СОЦИАЛИСТ НХАРА АФЫР СОГIА ЙЗИЧПАТI

Псыжв кыт абзазагIв, Социалист Нхара а-Фыр КIЬАШВАУА ДаткIа КIара йпа КЧР а-Хъада Темрезов Рашид йыхьызла МТЗ-83 «Беларусь» трактор согIата йырттI. Атрактор шIыц анйыртуаз йакIвшаз айззара йалан КЧР а-Правительства а-Председатель йапхъахауа йзаместитель БАЙЧОРОВ Эльдар, акыт млыкврхIарала КЧР аминистр БОТАШЕВ Анзор, Абаза район администрация ахъада НЫР МухIаджьыр, Псыжв кыт ахъада ТОБЫЛЬ Мурат, нхарала зыхьыз зыргаз ахIбачва, КIьашвауа ДаткIа йтгIачва. – Хвы зквхIцIауа ДаткIа КIара йпа, уара уынцIра шабгу адгьылрхарджьра йауттI, нхарала хIреспубликала йахъазымкIва, хIкъральла уыхьыз уыргатI. УъанхалакIгьи ухачIвква гвхътIыла йуырхъйауа уъабзазауа ареспублика, уцри кыт ркъагIара, ртшауацIыхра къару ду алауцIатI. УахьчIвагьи унымхауата тынчта уыгьчIвам, нхагIвыта йгIадзынуыргылыз упачва, ауат йгIарыцIагылыз ачкIвынчва уырцхърагIитI. КЧР а-Хъада Темрезов Рашид йыхьызла йуыхIтуа атрактор шIыц уаргьи ауи йаланхуш зымгIвагьи швгвы анчвгIарагIатI, – КIьашвауа ДаткIа дйайхIвахIвуата йхIватI Байчоров Эльдар. Атехника ашвъакви ацIапхакви апшвыма йанйырт амщтахь КIьашвауа ДаткIа Байчоров Эльдаргьи дйыдзхъайырчIван, атрактор шIыц йаланыкъватI. Ари атшын согIа тлапIа зыртыз КIьашвауа ДаткIа жвах сквша рахIа дыртамкIва йынхара джвыквицIатI. Асквшква 1956–1961 руацIа къвырльыкъвхара дызшIыртнадзыкIьа Псыжв кыт аколхоз апны дынхатI. ДангIахъынхIвых, асквш 1962 йгIашIарышвта «Кубань» колхоз адгьылква сквшщарда йырхарджьтI. Адгьылрхарджьрала амлыкврхIарта анхагIвчва драпхъагылагIвын, согIата йзырчпаз атрактор апш техника сквш 40 айхIа даланхатI. КIьашвауа ДаткIа хIреспублика агропромышленна комплекс атшауацIыхра къару ду шалайцIаз йагIарбагата йгIайквнадыргаз къральыгIва ртшхъвага щарда йымапI – «Знак почета», «Трудового Красного Знамени» орденква. Асквш 1990, август а 23 акытмлыкврхIара атшауацIыхра къару ду ъалайцIаз ахъазла «Социалист Нхара а-Фыр» хьзы гIайквнадыргатI. Асквш 2000 агIан «Къарча-Черкес Республикала гIатгара зму акыт млыкврхIара анхагIвы» ЧIахIра хьзы данкъвгагIвхатI. КIьашвауа ДаткIа КПСС КЧРла обкомгьи далан, СССР а-Верховна Советгьи дадепутатын. Сквш 76 йырту КIьашвауа ДаткIа ауи апш согIа тлапIа ъайзалырхыз швабыжта дайгвыргъьатI. Ауи йуысква назырдзахуа йпачва, йаща, ауи йгIариква адгьыл йызладынхалуа атехника ужвыгьи трактор шIыцкI гIарылахIатI. КIьашвауа ДаткIа йшихIвазла, КЧР а-Хъада Темрезов Рашид йсогIа – МТЗ-83 «Беларусь» тракторла техника ззымхъауа афермерквагьи йаларцхърагIуштI. Социалист Нхара а-Фыр йтгIачва рыхьызла согIа йзызчпаз хIреспублика аунашвачпагIв аразыра ажваква йзынайырхатI, Къарча-Черкес абзазагIвчва згIвадара, насып рзитахъта Асквш шIыцла драйхIвахIвтI.