Карачаевскени сабий библиотекасы “Табигъатны сейир дуниясыны юсюнден” сейир дерс бардыргъанды. Карачаевскени Культура къаласында джангырыу ишле баргъанлары себебли мероприятие шахарны ара библиотекасында ётгенди. “Культураны, солууну, библиотека джумушланы аралыгъыны” тамада методисти Елизавета Сохиева бла сабий библиотеканы тамадасы Къулчаланы Фатима тюбешиуню къонакълары болгъандыла. “Информация сагъатны” сабий библиотеканы къуллукъчусу Акъбайланы Фатима бардыргъанды. Ол сабийлеге экологияны, культураны юслеринден хапар айтханды. Табигъатны сакълау бла байламлы илму тинтиуле бла шагъырей этгенди. Джер планетада экология болумну сюзгенден сора сабийлени билимлерин ачыкълар мурат бла викторина бардырылгъанды. Табигъатны юсюнден назмула, эл берген джомакъла, “Мени сюйген джаныуарларым” видеоролик, интерактив къангада суратла сабийлени табигъатны сакъларгъа, сюерге юретгендиле. Шахарны 1-чи номерли школуну сохталары Шакаева Алина, Къочхарланы Рустам, Мелекъайланы Анбар кеслери джазгъан назмуланы окъугъандыла. Аланы хар бири табигъатны ариу дуниясын туудукъларыбызгъа сакъларгъа чакъыргъанды.
Комментарии