СКФО В республиках СКФО на 61% вырос спрос на образование с господдержкой СКФО В Ставрополе состоится общегородская зарядка   СКФО Дагестан создаст аналог зарубежных курортов Актуально Почему подростки становятся трудными и как находить с ними общий язык  Актуально Заседание межведомственной рабочей группы по клиентоцентричности прошло в Карачаево-Черкесии

УЛЛУ ХОРЛАМНЫ ПАРАДЫ

20.05.2019 279
УЛЛУ ХОРЛАМНЫ ПАРАДЫ

Къарачай-Черкесияда республикан аралыкъны ара майданында немец-фашист джыртхычла бла къазауатда совет аскер хорлагъаныны 74-чю джыллыгъына аталыб митинг эмда уллу парад болгъанды.

Уллу Хорламгъа джораланнган къууанч джыйылыугъа КъЧР-ни Башчысы Темрезланы Рашид, регионну толтуруучу эмда закон чыгъарыучу властларыны келечилери, Уллу Ата джурт къазауатны ветеранлары, джамагъат бирлешликлени келечилери, Черкесскени джамагъаты эмда къонакъла келген эдиле.

КъЧР-ни Башчысы Темрезланы Рашидге республиканы аскер комиссары, полковник Темиров Арсен къууанч митингни хазырлыгъыны юсюнден рапорт бергенден сора Башчы джыйылгъанланы Уллу Хорламны кюню бла алгъышлагъанды.

Байракъчы къауум майданнга «Хорламны байрагъын», Эресей бла Къарачай-Черкесияны байракъларын чыгъарыб, Эресейни эмда КъЧР-ни гимнлери согъулгъандыла.

Эресейни Президенти В.В. Путинни КъЧР-ни Башчысына эмда республиканы джамагъатына аталгъан Хорлам кюн бла алгъышлауу окъулгъанды.

Алгъышлау телеграммала РФ-ны Правительствосуну Председатели Дмитрий Медведев, РФ-ны Федерал Джыйылыууну Федерация Советини Председатели Валентина Матвиенко, РФ-ны Кърал Думасыны Председатели Вячеслав Володин, РФ-ны Президентини Администрациясыны тамадасы Антон Вайно,  РФ-ны Президентини Шимал Кавказ федерал округда Толу эркинликли келечиси Александр Матовников, къралны субъектлерини башчылары да джибергендиле.

Митингге къошулгъанланы алларында концлагерлени тутмагъы, Уллу Ата джурт къазауатны ветераны Георгий Мартиди да сёлешди. «Хурметли бирджуртчула, бизни къралны кёгю не заманда да рахатлай турсун. Насыб, саулукъ, узакъ ёмюр теджейме барыгъызгъа да», - деди ол. Ызы бла алты сабийни анасы, Хабезни орта школуну устазы Фатима Хапсирокова, «Эресейни башчылары» («Лидеры России») деген Бютеуэресей конкурсну финалисти Амир Аккао, «Акъыллыла бла акъылтокъмакъла» деген Бютеуэресей олимпиаданы республикан дараджасында хорлагъан къызчыкъ, Эркен-Шахарны орта школуну сохтасы Изабелла Керейтова фронтовиклеге разылыкъларын билдириб сёлешгендиле.

Уллу Хорламны 74-джыллыгъына джораланнган къууанч джыйылыу джабылгъандан сора, аскер марш согъулуб, Черкесскени ара майданы бла колоннала тизилиб, парадны къууанч джюрюшю (марш) башланнганды.

Парадны РФ-ны Къоркъуусузлугъуну федерал къуллугъуну КъЧР-де Чекчи управлениесини байракъчы къаууму ачды. Ызы бла РФ-ны Чекчи управлениесини республикан бёлюмю, РФ-ны Къоруулау министерствосуну 34-чю энчи мараучу тау бригадасы, аламда объектлени белгилеген Энчи радиотехника узелни, КъЧР-де Эресей гвардияны управлениесини, МЧС-ни, Джууабха тартыуну толтуруучу федерал къуллукъну КъЧР-де бёлюмюню, Сюдю приставланы федерал къуллугъуну республикан управлениесини къуллукъчулары къошулгъандыла парадха.

Парадны «Юноармия» отрядны, Черкесск шахарны Пост №1 аскер-патриот юретиу аралыгъыны эмда «Подвиг» деген излеучю къауумуну джаш адамларыны колонналары тамамлагъандыла.

Ызы бла майданда «Тигр», «КамАЗ» автомашинала, РФ-ны Миллет гвардия аскерлерини федерал къуллугъуну КъЧР-де управлениесини бронетранспортёрлары, Джууабха тартыуну толтуруучу федерал къуллугъуну КъЧР-де бёлюмюню «Выстрел» деген энчи машиналары дагъыда аны кибик аскер техника баргъанды.

Уллу Хорламны кюнюне джораланнган парад «Ёмюрлюк Махтауну оту» деген мемориалгъа гокка хансла салыу бла бошалгъанды.

 

279 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный