СКЫТ АХIВССА

АхIвсса. Ауатдъа хIыгвква хьшвашвахарын, адгьыл ахъахь бзибара, бзазара гьгIанымшарызтI. «Насып гьйымам зунагIва хIвсыса дыгIвнам» – рхIвитI ауагIа. Сквшщарда рцIыхъвала бзидздзата йыздыруаз, аобласть радиуа адиктор Гаги Дина санылшIашва «Сабита йуымайа?»-хIва дгIасцIгIатI. Саргьи дукI йасымрыхьуата «АлахI йгIаситыз хыгIвпачва сымапI» схIватI. Дина лхъа мачIкIгьи йлыркацан, «Апачваква джьапкъпI, ауаса хIвсыса дызмам усымарыцхIапI». Ауи ауаса зылхIваз зынла йыгьгIасгвнымгIвытI. Ужвы сайгвыргъьитI сычкIвынчва рпIатIу щтIызхуаш, ргвыргъьахъв наздасуаш, йзыртлапIуш ахщакI дъарыму. АхIвсса. ЙыгьмачIгIвым ауат Красна Восток апсыхIва апны. УагIата йбзазауа йгIарыквхта гIвынзыкьыгIв раъара хIвсысапI. Ауат рбзирала сцришта аквпшыра йазхIитI, хIытшгIваква апхара гьрыгIвныцIуам, атацанадылраква акIвшитI, хIуачIвы йащайдзахуш асабиква адуней йгIаквлитI. Квырмыш ду рквнагапI абзазара йагву ахIвсса. Зъара баргвыра йгIарылсйа, зъара гIазаб рчакьйа, зъара гвакъвпра рхътшайа ахIвссаахIбачва! РахIа йгвмачIыгIваз айсра мыжда акIвпI. Зъара хвыртайа ауи адгьыли ауагIи йрыннацIаз? ЗъарагIвуда ауи йарыгвмачIыз, йрагIамкIва йарышлаз, йарйыбаз? Абашта айсра Ду Красна Восток кыт заджвыкI апны пхIвыс чвзабата 260-гIв раъара гIаннажьтI. Йара ауаса аполитика репрессияква йрылашваз, щтадъа йдрыдзыз ахъачва рхъапщылаквагьи ймачIымкIва чвзабата йгIанхатI. Мгва йтата, саби пшката, тIакIв йгIалхIвата йыбата йгIанхаз ахIвсса щта! СгIвылакI йрыцIаркIвапI агвакъвпра йгIалцIла аладз кIазчвуз апхIвыс чвзабаква Къахвын Нана, Кълыч Цаца, Узден Самама, Байрамыкъва БачкIа, КIьыча Сурат, ГIап Сахана, Адам Дзадзухан, Хъакъвпщ Сарата, Эгьзакь Дуща, ХIапIатI Щумисат датшагьи. Ауат йшырхIвахуазла, руацIаква ташIахIвата уахъгьи тшынгьи йынхун, дара чгарыгьи рсабиква амла йгьадмыргатI. Асквш 1942 агIан акъарча тпхIа, Ворошилов йыхьыз зхъыз аколхоз аправлена йалаз Чква Рахима йадылкIылыз апхIвыс чвахчва гвып айсра йпшцIаз ртшбыгква гIащтIырхын, апхкI шабгаз чва рхытI, аколхоз арахв амла йадмыргауата йыгъныцIыргатI. Абашта айсра Ду акIвшауата Аджьбакь Самама, Байрамыкъва Разна, Апса Роза, Хвби Нана, Лачвыш ФатIимат, Сальыкъ Чача, Тауыж Баблина датшагьи дара рахIварала ПервомайскI МТС апны трактористта йапхьатI, Бакьышт станица уагIвста йрымаз адгьыл апны адгьыл дырхарджьтI, тшыгIвра гIацIаргатI. Ауат чгIвычала йгьи рызкъыла йшгIапсузгьи руыс гьгIатамхатI, йыртлакIьуазла афронт йацхърагIатI, АйгIайра гIадраргвантI. Асквш 1936 агIан акыт йгIатанагаз Марченко Галина акушерта йылцрихаз акыт апны дынхатI, сабита 2-н зыкьыгIв райхIа щтIылхтI. Айсра сквшква, ауи амщтахь ахIвсса фыррата йгIадырбаз хвы аквырцIауата щардагIвы артшхъвага дуква гIарквнадыргатI. Ауат йрыуапI «Ленин» йорден гIазквнадыргаз абамбирхарджьыгIв Гьабан Къанитат, ажвхьагIв Хъакъвпщ КIвнаца, «АуагIа райгвара», «Знак Почета» орденква гIазквнадыргаз Огвыз Тамара, «Анхара Абаракъ Къапщ» гIазыртыз, архъархарджьыгIвчва гвып йрунашвачпагIвыз Чква Рахима, «Анхара Абаракъ Къапщ» орденква йрынкъвгагIвыз акушер Марченко Галина йгьи арыпхьагIв Адам Альмысхан, «Ан-фыр» орден гIазквнадыргаз, 12-гIв сабичва гIадзынзыргылыз Чагва Маруса йгьи Огвыз Соня датшагьи. Абаргвыраква йгIарылсыз, амлагьи, ахьтагьи, ачгIвычадарагьи зыршышыз, хвгIвысабичва гIадзынзыргылыз Эгьзакь Зоя Рамазан йпхIа апхIвыс лыхв зынгьи йыгьналмыркъвытI, лытшгIва гьлымрыхьтI, лсабиква ргIариквагьи лбжьагажва йацIата дбзазитI. АхIбачва рхабза пшдза апхъала йназрыскIьауа, йапшым аъанатIаквала йынхауа ахIвсса йрыуата зуагIахъара зхчауа гьмачIым. Ауат дрыуапI «Айщчваква НагайргIа» урам йбзазауа, нхаралагьи бзазаралагьи йшвапху, 10-гIвы сабичва гIадзынзыргылыз, «Ан-фыр» орден гIазквнадыргаз Къардан Тезада, 10-гIвы сабичва ран ХвытI Щаща, 9-гIвы сабичва зму Чква КIвыжькIвыжь, 8-гIвы сабичва гIадзынзыргылыз Хвби Захират, ХIаткъва Зулида, Шармат Зурида датшагьи. Саби щардагIв ъагIадзынгылуа атгIачваква баргвырата йызшIашвауа гьмачIым, ауаса ауат йхъаду лкIгIаракI рымапI: абагвынгIвыра рызбжьата, азаджв азаджв хвы йыквицIауа, бзи йабабауа йгIадзынгылитI. Красна Восток кыт ййыз, араъа йгIадзынгылыз, зылахь Учкекен кыт йагата йбзазауа Боташева (Ар) Тамара асквш 1974 агIан Москва йакIвшаз ВЛКСМ й-XVII-хауа асъезд даделегатын. Красна Восток кыт йтагылу ачымазагIвтара сквш 40 райхIа цIуата медахщата йынхауа, асаби хвыцква рызгIвадара йахъпшылуа Лачвыш Тамара лъачIвагIа бзидздзата йылдыритI, дгвапапI, лнапIква пшкапI, дызпщылу ауыс йнардзата йлырхъйитI. Тамара йшылхIвауала, асквш 1975 йгIашIарышвта асабиква рызгIвадара дахъпшылитI. Асаби зтшын адуней дгIаквылуа йгIашIарышвта 18 сквшадза лылапш дыцIапI. УахьчIвала ауат рпхьадзара 530 йнадзитI. Ауат йрыуата 19-гIв сквшыкI йыгьнамдзастI, рызбжагIв хIвсысапI. Ауат дрылапI ари асурат йгIанарбауа КъарабашргIа Азамати Инги рунагIва цIыпх декабрь а 19 йгIарылахIаз Марика хвыцгьи. Ауи мара нурта апшцIа гIалыркIкIатI, пхIвыспа пшдзата далыргIатI, дызгIвадата дгIадзынгылыргIатI. АхIвсса. Ауат хIбзазара йагвыпI, хIунагIва йапхарапI, хIпхыцIа йамахъвдапI. ЙхIыцызтI, йхIыгымхатI мара нурта хIгIазыркIкIауа, хвышхвата йхIзалуа ауат рнапIква.