УЛЛУ ХОРЛАМГЪА АТАЛГЪАН ПРОЕКТ

Майны 9-да Къарачай-Черкесияны "Архыз 24″ деген 1-чи республикан телеканалы, «Хорламны джылы» деб бютеу Шимал Кавказда болмагъанча бир проектни толтуруб  башлагъанды. Ол, тамам бир джылны, Уллу Хорламны 70-джыллыгъына дери бардырыллыкъды. "Архыз 24″ телеканалны баш директору Александр Малькевич айтхандан, ол проект, ата-бабаларыбызны бирлешиб этген джигитликлерин эсгертиб, кёб миллетли эмда кёб конфессиялы Къарачай-Черкесияны ёсюб келген джаш тёлюсюн бирикдирир нюзюр бла къуралгъанды. Аны кёзюуюнде "Архыз 24″  телеканалда Уллу Ата джурт къазауатны суратлагъан совет эмда россиячы кинола кёргюзюлгенлей турлукъдула. Аны кибик "Архыз 24″  бериулерин СССР-ни, РФ-ны джигитлерини, республикада ол ачы урушлада ёлгенлеге аталыб салыннган эсгериу къангала бла эсгертмелени эмда джердешлерибизни ол кёзюуде джашауларыны юслеринден бардырлыкъды. БАЙРАМКЪУЛЛАНЫ Зульфия