СХАКВЛАГІВЧВА СХЪА РЫЛАДУХИТІ

ДзачІвызлакІгьи данхвыцу азаман йгІашІарышвта йгвы мурадкІ тайкІитІ, ауи дазычІвырхъитІ. Згвтара айрышта ацІыхъва йтагылыз дгьагІщум, абзазара рхъвыхра щардала йшалугьи паса йгІайгвынгІвитІ. Абаргвыраква лхІаль дрыбагъьауа рхъвыхра щарда дгІарылстІ уахьчІва аргваныта швзабасырдырра стахъу абаза пхІвыспа. Ага ауаса йаъазтынгьи, щтахьла дгьгІатымхъатІ, чхІара лымата лгвалаква дырзычІвырхъитІ. ЩЫБЗЫХВА Зарема Рамазан йпхІа МосковскIа поселок аквтанай апхьарта хьапщ медальла дгІалган, аэкономикала, астатистикала йгьи аинформатикала Москва къральыгIва институт (МЭСИ) «финансы и кредит» факультет дыцІалтІ. – Йапхъахауа акурс санапхьуз сцри шІыпІаква, съахІыльчва, стгІачва швабыжта йгІасгвалашвун. МачІ-мачІымца сащцахтІ. ЙгІвбахауа акурс саннадза сапхьара анхарагьи ацсырцауа йджвыквсцІатІ. Абанк апны сынхатІ, атшыбжьараквагьи йара ауаъа сырхъыстІ, швапхата йсырхІазгьи гьмачІым, – лхІвитІ апхІвыспа. Щыбзыхва Зарема Москва город апны йгІаныршу Абаза адкІылара йалугьи зынла драбадыртІ. ЧкIвыныргIа ащтаныкъваща пшдза рызбжьапІ, агвыргъьахъвква рагІан йашІашвалитІ, йайчважвалитІ, рстудент сквшква пхата йгІаргвалашвахитІ. Зарема Рамазан йпхІа аквтанай апхьарта апны лдырраква рыщата щтІазцІази аъачІвагІа гІацІгарта апны дазрыпхьази швабыжта дырзыразпІ. УахьчІвала ауи дъанхауа Сбербанк ахъвшара апны дызлу дгІархьымшвауата лхъвдаквцІараква йнардзата йлырхъйитІ. АпхІвыспа дыззынадзазла дгІашІамсуата лхъа дадынхалитІ, дазгІашыкъта ашІыцраква ллырдыруамца лхъагвы аквыта лапхъала дчІвырхъитІ. Абаза пхІвыспа гврыхва дызлу агвып йджьарщауата шви пхи лыквта тшгІалырбитІ, даргьи хвы лзырбитІ. Москва город дупІ, хІкъраль йастолицапІ. Араъа съадзабзазауа, съадзанхауа азаман ауацІала сцри Къарча-Черкес Республика йауата сзабадырыз ашІаква рыуа заджвгьи дгІазлыцІыз ауагІахъи дгІадзынзыргылыз атгІачви йгІайыларцІаз агвынгІвыраква драйжьата, дхъыпахъысылуата, йа нымхахъата тшгьгІаймырбатІ. Зарема йлапшу ашІаква ракІвпІ акъраль дахІврала атшауыцІыхра зпщылу. Ауи йапшу аъаща сара швабыжта схъа аладухитІ