Лъэпкъ журналистикэмрэ адыгэ драматургиемрэ зи цIэр мыкIуэдыжыну къыхэнащ, цIыхугъэмрэ адыгагъэмрэ къызэбэкIыу зыхэлъащ, лэжьэкIэфIым и щапхъэгъэлъагъуэу щытащ илъэс 40-м зэрынэхьэскIэ «Черкес хэку» газетым щылэжьа Дэбагъуэ Мухьэмэд Къэлэбэч и къуэр. Дэбагъуэм и цIэр зымыцIыху ди республикэм дэнэ къэна, къуэш хэгъуэгухэми щыIэу фIэщ щIыгъуейщ. АтIэ, творческэ цIыхушхуэу щыткIэрэ, Мухьэмэд цIэрыIуэ хъуащ абы и Iэдакъэ къыщIэкIа прозэмрэ усыгъэмрэ, уэрэдхэмрэ пьесэхэмрэкIэ. ЖыпIэнурамэ, цIыхубэм гуимыхуж ящыхъуауэ ноби яIурылъщ Мухьэмэд къигъэщIа уэрэд телъыджэхэр. Шэчыншэщи, Дэбагъуэм къыщIэна щэнхабзэ лъэужьыр мыкIуэдыжынщ. ЗэрыжытIауэ, Мухьэмэд лъэныкъуэ куэдымкIэ зэчиифIэт: ар икIи усакIуэт, икIи тхакIуэт, икIи драматургт, абыхэм къадэкIуэуи, журналист лъэрыхьт. И гъащIэр зрипха лъэпкъ газетым деж и псалъэм пщIэшхуэ щиIэу, илъэс куэдкIэ купщIафIэу лъэпкъым хуэлэжьащ. Сыт хуэдэ Iуэху Мухьэмэд пэрымыувэми, зи къалэныр нэгъэсауэ сыт щыгъуи зыгъэзащIэ, сыт хуэдэ Iуэхуми гугъу демыхьу, цIыхум я гум IэфIу къинэжу, тхыдэ лъэужь мыкIуэдыжын уагъэу иридэу зи лэжьыгъэр къызыдэхъу творческэ цIыху щэджащэу щытащ. Дэбагъуэм пщIэшхуэ хуищIт ныбжьэгъугъэм, езыри абы хуэщыпкъэт. Мухьэмэд лъэпкъыпсэу зэрыщытам щымыгъуазэ щыIэжкъым… Хэку зауэшхуэм и япэ илъэс хьэлъэм, 1941 гъэм жэпуэгъуэм (октябрым) и 10-м Мухьэмэд къыщалъхуащ Жьакуэ (Алъэсчырей) адыгэ къуажэжьым. Педагог IэщIагъэр къыхихащ икIи абы хуеджащ. Ауэ педагогическэ ищхьэ щIэныгъэ зэзыгъэгъуэт Дэбагъуэм и еджэгъуэ илъэсхэм щыгъуэ щIедзэ и литературэ творчествэм зыкъызэкъуихыныр. Апщыгъуэми дунейм къытохьэ Мухьэмэд и япэ усэхэр, рассказ цIыкIухэр, ахэр къытрадзэ «Черкес пэж» (иджы «Черкес хэку») газетым. 1965 гъэм Мухьэмэд лъэпкъ газетым щылэжьэн щIедзэ. 1972 гъэм область драмэ театрым ипкъ иту лъэпкъ труппэхэр къызэрагъэпэщкIэрэ, мы Iуэхур лъабжьэшхуэ хуэхъуащ адыгэ драматургием и зэфIэувэныгъэм. Абы и къызэгъэпэщакIуэ жыджэр хъуахэм ящыщщ Дэбагъуэ Мухьэмэди. Режиссер Абдокъуэ Маталио щIыгъуу Мухьэмэд елэжьащ Уэхъутэ Абдулыхь и «Iэсият и мывэ» повестым пьесэ тещIыкIыным, «Красная косынка», «Мать предателя», «Волшебный наперсток» таурыхъхэр пьесэм и пкъым игъэувэным. Мы творческэ цIыхуитIым я лэжьыгъэ купщIафIэ хъуащ ТхьэйцIыху Б. и «ЩIы IэмыщIэ» романым тращIыкIа пьесэр. 1981 гъэм драматург Дэбагъуэр пэроувэ и закъуэ и творческэ зыужьыныгъэм пищэным. Абы къегъэщI «Глаз великана» пьесэ-таурыхъыр. Абы къыкIэлъокIуэ «Мать - зеница ока» пьесэр, «Вот как надо замуж выходить» гушыIэ-водевилыр (мы жанрымкIэ адыгэ драматургием Мухьэмэдщ япэрейуэ лъэбакъуэ зычар), пьесэ-таурыхъхэу «Храбрый Гучипса», «Сосруко» хуэдэхэр. Мы пьесэхэр республикэ драмэ театрым и адыгэ труппэм игъэувауэ щытащ. Нэхъ кIасэу Дэбагъуэм и творческэ щIэиным къыхэхъуащ «ФIы зыщIэ щIегъуэжыркъым», «Напэр нэхъыщхьэщ», «Мишутка», «Я Мухарбий» нэгъуэщI пьесэхэри. Дэбагъуэм и драматургием и хьэл нэхъыщхьэр – цIыхухэр зыгъэпIейтей лъэпощхьэпохэм захуигъэзэнращ. Мухьэмэд лэжьыгъэ купщIафIэ игуэщIащ адыгэ зрителым нэгъуэщI къэралхэм я драматургием и беягъыр нигъэIэсынымкIэ. Апхуэдэу, Дэбагъуэм урыс авторхэм я пьесэ 12 адыгэбзэкIэ зэридзэкIащ, ахэр театрым дежи щагъэувауэ щытащ. Къэрэшей-Черкес тхылъ тедзапIэм Дэбагъуэм къыщыдигъэкIащ и очеркхэр, рассказхэр, повестхэмрэ пьесэхэмрэ здызэхуэхьэса: «ЩIыгур зыгъэщIэращIэ», «Псынэдахэ и бжьыхьэ», «Iэпхъуалъэ телъыджэ» сборникхэр. ИщхьэкIэ зэрыжытIауэ, драматург Дэбагъуэр фIыуэ къацIыху зэры-тхакIуэ, усакIуэ-уэрэдусымкIэ. И усэхэу: «Навеки», «Пляшет, танцует...», «Умар Хабеков», «Когда я встречу тебя?», «Лишь глазам я верю», «Освети мне мир», «Это есть любовь», «Моя краса», «Калина», нэгъуэщIхэри Къэрэшей-Черкесым, Адыгэ, Къэбэрдей-Балъкъэр республикэхэм и артистхэм куэдрэ утыкум щыжаIэ. 1993 гъэм къыщыщIэдзауэ 2003 гъэм нэс Мухьэмэд «Черкес хэку» газетым и редактор нэхъыщхьэу лэжьащ. 1989 гъэм ар хагъэхьащ СССР-м и тхакIуэхэм я Союзым. Адыгэ драматургиер, лъэпкъ журналистикэр псэемыблэжу егъэфIэкIуэнымрэ зегъэужьынымрэ илъэс куэд хуэзыгъэтIылъа Дэбагъуэм и лэжьыгъэр къэралым щIыхь лъагэхэмкIэ къыхигъэщащ. Абы къыхуагъэфэщащ «УФ-м щэнхабзэмкIэ щIыхь зиIэ и лэжьакIуэ», «Адыгэ, Къэбэрдей-Балъкъэр республикэхэм щIыхь зиIэ и журналист», «КъЧР-м и цIыхубэ тхакIуэ», «Печатым и Отличник» фIэщыгъэцIэ лъагэхэр. Псэ къабзащэу дунейм тета, адыгэ журналистикэмрэ лъэпкъ театрымрэ я зыужьыныгъэм хэлъхьэныгъэшхуэ хуэзыщIа Дэбагъуэ Мухьэмэд и феплъыр мыкIуэдыжын зыщIа Iуэхугъуэхэм ящыщщ ар зыщыпсэуа унэм и фэеплъ пхъэбгъу къызэрыщызэIуахар. Къэрэшей-Черкесым и литературэм, лъэпкъ журналистикэм иджыри IуэхуфI куэд хуэзыщIэфыну щыта Дэбагъуэ Мухьэмэд 2003 гъэм игъуэ нэмысу дунейм ехыжащ. Ауэ Дэбагъуэм и Iэдакъэ къыщIэкIа пьесэхэр, макъамэ зыщIалъхьэжа и усэхэр цIыхубэм ену къыдэгъуэгурыкIуэнущ, ахэр уасэншэщ. Мухьэмэд и гъащIэр, къанэ щымыIэу, лэжьыгъэм, цIыхубэм хуэлэжьэным иритащ. Абы и щэнхабзэ щIэиныр, и цIыхугъэ лъагэр цIыхубэм ягу ихунукъым. Источник: riakchr.ru
Лъэпкъ журналистикэмрэ адыгэ драматургиемрэ зи цIэр мыкIуэдыжыну къыхэнащ, цIыхугъэмрэ адыгагъэмрэ къызэбэкIыу зыхэлъащ, лэжьэкIэфIым и щапхъэгъэлъагъуэу щытащ илъэс 40-м зэрынэхьэскIэ «Черкес хэку» газетым щылэжьа Дэбагъуэ Мухьэмэд Къэлэбэч и къуэр. Дэбагъуэм и цIэр зымыцIыху ди республикэм дэнэ къэна, къуэш хэгъуэгухэми щыIэу фIэщ щIыгъуейщ. АтIэ, творческэ цIыхушхуэу щыткIэрэ, Мухьэмэд цIэрыIуэ хъуащ абы и Iэдакъэ къыщIэкIа прозэмрэ усыгъэмрэ, уэрэдхэмрэ пьесэхэмрэкIэ. ЖыпIэнурамэ, цIыхубэм гуимыхуж ящыхъуауэ ноби яIурылъщ Мухьэмэд къигъэщIа уэрэд телъыджэхэр. Шэчыншэщи, Дэбагъуэм къыщIэна щэнхабзэ лъэужьыр мыкIуэдыжынщ. ЗэрыжытIауэ, Мухьэмэд лъэныкъуэ куэдымкIэ зэчиифIэт: ар икIи усакIуэт, икIи тхакIуэт, икIи драматургт, абыхэм къадэкIуэуи, журналист лъэрыхьт. И гъащIэр зрипха лъэпкъ газетым деж и псалъэм пщIэшхуэ щиIэу, илъэс куэдкIэ купщIафIэу лъэпкъым хуэлэжьащ. Сыт хуэдэ Iуэху Мухьэмэд пэрымыувэми, зи къалэныр нэгъэсауэ сыт щыгъуи зыгъэзащIэ, сыт хуэдэ Iуэхуми гугъу демыхьу, цIыхум я гум IэфIу къинэжу, тхыдэ лъэужь мыкIуэдыжын уагъэу иридэу зи лэжьыгъэр къызыдэхъу творческэ цIыху щэджащэу щытащ. Дэбагъуэм пщIэшхуэ хуищIт ныбжьэгъугъэм, езыри абы хуэщыпкъэт. Мухьэмэд лъэпкъыпсэу зэрыщытам щымыгъуазэ щыIэжкъым… Хэку зауэшхуэм и япэ илъэс хьэлъэм, 1941 гъэм жэпуэгъуэм (октябрым) и 10-м Мухьэмэд къыщалъхуащ Жьакуэ (Алъэсчырей) адыгэ къуажэжьым. Педагог IэщIагъэр къыхихащ икIи абы хуеджащ. Ауэ педагогическэ ищхьэ щIэныгъэ зэзыгъэгъуэт Дэбагъуэм и еджэгъуэ илъэсхэм щыгъуэ щIедзэ и литературэ творчествэм зыкъызэкъуихыныр. Апщыгъуэми дунейм къытохьэ Мухьэмэд и япэ усэхэр, рассказ цIыкIухэр, ахэр къытрадзэ «Черкес пэж» (иджы «Черкес хэку») газетым. 1965 гъэм Мухьэмэд лъэпкъ газетым щылэжьэн щIедзэ. 1972 гъэм область драмэ театрым ипкъ иту лъэпкъ труппэхэр къызэрагъэпэщкIэрэ, мы Iуэхур лъабжьэшхуэ хуэхъуащ адыгэ драматургием и зэфIэувэныгъэм. Абы и къызэгъэпэщакIуэ жыджэр хъуахэм ящыщщ Дэбагъуэ Мухьэмэди. Режиссер Абдокъуэ Маталио щIыгъуу Мухьэмэд елэжьащ Уэхъутэ Абдулыхь и «Iэсият и мывэ» повестым пьесэ тещIыкIыным, «Красная косынка», «Мать предателя», «Волшебный наперсток» таурыхъхэр пьесэм и пкъым игъэувэным. Мы творческэ цIыхуитIым я лэжьыгъэ купщIафIэ хъуащ ТхьэйцIыху Б. и «ЩIы IэмыщIэ» романым тращIыкIа пьесэр. 1981 гъэм драматург Дэбагъуэр пэроувэ и закъуэ и творческэ зыужьыныгъэм пищэным. Абы къегъэщI «Глаз великана» пьесэ-таурыхъыр. Абы къыкIэлъокIуэ «Мать - зеница ока» пьесэр, «Вот как надо замуж выходить» гушыIэ-водевилыр (мы жанрымкIэ адыгэ драматургием Мухьэмэдщ япэрейуэ лъэбакъуэ зычар), пьесэ-таурыхъхэу «Храбрый Гучипса», «Сосруко» хуэдэхэр. Мы пьесэхэр республикэ драмэ театрым и адыгэ труппэм игъэувауэ щытащ. Нэхъ кIасэу Дэбагъуэм и творческэ щIэиным къыхэхъуащ «ФIы зыщIэ щIегъуэжыркъым», «Напэр нэхъыщхьэщ», «Мишутка», «Я Мухарбий» нэгъуэщI пьесэхэри. Дэбагъуэм и драматургием и хьэл нэхъыщхьэр – цIыхухэр зыгъэпIейтей лъэпощхьэпохэм захуигъэзэнращ. Мухьэмэд лэжьыгъэ купщIафIэ игуэщIащ адыгэ зрителым нэгъуэщI къэралхэм я драматургием и беягъыр нигъэIэсынымкIэ. Апхуэдэу, Дэбагъуэм урыс авторхэм я пьесэ 12 адыгэбзэкIэ зэридзэкIащ, ахэр театрым дежи щагъэувауэ щытащ. Къэрэшей-Черкес тхылъ тедзапIэм Дэбагъуэм къыщыдигъэкIащ и очеркхэр, рассказхэр, повестхэмрэ пьесэхэмрэ здызэхуэхьэса: «ЩIыгур зыгъэщIэращIэ», «Псынэдахэ и бжьыхьэ», «Iэпхъуалъэ телъыджэ» сборникхэр. ИщхьэкIэ зэрыжытIауэ, драматург Дэбагъуэр фIыуэ къацIыху зэры-тхакIуэ, усакIуэ-уэрэдусымкIэ. И усэхэу: «Навеки», «Пляшет, танцует...», «Умар Хабеков», «Когда я встречу тебя?», «Лишь глазам я верю», «Освети мне мир», «Это есть любовь», «Моя краса», «Калина», нэгъуэщIхэри Къэрэшей-Черкесым, Адыгэ, Къэбэрдей-Балъкъэр республикэхэм и артистхэм куэдрэ утыкум щыжаIэ. 1993 гъэм къыщыщIэдзауэ 2003 гъэм нэс Мухьэмэд «Черкес хэку» газетым и редактор нэхъыщхьэу лэжьащ. 1989 гъэм ар хагъэхьащ СССР-м и тхакIуэхэм я Союзым. Адыгэ драматургиер, лъэпкъ журналистикэр псэемыблэжу егъэфIэкIуэнымрэ зегъэужьынымрэ илъэс куэд хуэзыгъэтIылъа Дэбагъуэм и лэжьыгъэр къэралым щIыхь лъагэхэмкIэ къыхигъэщащ. Абы къыхуагъэфэщащ «УФ-м щэнхабзэмкIэ щIыхь зиIэ и лэжьакIуэ», «Адыгэ, Къэбэрдей-Балъкъэр республикэхэм щIыхь зиIэ и журналист», «КъЧР-м и цIыхубэ тхакIуэ», «Печатым и Отличник» фIэщыгъэцIэ лъагэхэр. Псэ къабзащэу дунейм тета, адыгэ журналистикэмрэ лъэпкъ театрымрэ я зыужьыныгъэм хэлъхьэныгъэшхуэ хуэзыщIа Дэбагъуэ Мухьэмэд и феплъыр мыкIуэдыжын зыщIа Iуэхугъуэхэм ящыщщ ар зыщыпсэуа унэм и фэеплъ пхъэбгъу къызэрыщызэIуахар. Къэрэшей-Черкесым и литературэм, лъэпкъ журналистикэм иджыри IуэхуфI куэд хуэзыщIэфыну щыта Дэбагъуэ Мухьэмэд 2003 гъэм игъуэ нэмысу дунейм ехыжащ. Ауэ Дэбагъуэм и Iэдакъэ къыщIэкIа пьесэхэр, макъамэ зыщIалъхьэжа и усэхэр цIыхубэм ену къыдэгъуэгурыкIуэнущ, ахэр уасэншэщ. Мухьэмэд и гъащIэр, къанэ щымыIэу, лэжьыгъэм, цIыхубэм хуэлэжьэным иритащ. Абы и щэнхабзэ щIэиныр, и цIыхугъэ лъагэр цIыхубэм ягу ихунукъым. Источник: riakchr.ru
Получайте свежие новости на электронную почту
Комментарии