ЙАГЪЬУ АСОЦИАЛЬНА ПРОЕКТКВА ГIАЛЫРКIГIАТI

Арат амшква «Интеллектуально-творческое общество молодежи» Къарча-Черкес Республика чкIвыныргIа рыжвлара адкIылара, РАНХиГС Лагъь КIавкIаз институт ахъвшара йгьи а-Президент грантква р-Фонд рацкIрала асквш 2018 ауацIа хIреспубликала йадыргалыз асоциальна проектква ранкъвакъвра акIвшатI. Асквш 2018 агIан зсоциальна проектква дахIврала йзырхъйаз ареспублика а-Правительства йгьи акоммерция йрылам аорганизациякви адкIыларакви ргIащтийыгIвчва анкъвакъвра йалалырныс йдрайгватI. Анкъвакъвра акомиссия йалан КЧР Ажвлара палата апредседатель МОЛДОВАНОВА Вера, нхарали социальна тшауацIыхрали КЧР аминистр йзаместитель ХВБИ ФатIима, РФ Ажвлара палата йалу, РАНХиГС ЛагъьКIавкIаз институт ахъвшара адиректор ТЛЬЫС Азамат, «Единая Россия» политика партия ашIыпIа хъвшара аунашвачпагIв йзаместитель КЪАРДАН ФатIима, Россия УагIахъа фронт ашIыпIа хъвшара а-Исполком аунашвачпагIв КАППУШЕВА Людмила, «Институт социально-креативного развития актива» чкIвыныргIа рпроектква йрыдынхалуа аорганизация адиректор, «Доброволец России» анкъвакъвра йгьи «Росмолодежь» чкIвыныргIа руысквала афедеральна агентства рэксперт ЗИНКОВСКАЯ Дарья. – Анкъвакъвра мурадта йаму КЧР апны асоциальна проектква дахIврала йдырхъйара ахъазла йрыцкIра, ажвлара организациякви адкIыларакви ауи ауыс йаланаркIра, асоциальна проектлыхра нархара йацызкIуаш институт гIаныршара акIвпI, – рхIватI агIащтийыгIвчва. Анкъвакъвра апны йагъьу жвапроекткI гIалыркIгIатI. «Кавказское здоровье детям» проект йадынхалыз Къарча-Черкес Республика апны анаркомания йапшIагылуа ауысква дырхъйатI. «Ребята нашего двора» проект гIалызхыз атдзаквгылаква рпны йбзазауа асабиква ателефонква йгIаркъвырдумца апахь хъвмарраква йгIарыланадыркIтI. «Очаг добра» проект апенсионерква, ачымазагIвква, зхъахIара мачIу ауагIаква рыхъазла хвыдъа йъачуш, рзаман ъаргуш, рыквлагIвчва йъарабадыруаш Квта гIаныршара йазынархан. «Теплая забота» проект йапшым ашвхIаусыгIваквала бзазартадъа йгIанхата, анышвкъваракIапсартаква рпны йапамакву абзазагIвчва йырцхърагIара, ауат пхата йырчара, йыршвырцIушла йадгалра, ршвъаква ргIащаквыргылхра йадынхалтI. «Бег ради жизни» проектла аонкология йгьи аорфанна згIваква зхьуа асабиква йырцхърагIитI. Ари апроект Къарча-Черкес акIвымкIва арахьарат ареспубликаква рпынгьи йакIвдыршитI. Ауи уалалра ахъазла сом 150-ла билет ухвгIара атахъыпI. ЙгIазыркIкIуа ахчала асаби чымазагIвква йаларцхърагIитI. Ауи сынчIвагьи адзын йакIвдыршарныс йаквдырпшитI. «Чужого горя не бывает» проект лызхыз саби щарда ъагIадзынгылуа, зан йа заба дызмахым атгIачваква йрыцыркIитI. Арат апроектква рунашвачпагIвчва акомиссия йалаз адипломквали аразыра сальамшвъаквали йгIалыркIгIатI. Молдованова Вера ажвлара организацияква лразыра ажваква рзыналырхатI. – Швара швабыжта хIреспублика абзазагIвчва рыхъазла уыс ду швырхъйитI. Аъаща баргвы йташваз ауагIаква швъарызгвалымсым магIны амапI. Апхъахьыла зынхара джвыквызцIагIвацауа адкIылараква швапха гIашвхъырхуашта сгвыгъитI, – лхIватI Молдованова Вера. Акомиссия йалаз аэкспертква апроектлыхра апны намхъарата йырбаз гIалыркIгIатI. – УахьчIва хIызлапшыз асоциальна проектква зымгIва абзазара апны магIын ду рымапI. Проектипхьадза уыс щарда дырхъйатI. Ауаса ауат зхчуз агIащтийыгIвчва ргIачважвараква рахIагьи бзита хIрыдынхалра атахъыпI. РгвалагIваласраквагьи, астатистика пхьадзараквагьи, апроект магIын хъадата йамугьи зымгIва йаъарата йгIарбара атахъыпI. Уыс щарда швырхъйатI, ауаса хIара ауыла хIгIашIасырныс гьхIгвыгъам. ХIапхъахьылагьи ареспублика утыцIта арахьарат ашIыпIаква рпынгьи йгIахIырбуш апроектква хIрыдынхалуаштI, йагъьхIчIвуаштI, – лхIватI Каппушева Людмила. Акомиссия йалаз йацшIакIта «Мобильный центр психологической помощи родителям детей-инвалидов» йагъьу проектта йгIалыркIгIатI. Ауи Байрамкъвыл Светлана унашва зхъылцIауа «Мой ангел» организация йдырхъйатI. Апроект апкъ йтата саби чымазагIв дызму анчва психология цхърагIара ддрадзитI. ДзачIвызлакIгьи ауагIа рбзазаща хIазгвалымсмызтын, заджвы йхьыгIа зымгIвагьи йыцагIвхIшарквын, хIреспублика абзазарагьи рыцIа ймайрахуштI, ауагIагьи адкIылазлуштI.