Бу кюнледе Къарачай-Черкес Республиканы Башчысы Темрезланы Рашид Гитче Къарачай районнга ишни юсю бла баргъан сагъатда, Къарачай-Черкесияны махтаулу устазы, районну сыйлы къарты Ёзденланы Магомет-Алийини джашы Муссаны 88 джыл толгъаны бла алгъышлагъанды.
Ёзденланы Мусса Первомай элни, андан сора Ючкекенни орта билим берген школларыны директору болуб ишлегенди. Андан сора халкъ окъууну район бёлюмюню тамадасы къуллукъну толтургъанды. Бусагъатда Гитче Къарачай районну къартларыны советини тамадасыды.
Кърал аны къыйынына багъа бере, кёб тюрлю саугъала бла саугъалагъанды. Аланы арасында РСФСР-ни Билим министерствосуну грамоталары, талай медалы бардыла.
Ол башчылыкъ этиб районда джергили Джигитлени аллеясы ачылгъанды. Магомет-Алийни джашы Муссаны аты кёкде джулдузланы бирине аталгъанды. Ол Гитче Къарачай районну сыйлы адамыды.
Къарачай-Черкесияны Башчысы Темрезланы Рашид Ёзденланы Муссаны, окъууну ёсюмюне, джаш тёлюню патриотлукъгъа юретиуге салгъан уллу къыйынын эсге ала, «Къарачай-Черкес Республиканы аллында махтаулу ишлери ючюн» деген орден бла саугъалагъанды.
Комментарии