапІ. Йашва «Шарпны» артист бергьльы Меремкъвыль Ачар йрепертуар йалапІ, аздзыргІвчвагьи бзидздза йырбитІ. ЙынджьыгьчкІвын ауагIа театр знапІыцІаз Агача МухІарбии Къмыш Амини сквшщарда руацІа дахІврала йацынхатІ, ашва щардагьи ацыгІандыршатІ. Амин алирика гIвыраква гІайдахІвуан, ауи акІвымкІвагьи абаза театр злагІахъыртІыз аспектакль апынгьи бзидздзата дгІахъвмартІ. Амин Алимырза йпа йуысаква йагІвсыз асквшышв агІан йгІацІцІыз абаза уысагІвчва разкІкІраква йрыншвалтІ. Амин йхъапщылагьи ршІыйара злу дгІвычІвгІвыспІ, пшдзата къвабыз даситІ, акыт апны йгІащтІырхуа ажвлара уысква йрыцылкІитІ. Ауат гІвпачви пхІакІи гІадзындыргылтІ. АхыгІвгьи уызгІвымсхыз ъачІвагІагІвчвата, гІвычІвгІвысагІа рылата акІвпІ зымгІвагьи йшырдыруа. Амин ареспублика радиуа данынхуз ЙынджьыгьчкІвын кыт дгІатыцІуанта гъынгьи пхынгьи аздзыргІвчва рыхъазла ахабар шІыцква адикІылуан, йанйыргІалуан. Къмыш Амин йгІариква раба йыршІыйара хвы аквырцІауата йгІайтынхаз агІвыраква агІацІщтра йаздрыхІазыртІ, уыжвласыла рмурад шгІардахІвуаш кьангьашра гьалам. Абаза журналистика, ауысара, абаза ашва ртшауацІыхра къару щарда алазцІаз Къмыш Амин январь а 12 сквш 70 йхъыцІуашын. Ауи йагІамкІва адуней йхІваджьызтынгьи, ршІыйара джьащахъва гІайтынхатІ, йгІвычІвгІвысагІари йгвымчІвари ари адгьыл апны йназырдзахуашыз гІари гІайтынхатІ. Ауаса йанаъазара, Амин насып змаз агІвычІвгІвысква дрыуан. Дызцынхаз арадиуа анхагІвчва йгьи абаза уагІахъа Амин йхъмаштылра хвду азырчпауата щардала дгІаргвалашвахитІ, йашваквагьи аздзыргІвчва ргватра азынадырхалитІ. Амин абаза уагІахъа, дъагІадзынгылыз ЙынджьыгьчкІвын кыт абзазагІвчва рхъа зладухауа хІхаквлагІвчва дрыуапІ.